Biblia Koxelet Blokey03

Kristevafa Biblia : Guazafa Bafela

Xanto
Vergumvelt	Biblia, Vetus testamentum
Sutesik	Katalikafa Uja
Piskura	Vulgate siatos
Ava	Latinava
Evla
Kalkotavara
Vergumvelt	Biblia, Guazafa Bafela
Kalkotavasik	Mixail Kostov
Piskura	-
Evla	2001
Krentduga
Webesik	Troubadour
Krentduga	Gotuenan

Koxelet neva, bareaf blokey

1. Tir ugal ta kotcoba, ugal ta kota coba leve kelt :
2. ugal ta koblira,
   vox ugal ta awalkera ;
   ugal ta taplekura,
   vox ugal ta divzaetawara va taplekuyuna coba ;
3. ugal ta atara,
   vox ugal ta fraskera ;
   ugal ta baliera,
   vox ugal ta kolnara ;
4. ugal ta borera,
   vox ugal ta kipera ;
   ugal ta arubara,
   vox ugal ta stutera ;
5. ugal ta raporkabura,
   vox ugal ta raportredura ;
   ugal ta dablura,
   vox ugal ta tarutera va dablura ;
6. ugal ta aneyara,
   vox ugal ta drasura ;
   ugal ta sura,
   vox ugal ta mimara ;
7. ugal ta sollipara,
   vox ugal ta asadara ;
   ugal ta amlitara,
   vox ugal ta pulvira ;
8. ugal ta renara,
   vox ugal ta bogara ;
   ugal ta geja,
   vox ugal ta dili.
9. Tok gunt pu ayik ika inafa zegara leve awaltara zilidur ?
10. Va kobara koaykana gan Lorik pu ayikoceem al wí.
11. In ba gonaskine va kota coba askir ; ostik ko takra ke ayik va trakura va kotabuca al plekur beka in va tozitenion grabom ke Lorik me grugildar.
12. Jin al kagrupé da inafa kaluca anton tir wiveson is va int tukiewatiason bak blira ;
13. Voxe ede ayik estur ise ulir ise tukiewatiawer vanmiae kobara, en tir zil ke Lorik.
14. Al kagrupé da kotcoba askiyina gan Lorik sojijatar,
    da mecoba zo goloplekur
    ise mecoba zo gonezuar,
    ise da Lorik batinde sotegir ta da zo kivar.
15. Coba tisa ixam tiyir,
    ise coba titisa ixam tiyir,
    ise Lorik va abdiaceem dimplekur.
16. Leve awaltara dere al wí
    da lize malhexo tir ikoruca,
    ise da lize malherotxo tir ikoruca.
17. Jin koe takra al kalí : Lorik va malhik is ikorik malheter ; kire ugal batlize tir ta kota coba isu skura.
18. Koe takra al kalí, icde kot ayikoc, da Lorik vaon duxatar ise da in miv witir da anton tir bonol.
19. Kire bali ke kot ayikoc is teli ke bonol tori sin tid milafi bali ; rape dam kontol awalker milinde artol awalker, kottol milinde sokagaelar, ise vamoeuca ke ayik kapbure bonol tir nedoya ; kire kotcoba tir greciuca.
20. Kotcoba milliz sopir ;
    kotcoba male gopa zo askiyir,
    aze kotcoba ko gopa sodimpir.
21. Toktan gruper ede kagaelara ke ayikoc tidar volse tela ke bonol ko sid titar ?
22. Ise al wí da mu ayik tele lokiewe tir wivera va inaf skuks yo : en tir inaf pak. Kire toktan co-askir da in va kaikion sotitisa coba wiver ?

Kristevafa Biblia : Guazafa Bafela Koxelet neva ← Koxelet 2 - 3-eaf blokey - Koxelet 4  →