Don Diliodaf Bost Luz02
Taneafa neva, taneaf pak, toleaf luzRiaf bitej koe kelt guboyukaf gu vanafiz jowikayad. Suka va rujodeem vlevuon impadimayar. Vamoe Don bost dade afoltafa kolliava sel roidayar ise ton lukoptafe takiskafe perake ko lasteyeem ke kiria anjeyer. Taltefa domega ke bost is bixexo is edgardaweda is zarendanafo aalxo, kotcoba koe tizafi fentafi afi kerajebeyer. Awalt me tidniyir, kadime zida prelkayar. Dene Melexov mona Panteley Prokofievitc sol kenibera va int taneon solimpayar. Tialteson va gamdakoron fidenaf klaim mo rapsay divlaniyir. Werd ke bonolxo tiyir dem kotrafa moavukafa zarenda. Askiyir da bonol ko nuda di divlaniyid. Darya, ton gratcot, ta jaftolfoblara vulteyer. Zarenda, dum jotavrod, va inaf lebaf koelteem bediblayar ; inafa remlanira va bonolxo mo werd va lukoptafa koinga iskeyer. Panteley Prokofievitc va dimrontagiwes werd sistayan gan nugeem ke Darya aze va mawa dimkolaniyir. Moe zobesiki ke fenkupuyun dilk, viomeem ke yon imwiskaf ranetaal ke matelama awalkolon turaltaweyer. Grigori masotceson moe jivot kenibeyer. – Gricka, fu onal ? – Va tokcoba kuranil ? ~ nazbeikye prejayar aze vakrile ilava debanyayar. – Lanit, vieli awaltar. Gricka va kobararija wirkason dimrumkayar, ko batakafa baynomexa vanludevayar aze va stazeem sarduyur, vion kire va rwodeyes sekol govanplekuyur. – Va meriz, kas Gadya al burmer ? ~ in cegapudon eruyur divlanison koo zeria kadime gadikye. – Gue. Kal tiv lanil, davon di artlaní. Guazik ko eyelt va ganton tutulwayan ric gimayar, ko nuba va lubeyes olkeem cobekon treduyur aze van krimpa impadimason va taltef nimat mallaniyir. Grigori koe tiv ixam tigiyir. – Tokliz lapit ? – Van Batakakiria. Mone kros lize ironokon tigiyit fu lagonat. Tiv, glisixoason va tawa, kolavaweyer aze va domega benuniyir. Salt va in divbureyer, tutislanayar, dadon laplekuyur. Grigori medetceson ergoliayar. – Detcel, tetce ! – Kel vieli va bost di istlapit. Tiv koo rawista az van taltefa domega niyir. Mal wida kal sin, lavatuxadana rozara ke wilye artstiyid. Tiv va fodebeltafa kiria sowexayesa vamoe lava domatrideyer aze va vurja benniyir. Arte mon tevoy sajena lum male domega, dive lava divpaklanaf gameem ke naviulaal awiyir. Frelk va yonu zionaskaelafu fixu anameon platiyir. – Va conyokeem divplekul, jin fu merizé, ~ gadik tinteyer, nume ko eyeltam dem abdaraf olk va nuba vanludevayar. Tcastaweson mo lava ric loramayar, dum prejan kay. Grigori va yon adees olk ben soyaci sarduyur, kiceyer. – Arttalac, arttalac, kabay, pinaf is gijaf… Conyok ivamukoron lubeyer aze dum dingeltwazdel sotceyer aze tolon tuaxaweyer viele digxa va ludev uzayar. Grigori va runzanaav al nugaseluyur ise va olaxak mezekason lazomeyer. – Vol lagaskit, Gadye… Tael tir koe ironokaf pak. – Va anteyasiki al naril ? – Ex… en. – Va tey zilil. Guazik toz vikizayar ise van awalt wan titickawes kaike kolavanaf aal disukeyer. – Waspla, me sokebidur dum bet kabay. Remi ironokaf pak dere zo sokonar. – Lité da kon kabayam va meriz dun divburer, ~ Grigori repaleson kaliyir. Lava poke tiv lorapon ve dimniyir, aze waspla abrotcafa gu toloy arcina lum, kerafa dum kaljeyen lut, ton bres lor welveyer aze va conyuta mo lava kan subatoakoraf tastaf ault jontolayar. Gemafa belaxama va tiv bediblayad. – Dure obrat ! ~ Panteley Prokofievitc kaliyir, aze kan ewazalt va pumayan lukast bosolayar. Poke wizunaf naviulaal, wale gameem vektas va lebafa mapa, toloya waspla miledje ve grableyed ; bareafa, lopinafa, stingason grableyer, poke kiria, koe tideda bangeson dum onda.
