Gustave Flaubert

Gustave Flaubert

1821-1880 Francavaf berpotik

Ba 13/12/1821 koe Rouen Gustave Flaubert koblir. Gadikye va Rouen Hôtel Dieu ropexe gader. Mali rumeugal va tankomuca ke winkablira gruper lizu va griva ta cobekafa dizvera rotison lirder. Bak 2-aksat ke 1832, va Gazafa Reila ke Rouen kofir lize nijur zilkiraf vox ugdafimaf. Bak 1834 va "Art et Progrès" nubasutena fela sutelar lize wenyaf warzot tid yordapa. Bal idulugal ke 1836, koe Trouville in kakever va Maurice Schlesinger is moekote Elisa kurenikya varze dana va birgafa renara kiewagir. Bata skewera tir xanta ke Education sentimentale (1843). Va Mémoires d’un fou (1838) tozur. Bak radimifa tanda, va Rêve d’enfer is Main de fer suter. Ko Colibri rouenafa suterotvirda va Une leçon naturelle : genre commis taneaf suterot dere sanegar. Bak 1840 koo Pyrenees is Corsica Flaubert koyar. Bak radimifa tanda ko Paris rokopafa kotla bendewer. Bak 1842, anton tison tolsandaf, va Novembre suter. Vewayanon ta rindera va rokopa, va taneaf siatos ke Education sentimentale bokar. Bak 1844 vanlakison va Pont l’Evêque va noglavordava levgar. Katcalayanon gan bata walta, gadikye mea jugemer da in wan vayar. Ko Croisset poke Rouen inkewer. Bak 1846 va gadikye is berikya Flaubert drasur. Do gadikya daletoe di irubar. Va Louise Colet vanpis fertikya kakever. Ta wayotera va inaf noglakolaceem, selaropik va jonvielera koe idulafo xo savsuted. Bak 1849 in ko Roneka do Maxime Du Camp nik mallapir. Va Misra az Suria az Beirut az Jerusalem az Rodos az Konstantinopolis az Atinay worad. Va La Tentation de Saint Antoine jiadar. Bak 1851 ko Sparta is Peloponesos tolmallapir aze va Patra az Brindisi az Napoli az Roma az Firenze worar. Koyara riwe toltandon jijar. Bak 1854 do Louise Colet kaljoar. Arti tolda, ko Revue de Paris virda Madame Bovary berpot suten mali 1851 zo sanegar. Tir granafa kiewatca. Golde inafa nuyukamuca konaka nakila ke berpot zo yontad ta onkara va sutesik. Arti tanda Flaubert zo vanbulur. Bak 1858 ta vayara va Salammbô warzaf berpot ko Kusantina az Tunus az Carthago mallapir. Bak 1869 L'Éducation sentimentale zo piskur vexe va rotakafa kiewatca anton kazawar. Bak 4-aksat ke 1872 Flaubert va gadikya kranavon drasur. Vanolapan, "al sonké mali 15 viel da jinafa kimtafa gadikya tiyir jinaf lodalbayan tisik". Dimpiyison ko Croisset, va Bouvard et Pécuchet abdumimaks kobrar. Arti tolda kaiki sanegara La Tentation de Saint Antoine suterot tir rodj. Flaubert kobar vexe sfiannumejer ise noglazegamejer. Bak 1877 ko Paris inkewer ise va Herodias jiadar. Bak olgaf is fentaf fentugal ke 1879, Flaubert tir koe Croisset. Va yotcaks va Boule de Suif ke Maupassant suter ise dakter da bat berpot tir "bunyeragrot". Ba 08/05/1880 koe Croisset golde akoladilfura levgon awalker, iskeson va Bouvard et Pécuchet mejiadayan berpot. Zola is Goncourt is Daudet is Banville is Maupassant is Coppée is Huysmans is Hennique is Alexis is Céard ko awalkikxo va in jupad.

Gustave Flaubert  Blira 1821-1880  Ava Francava  Suterind Berpot   Suterot Les Mémoires d'un fou (1838) Smarh, vieux mystère (1839) Novembre (1842) L'Éducation sentimentale (1845) (1-eaf siatos) Par les champs et les grèves (1848) La Tentation de Saint Antoine (1849) (1-eaf siatos) Madame Bovary (1857) Salammbô (1862) L'Éducation sentimentale (1869) (2-eaf siatos) La Tentation de Saint-Antoine (1874) (2-eaf siatos) Le Candidat (1874) Trois Contes (Un cœur simple, La Légende de Saint Julien l’Hospitalier, Hérodias) (1877) Bouvard et Pécuchet (1881)

wp-de:Gustave Flaubert wp-en:Gustave Flaubert wp-es:Gustave Flaubert wp-fr:Gustave Flaubert wp-it:Gustave Flaubert wp-nl:Gustave Flaubert wp-pt:Gustave Flaubert wp-ru:Флобер, Гюстав wp-tr:Gustave Flaubert