Biblia Koxelet Blokey08

Kristevafa Biblia : Guazafa Bafela

Xanto
Vergumvelt	Biblia, Vetus testamentum
Sutesik	Katalikafa Uja
Piskura	Vulgate siatos
Ava	Latinava
Evla
Kalkotavara
Vergumvelt	Biblia, Guazafa Bafela
Kalkotavasik	Mixail Kostov
Piskura	-
Evla	2001
Krentduga
Webesik	Troubadour
Krentduga	Gotuenan

Koxelet neva, anhusteaf blokey

1. Toktan tir dum proyik ?
   ise toktan va pebura va cobeem gruper ?
   Proyuca ke ayik va inafa gexata tujebesar,
   nume boksuca ke inaf lesay zo betar.
2. Pu rin kalí : Va benplekura se ke gazik skul,
   ise batcoba yoke vogaks askiyin pu Lorik.
3. Va in vol ilal,
   ise va rotaca vol wan askil !
   kire in va beta galpenaca sorotaskir,
4. kire pulvira ke gazik tir gijarotifa ;
   voxe toktan pu in kalitir : Va tokcoba askil ?
5. Tan skus va dirgara va rotaca me gruper,
   ise takra ke proyik va ugal is malhera gruper.
6. Kire tori kota coba ugal is malhera tid,
   viele volkaluca va ayik kaikanhar.
7. Vexe kas in va sokitise me gruper,
   ise va tan kalitis inde batcoba sokitir ?
8. Ayik va intafa gandira me felir
   nume me grukagir,
   ise va meka felira va awalkeraviel dir ;
   koe bata aliera meka tunuyara tir,
   ise ikoruca va ikorik me rogiwatar.
9. Va batcoba kotron al wí ise va jinafa takra al terktá dolge kotcoba sokisa leve awalt. Tir ugal remi dan ayik va ayik felir ise tuvolkalar.
10. Bam va baerdon kotawayan is kotabon vansas ikorik al wí solve da ronkon tegiyis artan sume tumtaxo zo kotawayar ise koe widava zo drasuyur. Tir ara greciaca.
11. Ede restalira kev rotaca wiluon me zo skur, takra ke nasbeik ke ayik dem djurotura zo tukotrapar.
12. Wori, beka trobasik decemon rotur ise abrotcion stingar, dere grupé da kaluca tir tori tan kivas va Lorik kir kabdueon tis kivapas.
13. Volse kaluca me tir tori ikorik, nume battan va intaf vieleem me abdujijatar lidame kabdueon Lorik me tir kivapas.
14. Tir tanoya greciaca sokisa moe Tawava :
    tid malhesik yo tenuwes kare ikorikaf grabom,
    tid ikorik se tenuwes kare malhesikaf grabom.
    Kalí da ware tir ara greciaca.
15. Acum va daava al siské kire tori ayik leve awalt estuson is ulison is wiveson anton tir kaluca ; tir coba govandositasa vanmiae kobara remi bliravieleem zilin gan Lorik leve awalt.
16. Viele ta grupera va proyuca is krafiara va tawavafe sokise va jinafa takra al favé, kire iteem ke ayik afizon is mielon me djumoder,
17. va varaf grabom ke Lorik al wí ise da ayik va askine leve awalt me grutrasir ; kore in gilaneyar, me trasir ; ise kore ede proyik co-gruper, me co-trasir.

Kristevafa Biblia : Guazafa Bafela Koxelet neva ← Koxelet 7 - 8-eaf blokey - Koxelet 9  →