4-eaf luz : Tokdume yona amidafa soka ke Darios kev yon radimifisik ke olgalicusik vani inafa awalkera me kevmadayad
Viele krafiat eke videra va sure olgalicuyuna soka tir lirkkirafa, gan dilizera kaiki awalkera ke Gijaf Alexander zo rogevat. Bat sersik bad abica tanda al vanpiyir feliasik va kotafa Asia voxe riwe fure awalkeyer. Ginaxo va inafa xonukara ape co-impavantayar nume co-kevmadayar ; soe inaf radimifisikeem di lajuslayad ise va bitonaca danesa va intafa bitonuca anton satoleyed.
Icde batcoba co-dulzé da koto grupeno is namidjafo sersaxo, tolamidindon zo bowed : ont gan sersik is yon levetirik pomas gu bowera wetce eldik anton mezanon ok kaxaambon ; ont gan sersik ok yon tremkik gis va ema male savsuca ke zaava volse progera ke nafalik ; dan va soka is pasun bowenikeem kagrupes is tuwavon vadulaf digid.
Koe sersaxo boweno gan sersik is yon levetirik, sersik va logijafa rictela larde varafa soka, in antaf wetce vamoeik zo kagruper, ise ede bowenikeem va kon artan veged, va in wetce eldik ok inaf flibik anton krupter, mu dan va meka ilkafa lotira satoler.
Batugale, ton tula va bata ok bana bowerinda, va Turka is Franca gazaxo rotozwat.
Varafa Turka gan tanaf felisik zo bower, ke dan kot ar turkik tir levetirik, ise dan, solzarteyeson va ginaxo gu konaka kola, va bowesik ronabildan kare intafa aflica isu robetan staksar.
Koe Franca, volson, gazik vanmiae jontik savsazaavaf jiomik batinde kagrupen gan inaf jiomxoikeem isu alban tigir, ise bat jiomik va mozeem wupeiskon merodeswan gan sersik pojad.
Ede va tuwava ke bata toloya bowerinda undet, di wit da olgalicura va turkafo ginaxo co-tir lirkkirafa ; voxe ino olgalicuyuno bam di co-tir drikafo gu videra.
Lirkkiraca gu olgalicura va turkafo ginaxo daner da olgalicusik meviele zo rorozar gan kon zolonik ke bati gazaroti meie levtegison gan tcumivera ke konaktan aname gazik zo djupopomar. Va lazaveem ixam al bazé. Ae, kottan dere tison inaf levetirik, is dere danuson va intafa tufa, figon zo-rogrusper ; ise kore mancoba co-laxutir, dik gunt zo co-goked kire va kone sane me rotarlesid. Acum kontan va Turka co-djumolgalicur gotrakur da katanawes irubasikeem kev int co-tigir ise gan koefa volvura zo goprogenser ise va intaf poeem gozinulamar.
Vexe moi olgalicura is cenyera va gazik koe emakiraf meld ta volrotira va tolaskira va ervolia, kontan va inafa zaava anton wan gokivar, kire bat gazik cenyeyen, metan vides va kona rictela dolge sane zavzar nume zo co-gokivar ; inde tode abdi cenyera mecoba gan bowenikeem zo co-pokoler, milinde moion, kona kivara mea co-zavzar.
Coba tir arapafa koe soka bowena dum Franca. Kolapira tir drikafa kowason va konak zolonik ke gazaxo ; ise kotviele mevaleik pegaf gu warzaca is betara tid ; mantan bazeyenon batdume va kelda ke gazaxo ostik ae rofenkur ise va cenyera rotufakar ; vexe ta azafa giwera olgalicusik va kota argeinda ke battan pomayas is bantan inton ristayan battode satoler.
Batlize, sulara va zaava ke sersik tir dika, kire jontik jiomik gadetes va warzafa volvura kotedje zavzad ; nume larde olgalicusik va kot ke sin me rokeldaskir meie rovilar, ba sokisa katecta va cenyera tazdatar.
Dure ede va tuwava ke bowere ke Darios kruptet, rabatetet da ine va tele ke Turka vektayar : acum Alexander va koto po ke ginaxo gokoalieyer ise va gazik koe tawuk taneon gosurteyer ; vexe moi cenyera is awalkera ke Darios, cenyesik zavzayar aulaf digisik va olgalicuks, yoke yona jinon konediyina danda. Voxe ede inaf radimifisikeem al zavzayar katananaf, kot olkoy va tildera is dreldaceem koeon dere co-pojayar ; kire antaf wiks koe ginaxo tiyid volvura lulana gan sin.
Vexe, koe soka bowena dum Franca, lidaulafa giwera tir rotisa. Va jontika kevmadara sokiyisa kev Roma koe Espana ok Galla ok Ellasa wazdut. Lazava ke batyona tcumivera tiyid jontiko sersaxo tigiso koe batyona coyunta, ise sinafa trakodura liedje trenayar, tiyir klita dem skaltera is guyuca. Enide digisik adim tiyid aulaf, gijarotiuca ke kevfelira ke Roma isu jijacek va namira gosulayad.
Ostik arcoba. Viele, azon, Roma va bat az ban kogejayar, koto pako ten wayar nume mu int digiyir va telo savsafo sersaxo lize tiyir loturestafo ise moi tenutcera va zaava ke inaf sersikeem batvielu ino va mofelira ke Roma anton di grupeyer.
Bettan undeyes va kotbat krafiaks gan drikuca tuke dana koe Asia Alexander giweyer ae mea zo gevatar, is volson gan kuncara ke konak artan, ke tulon Puros, va videra va olgalicuks. Batcoba va deksucapa ke olgalicusik oku deksucama vols amidafa tuwava ke yona olgalicuyusa soka me daneyer.
|
