Pablo Neruda
|
Siskesik va kotafa tadava, viltes vrutasik ke intafe sare, Pablo Neruda tir tan lozolonaf amerikespanavaf ezlik. Tanizva nover da gaderopafa is arayafa towara ke decemda zo tolconyukar, ton meeuropaf siak. Inaf grabom wale dank va listuca ke tamava is inaf saneeem is lyumarezlopa pakawer. Sporgaf ezlik, Pablo Neruda va teykas is viltes grabom isker. Keskeon, ezlik is savsaf dobulik, Neruda tir vund dem konak lent. Icde ayuca, ezlik al tir tulik, noveson da golde geja div Espana ta gelbera ko Tcilea konak celemoy korik al rototceyed, vukteson va jontika gaderopafa acagira. Vexe dere, baalpeyenon is volgivayanon is dison va meki malyopasiki meiu ileaca, va torkik is adjubesik Stalin sisker. Artipon, goldeon miv di ziwideyer. Dere batcoba va merorelvana conyuta al isker… Nazbeik ke impadimakikye is tavesikya tolaksaton kaiki koblira awalkeyesa, Ricardo Neftali Reyes Basoalto, okon Pablo Neruda, ba 12/07/1904 koe Parral koblir. Koe Temuco widavama koe Araucania ilefa winta rumeugal dilizer. Gan indiafa pofa araya ke gola is anoelapaca ke tuwava is darkapa belcon jijason zo di tcalayar. Tison sanbardaf, in va yona taneafa ezla is yona vedaxa sanegar. Mali 1921 koe Santiago va gaaropa is francava is francavaf suterot vayar kire djuvanpir francavatavesik. Brudison va Jan Neruda ceskaf ezlik (1834-1891), va Neruda ikayolt kiblar, aze tuke yon sanegaks isu ezlanegaks kalion tusposawer. Tison sanlerddaf, doleson va konako guto is trula firviyina gan gadikye, va Crepusculario taneafa neva dodeson sanegar. Arti tanda : cuisafa Veinte poemas de amor y una canción desesperada. Bak 3-aksat ke 1921, in ta francavavayara ko Santiago inkewer. Bak 10-aksat, intafo Canto de la fiesta koe Kotlafa Galdaboda va Taneadro seotar. Koe Juventus kotlafa fela isu Claridad kotlafa dokobar ise va yona artowarafa exaksara kevusa va yon dodelik gu ardial paker. Bak 1924, ta ektudara va suteroteem in va francavavayara jovler aze, bak 1927 wetce dobulik zo koflir, tison coskaatoesik koe Rangun az Colombo az Batavia (lize bak 1930 va jotafa nederlandikya listafa Maruca kurer) az Singapore (1931) az Kalkatta az Buenos Aires. Bak 1932, ko guga dimlapir aze va Residencia en la tierra sanegar. Mali 1935, koe Espana tir coskaatoesik lize do Rafael Alberti is Jorge Guillén is nelkon Federico Garcia Lorca grupeyena koe Buenos Aires non dokalir. Battel tori inafi bli isu grabom di tir gotus. Bak 1934 Malva Marina nazbeikya koblir. Koe Madrid kotla in laxar ise ezlanegar. Va Delia del Carril titis toleaf kurenik kakever. Koe Espana gejabagalar ise va selteva yoter. Moi fascievafa kevmadara ke Franco ba 18/07/1936 az adjubera va Garcia Lorca koe Viznar, vanpir aluteik tori Espanafe Sokasane. Va Dank ke yon awalkaf ervolitik taneafa gaderopafa ezlapa sanegar acum sol coskaatoerafli zo di nabildar. Bak 4-aksat, do Cesar Vallejo va espanamerikafa lospa ta pomara va Espana is Vangluyaks ke yon tcileaf gruadik ta arayarojura. Bak 10-aksat, ko Tcilea dimlapir lize va España en el corazón sutelar. Koe bata neva siskesa va sokasanefa Espana in godelon gorukon kaikfir. Azon koo Mexika is Cuba is Perua koyar. Bak 1938 gadikye awalker. Tison puskeyena is akolafa, Pablo Neruda mea grusuter, live da tcileafe bowere erur da in va emudera va yon sokasanef gelbesik ko Tcilea viunsur. Tol-decitoy kan Winnipeg tota va Tcilea mal Franca batinde di kallapid. In wetce jadif coskaatoesik koe Mexika lize taltevafa bagala dere dilizeyer bam zo koflir. Va yon nelkaf rebavaf lingesik nobar, ise intaf grabom, pilkovon Canto General, tolon zo koebelgar ise tulozolonawer. Neruda va Canto en