Xailibu nuedapaf tcabanhesik
| ||||
|---|---|---|---|---|
| Vergumvelt | Hailibu le chasseur au grand coeur | |||
| Sutesik | - | |||
| Piskura | - | |||
| Ava | Mongolava | |||
| Evla | - | |||
| ||||
| Vergumvelt | Xailibu nuedapaf tcabanhesik | |||
| Kalkotavasik | Sabrina Benkelloun | |||
| Piskura | - | |||
| Evla | 2007 | |||
| ||||
| Webesik | Sab | |||
| Krentduga |  Gotuenan
| |||
Lekepon koe mongolaf rijustap tiyir nuedapaf tcabanhesik yoltkiraf gu Xailibu. Moi kota tcabanhera, wal widikeem va atela pakayar ise tori int va pakam anton suyur. Inafa trumuca mu artan va tarkapasuca koe wida pu in vodayar.
Konviele, voce da koe aalxo tcabanheyer, Xailibu va kwitafe ie se tidu kelt ve gildeyer. Disukmadason, va sulemam gralomeyen gan estudjafi turci ve wiyir. Va wivgasik kan tceka kalion ve kulmeyer. Bakanon gan tceka, turci va wivga ve ilnariyir.
Xailibu va bat perakekoraf divulaf sulem ve disukeyer aze ve kaliyir :
- Plekam, kalion dimdenterigel !
Sulemam ve fargukayar :
- Gotarkan tcabanhesik, rin va jinafi bli su giwal acum tí vaon kagrupepes. Tí nasbeik ke munstiko gazik ise tí lanaf da gadikye kan gablepera va rin grewatar. Va jontika rinon naritina jwa digir. Ede meka bata jwa pu rin co-puveter, va aka pu in roterutul. In koe art vaon gir. Bettan gis va bata aka koe art va kot sulemavot grugildatar.
Xailibu va meka beta jwa dulapeyer, vexe grugildara va sulemavot se puvepeyer. Pu nasbeikya ke munstiko ve eruyur :
- Kas mana aka en krulder ?
In ve dulzeyer :
- En. Vexe va kotcoba ke sulem gildetel, tori int gosutul. Ede pu artan co-kalitil, turaporawetel.
Jotafa munstikoocya kal welfa va Xailibu vanstayar. Darpe da koe welfa sin abdulaniyid, lava kreme vokayar nume Xailibu rolaniyir dum moo ikpapa. Moimon yozdas berm turowinaweyer lize munstiko gazik sokeyer.
Munstiko gazik ve tiyir valeaf raveson da Xailibu va nasbeikya al giwayar nume ve firviyir da in va betcoba puvesa ke intaf berm narir. Arti amlitgemelt, Xailibu ve dulzeyer :
- Ede rin va koncoba ton yal pu jin co-djuzilil, kas va aka koe art pu rin co-roterú ?
Munstiko gazik ve takomayar aze undemeyer. Azon div art va aka ve deswayar aze pu Xailibu ve ziliyir.
Ba mallanira, nasbeikya ke munstiko pu Xailibu ve tolkaliyir :
- Gotarkan tcabanhesik, vay, setikel da va mecoba kalina gan sulem gokalil. Edeme davon turaporawetel.
Gison va aka koe art, Xailibu va tcabanhera koe aalxo ware loon albayar. Va kot sulemavot isu sveriavot grugildayar ise tagelton grupeyer lize va bet sulem ko beto xo ke mevtava rotcabanheyer. Va lo atela grutcabanheyer nume pu widik yo loon roziliyir.
Konaka tanda kalion traspuyud. Konviele, koe mevtava, va lospa dem sveri se kwiton pulvisi icde koncoba ve gildeyer. Kalterktayar. Teli taneasveri kaliyir :
- Arliz kalion gomaltalat ! Batsielon, mevtava atitsutur nume vamolavara va kot siday vlevplawatar. Jontiktan lanon awalketed.
Xailibu gildeson va batcoba ve zo lemisteyer. Denon ve ipeyer aze pu widikeem va bat pulveem razduyur :
- Arliz davon gomallanit ! Batlize mea rozavzat !
Kottan zo akoyeyer aze sin ve kaliyid :
- Min batlize blinhit. Tokdume co-gomallanit ?
Xailibu va bata pulva se wan tolkaliyir vexe metan terktayar. Borepeson in voseyer :
- Vay va jin terktac. Rovogá da jinaf kaliks tir ageltaf. Va jin folic, noelkeon gomallanit ; aron batcoba titir gaversafa.
Guazikye ve lagayar da va Xailibu tuvumeltar :
- Rin til kiewik ise meviele al rotuxar. Min mali jontika oxila batlize blit voxe noelkeon pu min erul da mallanit. Pu cin gokalil tokdume kire mallanira tir voldrikaca.
Xailibu va mek ar mergil ta giwara va widikeem wiyir. Laizon tuvumeltapaweyer. Tugorstaweson, pu widikeem ve kaliyir :
- Batsielon mevtava atitsutur nume vamolavapara va bat siday vlevplawatar. Wic, sveri se maltalad.
Bam ve pwadeter kane va aka al seotar, da va kot bonol isu sulem grugildayar voxe da kivoe turaporawera va birga icde gildenaca yo gosuyur ise da tenion sveri se pu sint pulviyid da golde moife egale gonotced.
Pwadeson va rupa, ome ke inafo alto, male nugeem, toz turaporaweyer. Ba tenura va rupa, varafo alto ve turaporaweyer.
Widik yo zo lemisteyed ise boreyed. Batceson da sin va Xailibu abdion al me terktayad. Vanbureson va benele is intaf bonoleem se, do intaf guazik yo isu nasbeik, van sumefa patcta toz laniyid. Mielon wan laniyid viele laizon vaf rujod yo va kelt toz besayad ise suka toz evieyer. Boreon luvayar dum meviele abdion. Vane sinafa wida, sin va ediara mal atitsura ke mevtava ve gildeyed.
Kalit da radiminasbeik yo ke wida va nuedapaf tcabanhesik Xailibu ware setiked ise icde aneyara va bata aka pulvid.
