NyagaceemScapin Nakileem01 Nakila02
| ||||
|---|---|---|---|---|
| Vergumvelt | Les fourberies de Scapin | |||
| Sutesik | Jean-Baptiste Molière | |||
| Piskura | - | |||
| Ava | Francava | |||
| Evla | 1671 | |||
| ||||
| Vergumvelt | Nhagaceem ke Scapin | |||
| Kalkotavasik | Staren Fetcey | |||
| Piskura | - | |||
| Evla | 2006 | |||
| Klita | Kalkotavaks | |||
| ||||
| Webesik | Favesik:Vieux Daniel | |||
| Krentduga |  Gotuenan
| |||
Taneaf nakileem, toleafa nakila
Scapin : Tokcoba, Octave jiomaik, tokinde til ? Tokcoba tir ? Tok zvak tir ? Wí da til skaltepeyen.
Octave : Ax ! Abegaf Scapin, tí buktaf, gripokolewes, tel lovolkalaf ayik.
Scapin : Va tokcoba ?
Octave : Icde jin, va mecoba al remravel ?
Scapin : Me.
Octave : Do Géronte jiomaik gadikye artpir, ise sin va jin djukured.
Scapin : Ex tokcoba ! Tokcoba co-tir lidawalkedafa?
Octave : Kax ! Va lazava ke jinafa guyuca me grupel.
Scapin : Me ; vexe ede pu jin boreon djukalil ; ostik tí vinusik, dulapesik va arienta se ke yikeem.
Octave : Ax ! Scapin, ede va koncoba co-roredul ike va kon foalk co-roglotcal, ta da mal jinaf tis zvak zo impá, folinhí da pu rin va bli loon co-danutú.
Scapin : Ageltakalison, abiccoba tir volrotisa tori jin, viele djuforná. Mal kelt enlanon al kazawá va norlanhaca va askira va agralaca yo is dikiadurimaca yo va dana wetce « nhabaca » ravlem megrupesikaj yoltar ; ise megrecion rokalí da ar abictan lodeksaf gu rob is skujera, urlijkeyes va lo aliuca dam jin koe bata olukafa exava : vexe, kax ! Riwetcuca batvielon rotarson krupter acum mali nigeyera va kotcoba al ebká.
Octave : Tokinde ? Toka arienta, Scapin ?
Scapin : Stuva lize dolge malherot ve seleweyé.
Octave : Malherot !
Scapin : En, va sint ve skudjimiyiv.
Silvestre : Rin dolge malherot ?
Scapin : En. In dolge jin ve tiyir enmalhamaf. Icde niauca ke decemda maninde ve aundeyé da di gorayá da mea askití. Rotaxe ! Va rinafa stuva pu jin reizul.
Octave : Grupel, Scapin, da weti toloy aksat Géronte jiomaik is gadikye belcon totaweyed ta kazakoyara lize sintaf dulapok se aotcewed.
Scapin : Va batcoba grupé.
Octave : Ise da Léandre is jin gan sintafe gadikye ve zo iskewed, jin enintenon gan Silvestre, ise Léandre enintenon gan rin.
Scapin : En : va bata vajulera al verkanhá.
Octave : Artimon, Léandre va korenana jotafa Misrikya ve kakeveyer.
Scapin : Va bancoba dere grupé.
Octave : Oye da tiv napik se, va intafa renapara pu jin davon ve odiayar ise ta wira va tela yikya va jin ve stayar. Trasiyí da inya listanhafa vox lelistafa dam in djumeyer da co-gotrasiyí. Kotvielon va inya pu jin kaliyir ; kotgemelton ebdeeson va inafa listuca isu kuca ; siskeson va inafa ormusuca ; ise pu jin nhabon pulvison va menpera ke inafa dosita, ke dana va lopinafa pulva se pu jin munsteyer, sufeson da va sin krupté dum tel lodormus ke tamava. Va jin kontomon motcayar kire tiyí gustansaf va inaf kaliks yo ise icde jinafa brunuca va renatey se va jin gronon bokeyer.
Scapin : Men wí liz djulanil.
Octave : Konviele va jin dositayá ta da va korik se sus va inaf fuxaplek denlaniv, koe monama kene notrafa ruda va konaka ikuzapasa tema ve gildeyev. Va tisa coba eruv. Ayikya pu jin repaleson ve kaliyir da va safa koncoba dene diveik yo batlize co-rowiyiv ise da, vaxede tison volgustaf, ganon zo di co-konteyev.