Chile, va taneaf greelt ke Canto General, bokar. Arte 15 km gee Valparaiso, va Isla Negra (Ebeltewala) ind luster. Bak 1940 ko Valparaiso in dimlapir aze ko Mexico wetce jadif coskaatoesik zo koflir. Bak 12-aksat ke 1941 koe Cuernavaca gan nazievaf dostak zo dilfur. Bak 1942, Malva nazbeikya awalker. Bak 1945, Neruda wetce pulodik ke lentef kawodaf winkeem zo libur ise vanpir bewik ke tcileafo doevafo pako. Inafa saneuca tir datafa. Va liburaf tawuk ke Gonzalez Videla gader, vexe moi libura wetce taneagadesik bak 1946 battan di nijur kevdoevapaf torkik. Neruda koe puloda kan dewitca dem J’accuse! kotgrupaf vergumvelt ke Émile Zola kategir. Golde "gugarelmera" flintlanyayanon, va sopera penon divvawar aze loon tandon birgoton blir aze ko Argentina va Andes rodega remlakir. Koe Europa divbliyinon, ko SSSR is Polska is Magyara is Italia lapir. Va India is Mexika (do Paul Eluard) dere di worar. Koe Rangun wetce Ad Honorem coskaatoesik zo askir, lize va Josie Bliss jotafa myanmikya zivotcon skedegar. Bak 1949, Neruda tir bewik ke Tamavaf Dilipirdot koe Paris aze, bak 1950 do Pablo Picasso va Walvedeyafo Dilidro seotar. Battandon va Canto General suteyen bak birgotugal zo sanegar. Koe Tcilea suterot davon zo zuker. Jonvieleson koe Italia, koe tana Tirreneo ewala zo sokeragledar. Va Matilde Urrutia blirarenanikya kakever. Inya pu in va Cien sonetos de amor (1959) yona renezla ton cugunaykafa listuca koswar. Bak 1952 ko Tcilea dimlapir aze bak 1954 va Odas elémentales sanegar. Bak 1957 in vanpir taneagadesik va Tutanaks va tcileaf suterotikeem. Aze bak 1964 va liburaf tawuk ke retik va sokasanefa taneagadera Salvador Allende kotron bristur ise va Memorial de Isla Negra sanegar lize va dimara va intaf abdiugal is klokera icde loberafa ayuca ruer. Bak 1965, malenglavasik va Shakespeare, wetce "Doctor honoris causa" (trakuropa is suteroteem) zo porar. Bak 1969, va in wetce retik va taneagaderalibura doevafo pako dasugdar, vexe joke Allende tanaf retik ke Unidad Popular Neruda ebgar. Radimi libura va Allende, va permikeba koe Franca Neruda naler. Va La espada encendida is Las piedras del cielo koeon di sanegar, va toloya neva lize adrafa gotuskuca is amlit ke tamava va tela lonoafa muxara zomer. Bak 1971, Nobel Suterotafo Poradro va inaf grabom sonar. Yona inafa ironakafa neva, tulon La rosa separada, kan undera icde akola is guazuca is awalk zo tcalad. Bak 1972, ebgason va permikeba koe Franca ko Tcilea dimlapir lize koe vedeyafo utiuxo ke Santiago va sanefa porara kazawar. Bak 1973, in va tawuk tori pulodalibura paker, kabeson va latinamerikaf suterotikeem isu europaf enide tcileafa koegeja zo taruter. Ba 11/09/1973, Pinochet is amerikafa CIA va Salvador Allende vetrovgad ise adjubed. Mona ke Neruda koe Santiago zo torsar ise inaf neveem zo koteykar. Ba 24/09, Pablo Neruda sokeragledanon awalker. Vrutasik va folva tazesa va vo is va rujara lubesa mo tcileafe sane moi rotinarira gan sayakikeem. Do anoelafa ervolia inafa caxa sokir. Inafa kotawara vanpir leca ke kevotcera kev fascievafa eaftuca. Mal tari dank bimiled, kaikawalkon vrutas va kumsetusi ezlaroti. Bak 1975 Confieso que he vivido namio zo sanegar lize in va inaf koyareem isu viltereem isu kakevereem isu renareem bron is krenugon negar. « Ko yolt, ko kiblanhayan mamtaf yolt, enide moe jinaf niskeem asankeem dankar, poke bira, viele awalketé zo djukotawá. » Pablo Neruda |
| |||||||||||||
wp-de:Pablo_Neruda wp-en:Pablo_Neruda wp-es:Pablo_Neruda wp-eo:Pablo_Neruda wp-fr:Pablo_Neruda wp-it:Pablo_Neruda wp-nl:Pablo_Neruda wp-pt:Pablo_Neruda wp-ru:Неруда,_Пабло wp-sw:Pablo_Neruda wp-tr:Pablo_Neruda
