Kudeem ke Aisopos : Cigavol

Kudeem ke Aisopos : Cigavol

Savsugalafa ellasafa kuda

Cigavol is wilye Cigavol, ebiduyus va wilye, va ovacka ta vumbera djutrasir. Acum buntur da ine mielon dankason is weyonason va kenibera va korikeem mazuker. Wilye kalison da ta tufavlawera maninde sokaskir, va int pour ; lecen divmodason sokaskir da sin va gubefa kobara setiked. Bam cigavol va ar famint dakter, buntuson da ine ilagison va gadikya is berikyeem va tuwava situndar. Dulzer da ton dere batcoba va dulap ke feliik sokozanir larde tukeon wilya atoapad. » Kle ! ~ cigavol divier, ~ kore venganyal nume vengarsal, jin goldeon me fu getiné ! » nume va ine vumber. Bata kuda nedir da djukurotus tuwavajik, viele va int gu xatcaxanya me robesar, pune nisanon sorotur. Cigavol is rucasiki Cigavol, anjeyes va onya ke glotcasik, va tigisi rucasiki toz friner. Okie tire, yoy lamewer nume jontik fortey traspur ; voxe fomaltiolteson va koncoba gu azil, in wiver, vexe cugeke va yoy adim mea dir. Bata kuda va kottan motcas va bettan num inton vetuigas, gukoer. Cigavol is yona wilya Cigavol, grupeyes da akolafa wilya koe yofraxe tigiyid, va int gu kurmik efur, aze, divbureson va exavaf goreem, kallanir. Lente kolna, erur inde vid : » Vickitiv, ~ dulzed, ~ ede batlizu mallanil. » Batinde pestorik ko xialara ke ikorik nekev kota inafa vanklara va teluca gogildar.

Xanto   Vergumvelt Αισώπου Μύθοι Sutesik Αἴσωπος Piskura Ava Ellasava Evla 6-eafa voldecemda   Kalkotavara   Vergumvelt Kudeem ke Aisopos Kalkotavasik Yurani Andergan Piskura - Evla 2013   Krentduga   Webesik Yurani Krentduga Tuenayana

Kudeem ke Aisopos (Aisopos) ← — - Cigavol - Wegidol →