Sully Prudhomme

Armand Sully Prudhomme

1839-1907 Francavaf ezlopik

Ageltaf yolt tiyir René François Armand Prudhomme ise in tiyir nazbeik ke kulapaf kazik. Taneon dritik koe Creusot, golde kobara zo gripokoler nume ko Paris ta rokavayara di dimpir. Radimi vayareem gan pisida dene tegivsutesik di zo vogiter nume di gorar da, tuke intafa ilkafa tufa, va ezlopa ektudar. In tiyir 26-daf viele va Stances et Poèmes larma (1865) sanegayar. Bata neva, kudon emuden gan Sainte-Beuve, tiyir davafa kiewatca. Empayan trig zo kotlize negayar. Bata kiewatca noveyer da Sully-Prudhomme va Parnassos reduyun gan Leconte de Lisle dokobar. In va intafa trumara va tazukafa kotunuca bam tulogijayar. Kan Les Solitudes (1869), intafa ezlopa toz tutrakopaweyer. Bata abdikerelera kan sanegara va blokaf kalfrancavaks va De la nature des choses ke Lucretius ruyeweyer. Bak deblamera va Paris, Sully Prudhomme ko Lanis Susikeem ervolita koparintaweyer, vexe fent is cueem is kalirutakseem puon askid va aliziradilfura ke dana keskeem di kotabliron exaksaweyer. Bata bagala ise undekseem va geja tid watsa ke neva sanegayana yoltoe Impressions de Guerre vergumvelt. Inaf grabom ke "trakuropafa ezlopa" kan Les Destins trenar, vexe kan Les Vaines Tendresses (1875) van lodilkafa is lopestakafa ezlopa di abicon dimpir. Azon bokayar va toloya abrotcapafa ezla gokaatoetesa va intafa trakuropafa itaya : La Justice (1878) laninde tir lidafa is seltafa kogrupara ; Le Bonheur (1888) tir lecaf kindap. Rotuvuca is pulvucaja va inaf ara toloya larma : Prisme is La Révolte des Fleurs (1886). Sully Prudhomme ko Francavaf Cultim bak 1881 sollibuyur ise intaf grabom, lize listucaf is trakuropaf is malyeropaf suterot dere volad, kan telo taneafo Nobel Suterotafo Poradro bak 1901 zo sonayar. Bata waksa va redura va ezladro zo vankolayar.

Sully Prudhomme  Blira 1839-1907  Ava Francava  Suterind Ezlopa   Suterot Stances et Poèmes (1865) Les Épreuves (1866) Les Solitudes (1869) Les Destins (1872) La France (1874) Les Vaines Tendresses (1875) Le Zénith (1876) La Justice (1878) Poésie (1888) Le Prisme (1886) Le Bonheur (1888) Épaves (1908)

wp-de:Sully Prudhomme wp-en:Sully Prudhomme wp-eo:Sully Prudhomme wp-es:Suly Prudhomme wp-fr:Sully Prudhomme wp-it:Sully Prudhomme wp-nl:Sully Prudhomme wp-pt:Sully Prudhomme wp-ru:Сюлли-Прюдом wp-sw:Sully Prudhomme wp-tr:Sully Prudhomme