Grigori va alixa putceyer aze ton yatkafa disukera va kaliafa nira suzdayar. Koe int, va gadikye ligaveon divmodayase rotapsayar, dane va in me al gukenibesanyayar. Meestuyuson, vikizena olaxa koe inaf art va anteyanimkorafa alitara iskeyer. Viele in xowayar enide ko texa va lava di lirdeyer, runza tide mialaf arcina lum, stibuskamayar aze ko lava vion toz kildeyer. – Va in cuul ! ~ guazik sukewemeson kaliyir. Grigori vagrableyer ise impayar, vexe runza tizon ve titniyir, ivamuon soaweyer. Dum jenta, popo tit lava va delafa runza kum dzopokinta vanimpayar. – Ginyil ! ~ guazik ieyer malplatison va tiv il domega. Grigori va runza latidimpayar voxe me jupekayar. Conyokap levgaloron ve empaweyer. Grigori vol ve gumilbavaweyer nume yolkayar. – In jaftolye ! ~ Panteley Prokofievitc prejayar, voxe va vigrokasiki mo soyaci me lasarduyur. Konterakipeson, Grigori va warzaf conyok vaniksantuyur aze vankabuyur. Digxa va ludev nemon al uzayar, runza ve soaweyer. – Va rin gí, va Oretlik !… ~ Grigori puskaceyer titu ludev kuncason solimpason va kabay kuzus ta nira van salt. Conyok, ton opafa sukewera, va lava kadimeon dadeon madawesa dum kusamaf lay bourgayar. Panteley Prokofievitc kan geltapeem va nubelt ke dronza licayar. – Va in mo lava vanstal ! Gil, edeme in va conyok fu gaber ! – Me kival ! Blafotakerafa waspla welmon ve awiyir, va lava tulembiegasayar aze, tuomason va avinkafa takapa, ko ludev va int ve kamimayar. – In imparsar, jinafa ma zo vilar… Me, kel ! – Gipil, Gricka ! – Gi-i-í ! – Obral, weyonal da in lev tiv pujer !… Obral ! Dimsukeweson, Grigori van tiv va eliwasenyesa waspla impayar. Vexe, viele guazik kan dronza fu ebidur, in va ironokafo po sotceyer nume dimestobayar. – Div lava va inafa taka plekul ! Viele va gael al fixatar, tuvumeltaweter. Grigori va artfenkupusa ciondana waspla tituon az van tiv impayar. Inafa taka kev doma ve apteyer, in randes dem moavakeraf pujekeem. – In mea lyumar, ~ Panteley Prokofievitc wilieyer levmadason kan dronza. – Va conyokeem nokenal, Gricka. Folí da va tela ironokafa al narit, lo kera tir dulapiskafa. Kotcoba emayana, Grigori mal temba va tiv ilplatiyir. Miala ke kelda exuleyena, Grigori kan gexata ke gadikye wiyir da in pu in va koncoba djugakalir, vexe guazik va yon diel ke wida, tcastaf tide venta, amliton disukeyer. – Va jin terektal, Grigori, ~ in impadason va wazdelam ke eyelt gin tite nugeem frendiskon adim tozuyur, ~ al katcalá…co-nuvelar da wale rin is Aksinya Astaxova… Grigori tizon ve tukeraweyer, va int askarayar. Bergo ke awem koe inafa awaltanteyana berga vanludevaweyer nume va batakafa conya koingayar. – Obral, nazbeikye, ~ guazik ton olgafa is mibuna puda trenayar, ~ batinde kotviele pu rin me pulvití. Stepan tir vegungik nume me noveté da do inaf kurenik krandé. Mancoba trobon co-rotenuleter, bata arienta, nume va rin walzé : ede va koncoba