Scapin : Tokliz bacoba va min jupar ?
Octave : Rilituca ve askiyir da ta tisa wira va Léandre vebayá. Va bonta kolaniv lize va awalkesa guazikya tcicena gan batcesa zanisikya is ikuzapasa yikya, tela lolistafa is lokontesa kotlize is kotugale rowina.
Scapin : Ax, ax !
Octave : Artanya al nuvelayar mayakafa inde tiyir ; kire intafe tanoye vage tiyir gratcaja dem futainejaf mielewazalteem ; ise divatcetakasiki tiyir blafotafe « cornette » kavlepeyene tite taka, iskese da mo epitem usukeem lubejer ; ise wori, baton vagekirafa inya decitsumpon vebeyer ise intafa ilka anton tiyir tcolera is menpera se.
Scapin : Va pisa coba peztalé.
Octave : Ede va in co-wiyil inde kalí, vaon co-krupteyel mafelaf.
Scapin : Ox ! Me etraká ; ise, vaon me wiyison, gildanhá da in wiyir menpepes.
Octave : Inaf ikuzeem me tiyir gexatemoyas volpinaf ikuzeem ; ikuzason in tiyir kucakontes ise inaf kranav tiyir tel lolistaf ke tamava.
Scapin : Va batcoba gildanhá.
Octave : In askiyir da kottan boregar, mo alto ke bata awalkesikya, abegafa gadikya inde kaliyir, renason va int mimason ; ise kottan tuke mana andanha zo remruyur.
Scapin : Keskeon, batcoba tir kontesa ; ise gildanhá da bata andanha al askir da va in renal.
Octave : Ax ! Scapin, bartik vaon co-renayar.
Scapin : Lanon : tokkane co-roweyonat ?
Octave : Radimi konaka pulva kane va tulozijnara va kranav ke bata menpesa vanmanhanikya lagayá, batlizu di divlaniyiv ; ise pu Léandre eruson va coba icde bat ilkik in trakuyur, pu jin fenton ve dulzeyer da va in listaf krupteyer. Golde pulvisa fentuca ve zo puileyer voxe pu in va keska ke man listaceem mo jinafa gloga me ve djunedí.
Silvestre : Ede va bata nega me tulolial, eldeon ware titit. Iskel da kan toloy ravlem tenú. Inafa takra malion koteyawer. In mea roblir ede ta vinura va neciafa vanmalhanikya me di lanir. Intafa ferefa worara se, gan zanisikya vanpiyisa gadesik yoke awalkera ke gadikya, zo dimemuded : batse inye pokolewepese. In xuvar ise voser ise dilder : mecoba. Pu in zo kalir da yikya, beka kiewegiskafa is zobesikiiskafa, va telafa yasa pasur ; ise da vaxede kurera va onkara se vol naler. Gan man volfakaceem inafa renara zo tulogijar. Koe taka in ruper ise tegular ise under ise sespar ise kogorar : weti barka do inya al kurer.
Scapin : Gildá.
Silvestre : Ostik, va dimlapira ke gadikye anton keyene arti toloy aksat doon torigil ; is va kosmara gan ziavikye va birga ke cinafa kurera, is va ara gokurera do nasbeikya ke Géronte jiomaik is toleaf kurenik ke nuvelason Tarento.
Octave : Ise moekote, va vuranuca lize bata neciikya tir, is va jinafa merotisuca va digira va grelesaca torigil.
Scapin : Tir kotcoba ? Golde man grewej zo toktepec. Me jonte stubewec ! Me til kinokaf tokteyenon gan mana abiccoba ? Tetce ! Rin til ontinaf is pwertaf dum gadik ise mal taka me co-rotrasil ise koe swava va kona durimafa beya ik telaf suzenk ta tumalhara va winafa arienta me co-roglotcal ? Benje ! Stapeson ! Co-albá da lekeon va minaf guazikeem co-gonortayá ; va kottol co-coenhéyé ; ise anton tiyí jotapaf viele kan decemoy oblif randay va int ixam sugdavayá.
Silvestre : Welidá da pu jin va fitc kelt me al zilir, ise me tí ormus kepte da do malherot roselewé.
Octave : Batse neciafe Hyacinte :
 Taneaf nakileem |