katcalá, va rin ustason atá ! Panteley Prokofievitc va bongakiraf nubok licayar : kan budemen pozkoraf iteem, va fortey dimrustas fortey mal gexata ke nazbeik disukeyer. – Rotuxara, ~ Grigori ton xadafa puda nufisa va bost puskaceyer, aze ronton gu faltamafa darka wale iteem va gadik ve disukeyer. – Va int fu stival. – Va betcoba korik rokalid… – Va int stival, vakolyocik ! Grigori mo detceem senyayar. Tiv welveson abduniyir. Lava skaelon kadimeon stuteyer. Kottol kal divbotaxo stivaweyer. Artlapison, gadik tolkaliyir : – Obral, me vulkul, edeme, batvielu, mea trubara. Va kona nuga divon mea aykatal. En batinde pu rin kalí ! Grigori me dulzeyer. Ba artnira ke tiv va domega, eruyur : – Va kabay pu monikya zilit ? – Pu dolekik fu dolel, ~ guazik ton lozijnaf kom kaliyir, ~ batcoba titir ta rinafa olaxa. Grigori va gadikye kutcbugdason kadimelaniyir. « Wan flidel, Gadye, va jinaf nimateem roriojal, soe trubatá », trakuyur, riyomeson titickason va tritaf kapray ke guazik. Dimdenlaniyison, in sol bixe turodaweyese moe kralkeem va waspla ropeson tcateyer aze rem xackeem va gama sarduyur. Kabdue tuveli, va Mitka Korcunov wetipaf nik ve kakeveyer. Mitka kan naav ke yantapozlakirafa anamba vefayar. Kadime ludzeksam ke wolteem, inaf anamkaf is blafotaf iteem jlokon afigayar. Xuf etcueem, dum tel ke karvol, gu in va otcesa ik merovangina disukera ziliyir. – Tokliz do kabay ? – Batse onaks ke bat viel, pu dolekik buré. – Den Moxov, mex ? – Gue. Mitka va waspla itason uldineyer. – Mon san-aluboyo « funt » aldo ? – Is miala. Al aldoá. – Do rin laní, mu rin dusivatá. – Lanit. – Voxe icde jinaf yalam ? – Sinton xodiatat, abdifa pulvira tijir. Nuda tiyid kotrafa gu korik divlanis va mista. Sin moo kelda va baroye pokeon lanise berikye, ikayoltane gu Camil, ve kakeveyed. Taneanazbalik, Aleksey miskik, isteon tigiyir. Tritafo bergo ke tantazukot va inafa bongafa berga, uulaf riaf is kendanaf lukastam vakrileon lodason broeweyer, taltefa ita nogloton miabuditaweyer. Lekeon, bak funtera va zeltara, zelt koe nubeem al roidayar nume kayaki va tcor al blokayar. Batvielu, inafa ita lazaviskon miabuditaweyer ; faltafa vobigapa dade tcor koe baplukaf usukeem. Taltefa ma kal ladava al zo soltiolteyer, voxe Aleksey va ruseta tannubon grupeon tanameyer ise va kota jupekayar : licason va olaxak kev azakaf astap, kan talgeem va adrafa eluxatoa solimpayar, aze ton kut tulivayar, aze va ezbama dem olaxa plekuyur, aze adim koe gelteem wiluon tanameyer. Nemon rwodeyel, ruseta koe art tigiyir ise Aleksey va tey eruyur. Beka miskaf, Aleksey tiyir taneaf nubokutiusik ke wida. Me kire va katcalapaf nubok diyir : va lopinaf dam zdankama. Vexe konaktan pwadeyed da konviele, bak ziara, tuzidan gan intafe jaftolye vox ustiskaf, in al nubokayar maneke jaftol mo bourga senyayar, ton fortey divoblakawes, nume va dimviranya di flecupuyur. Toloy berik, Martin is Proxor, va Aleksey tolbelaxon vektayad : dum in alnaf is limantaf dam persaal, voxe kottel va meem diyir. Grigori va Camil berikeem kiavayar. Mitka takaskarayar maneke taka twaweyer. Remi Kapapa, bak nubokutiurelice, Aleksey Camil va jotaf talgeem ke Mitka al me exomeyer : al tazepeyer nume Mitka mo faltamafa opra tridena gan yon azilkiraf buuk va toloy delpor ve putceyer. Artlaniyis va sin, Aleksey alubon ve miabuditayar. – Pu jin va kabay dolel ? – Lustel ? – Tokdroe erul ? – Va tola dem jaftolye is doon kurenikya. Aleksey woltsoakseyer ise va mark tegulayar. – Lionasik, ox lionasik !…Ox ! Ox ! Ax ! Ax ! va kurenik… Is nazbeikeem, dere galpel ? – Va in ta nazbalkera sul, edeme Camil katca griawitir, ~ Grigori krandeyer. Tari moe viga kabdue karnizxo ke uja flavaweyer. Ujapomasik va goyol vamo taka madayar ise ieyer : « Ika alub-sanoy kopek talolk. Toktan loon kalir ? » Goyol bergamucuyur ise vliguson va frolgukaf iteem gubudenayar. Pokepon, batakusukaf guazikam dem ast besanaf gu yona gamda isu diema, iste ivamu dem korik zatcayar. – Tir Gricaka jinafe veygadikye pwadese va yona rupa ke Turka geja. ~ Mitka va in kan iteem ve dasugdayar. ~ Fu terektat ? – Edje terektatat, waspla toz alitatar ise adeeter. – Ede adeeter, titir lodaldofa, belundanya mu min. Moe viga, kadime kevfirdesikafa glesta lize teymilunt turodaweyed poke yoni empanafi bumi, kepaita ke Moxov mona va kusafa kretsa askiyir. Kabduolanison va glesta, Grigori ve putceyer ise pezaretlayar. Tialteson va rija, kenda wale talgeem, guazikye va milunt kadimulaniyir. – Batcoba keyuweyer ? ~ Mitka jlokon ve kaliyir. Guazik kali ironokaf tialt va int dimvuyur aze kou art va kenda ve deswayar. – Batcoba va rin icder, va rin ? – Va rinaf pez koon co-gomyotet ! Is va lukast ! va lukast ! Inde rinafa guazikya tansafton me co-rodimaotcet ! – Jin va rin fu myoté, va zionajik ! Guazik zo ksabeyer. Mitka al azavzaweyer, soakseson va karvoliteem kir nujikivason va awalt. – Rin rovidaf, rin, eim. Yatel, vakolyocik ! Tokinde va jin krul ? Oke va anamba obral ! Grigori va rapsay ke Moxov mona kipeson artlaniyir. Lukidoy tiyir palsenaf gu flavapa dem ketaf centaal. Izga mo rapsay tiyir kretsakirafa, vungafa. – Grublid, bat korik, eim, Mitri… – Nubay dace tir moavukaf. ~ Mitka va tuvel ke tawetc al fenkumuyur, kipenseyer : ~ Abdif guazik, batliz zo gostakser… – Toktan batlize ? ~ puda male tawetc ve ieyer. Grigori taneon kolaniyir, tuvazani. Ault ke waspla va lingenafa azeba tsenteyer. – Va toktel erul ? Yikya koe wertafa sespanga debanyeyer. Koe nuba va rient dem jagila giyir. Va in xuvas va jagila wale raltukaf is cotaf kutceem ton takrelon art Grigori medulzeson disukeyer. In takablagayar ise va batyon tigisik oribayar. Mitka va Grigori ve greleyer. Ve bobayar. – Va kabayam co-lustel ? – Va kabay ? Vanion fu kalí. In ranyayar, gusespawesason va iriba, ise va fidenaf guvengeem leve lebaf nugeem ve ermitayar. Awalt va inaf batakaf gem remstiyir nume Mitka va meelimafa kima ke kotraf nimateem is mantaf dzaves talgukay ke gratcot wiyir. Mirnafa batakuca ke inaf lebaf koelteem va in skebuyur. Antafa alma ke anamkaf buueem tiyir vrodblafotafa. In va Grigori ve ladavavordavayar. – Ex, Gricka, al wil, va gratcot ?… Tir triva, remon zo rowipir. Yikya koo tuvel vane plor ve tolawiyir, ko iriba zijnon debanyayar. – Va burmotaxo kolanic. Grigori va mona nuguulon kolaniyir. Mitka, nimatfenkuson is itabudemeson, va batakafa conya solparsasa ton toloy moavukaf ivamulik va usukeem moe taka ke yikya titickayar. In kan rovaf vox bemuaf iteem va in dizveyer. – Ke batlize til ? – Ke batlize, gue. – Ke toka yasa ? – Ke Korcunov. – Ise tok rinaf yolt ? – Mitri. In va raltukafa kralka ke intaf vitodeem trumon rindeyer, ve levgon nimatdimsoayar. – Rin, tel onasik ? – Volgue, Grigori, pusik. – Rin, dere onal ? – En, viele djumé. – Kan conyok ? – Gue, kan conyok. – Dere fu co-djugaloná, ~ arti amlitki in kaliyir. – Battode, fu askit, ede galpel. – Tokkinde va batcoba co-vanbenplekut ? Me, ekemon. – Wavepon godivmodetel. – Divmodeté, soe zo godivmodatá. – Zo divmodatal, rotití… vexe rinafe gadikye ? – Va tokcoba, gadik ? Mitka toz kipeyer. – In va rin tis dubiesik co-rokrupter… Nume va yon vakol co-nyur. – Benje ! Koe mawa ke alava kenibé, antaf. Bat dilk. ~ In kan gelt nediyir. ~ Ede va jin aneyatal, ben dilk tazetel, divmodeté. Toloya puda koe burmotaxo kontomon zo gildeyed : bana vazafa ke Grigori is bata vafa is sudafa ke burmesikya. Mitka koe gelteem va yona pozla kum tuspupiaweyesa dilgava ke kazakafa anamba taceyer ise stivaweyer. – Va kurenik dil ? ~ yikya eruyur preyutason va kicera. – Tokdume ? – Mecoba, dulapé. – Volgue, tí kaelaf. Mitka ve tukeraweyer, vexe in, kices, vefason do colk ke jagilaal dem ilt titnis va sid, wan bibeyer : – Kalil, Mitri, yikya va rin renad ? – Yona renad, yona me. – Benje… Voxe tokdume va karvoliteem dil ? – Va… karvoliteem ? ~ Mitka rwaltepenon kaliyir. – En, va karvoliteem. – Vey gadikya, tce… Meinde tí. – Voxe tokdume me zo kurel, Mitri ? Mitka va int dimskalteyer ise, pestaleson koe pulvira ke yikya va nulerinda, va blafotaf iteem tuyozdasayar. – Jinaf stekef kurenik ware tir koe kova. In gevanon ve woltmadayar, ve tukeraweyer aze ranyayar. Bora, mal nuda, moe rapsay tauleyed. Bro yebda, inafa kicerama palsesa va kipera, va Mitka ve anteyayar. Miv tilik, Sergey Platonovitc Moxov, tulwon impadimason va stazameem kum deaxolam, kabdue Mitka mangiwisa, va vafo alto bagalion arplekuyur. – Tori jin ? ~ remlanison eruyur, me takaskarason. – Kabay vanbureyen pu min, Gadye. Grigori va burmotaxo divlaniyir, ton vlardaf nubeem. |
| |||||||||||||||||||||||||||||||||||||||
 ← 1-eaf luz - 2-eaf luz - 3-eaf luz → |
