|
Dakteks va Rokeem ke Ayikya is Wideyikya, gan Olympe de Gouges
Ayikye, grutil malyafe ? Jinya va rin bibé ; va bata roka puon icle me deswatal. Kalil ? Toktan va nafalafa ginuca al zilir enide va jinafa ikra ristal ? Rinafo po ? Rinaf fitceem ? Va proyaf Redusik dizvel ; va tuwava kotote koefil, va bata rinon djuvanfisa, nume va tula ke bato kalstegeso ginaxo zilil, ede eblel.
Va sulemeem tidfil, va reem rupel, va ruxeem vayal, va kota betawera ke grustayan ug kodisukel ; nume yoke denuca dunul viele va mergil pu rin zilí ; aneyal, trasil ise vanmiae mistura va tuwava va ikreem walgrupel, kase rotaskí. Kotlize va kottol va int dojes trasitil, kotlize kottol ta bat volawalkolaf grot belcon tamon dotegir.
Antafe ayikye va nelkot male bata divzawara mu int al vegedur. Abigafe, wiiskafe, nokazenafe gu opa is tittinafe bak bata decemda dem afi is endayuca, koe cuga afanasuca, dolge jinaf ikrikeem kazawayas va kota gruadaca evayon djudirgar ; va Artowara djukupojar ise va rokeem ta miltuca moimaxur enide va mekara coba di kalir.
Dakteks va Rokeem ke Ayikya is Wideyikya
Gokexitin gan Vedeyafa Koka bal tana ironokafa fruga ok tana ke diref krinarugal.
Abdipulviks
Gadikyeem is nazbeikyeem is berikyeem, kaatoesik va vedey, erud da ton vedeyafa koka di zo tadled. Torigis da megrupesuca is vulkura is vligura va rokeem ke ayikya tid tela antafa lazava ke sanef volkalaceem is avonawera ke kote bowere, kan fawokaf dakteks va volroripindan is tumtaf tuwavarokeem ke ayikya al djukukonedid, enide bat dakteks kotedje anoelaf gu kotak ke seltikeem va inaf rokeem isu gonieem elupkon tusetikesar ; enide koti tegi ke roti ke ayikyeem is koti teli ke ayikyeeem loon zo tarkad kire sini gu mukot ke kot gaderopaf kizey kotgemelton zo rodoluneted ; enide imaxura ke wideyikya, batvielu rigavana gu yon opelaf is merotaklen nelkot, va sura va Tadlemwa is lidanyeem is kaluca ke kottan kotviele mukotad.
Acum, ikrikeem vamoef gu listuca lidam takreluca yoke gadikyafa mejera, kagruper ise dakter, leve Ilamik isu vey, va porfef Rokeem ke Ayikya is Wideyikya.
I-eaf teliz
Ayikya koblir nuyafa aze zavzar miltafa gu ayikye luxe rokeem. Dofa favluca va seltafa waltrakura anton mbi rorigavar.
II-eaf teliz
Mukot ke kota gaderopafa gesia tir videra va tuwavaf is volrosavsuten rokeem ke Ayikya is Ayikye : bata roka tid nuyuca is pilkuca is musuca is nelkon acagira va ristara.
III-eaf teliz
Nelkot ke kota nafaluca koe Vedey benelon tigir, koe Vedey anton tis katanara va Ayikya is Ayikye : mek dreem, mek olkik, va rictula ariekon metisa vey in roksuber.
IV-eaf teliz
Nuyuca is malyerot va dimzilira va kotcoba ke artan nited ; batinde ksubera va tuwavarokeem ke ayikya gan tcakena gronafa kalstegera ke ayikye anton zo levkimar ; bata kimara gan mweem ke tuwava is ova zo gofabdud.
V-eaf teliz
Mweem ke tuwava is ova va kota tegira dasafa gu selt kalpoud : kotcoba merojuna gan bat proyaf is loraf mweem me zo roweyonar, nume metan va inon memobenplekuna coba zo ronovaskir.
VI-eaf teliz
Mwa gotir muxara ke jadifa kuranira ; kota Wideyikya isu Wideyikye va inafa tazukara ilkon ok kan intyon kaatoesik gobodad ; gotir mila tove kottan : kota Wideyikya tisa miltafa sedme ina isu Wideyikye milton zo gotid rodosten gu kota bagaliaca iku sanefa runda iku une kare intaf grupaskireem iku ceakaceem iku fitceem.
VII-eaf teliz
Meka ayikya zo divzawar ; sedme lan tod gotun gam Mwa zo buntur ike zo soper ike zo kagir. Ayikya lidam ayikye va bata febafa Mwa koveged.
VIII-eaf teliz
Mwa va yona febon is denon adrafa gakera anton gonexoner, nume kontan nope anton mwa exoneyena is riguyuna abdi fugara is rewon moplekuna pu ayikya zo ropursar.
IX-eaf teliz
Kona ayikya dakteyena da tir gunafa ; bam Mwa va kotafa febuca ksuber.
X-eaf teliz
Metan yoke kona intafa trakula, rigotafa oku me, me zo gonarger ; ayikya zo ronokumbar ; va Rijna dere ronotidlanir ; wari inafa exaksara va sanefa vura exonena gan Mwa me skalted.
XI-eaf teliz
Nuyafa golera va trakura ik trakula tir tana lotciamafa roka ke ayikya, larde bata nuyaca va mweduca ke gadikye tove nazbeikeem ravaldar. Acum kota wideyikya nuyon rokalir djam Tí gadikya ke nazbeik va rinye tikis djamae, teka va ageltuca golde nartaf abdimalyeks gonopreyutar ; vaxede sedme mwon gotuyun todeem va rofavera va bata nuyaca gonodulzoer.
XII-eaf teliz
Ozera va rokeem ke Ayikya is Wideyika va gijotafa favlaca kucilar ; bata ozera joke kottan vols pilkotaf dulap ke odiambik zo gokizer.
XIII-eaf teliz
Ta kiewagira va sanepo is risturixalareem, webera ke ayikya va tela ke ayikye gomiltar ; inya va kota yega isu portaf lag paker ; batdume va anamzilira va runda ik une ik poraca ik kobavera milinde gopaker.
XIV-eaf teliz
Kota Wideyikya isu Wideyikye va olegara va sanefa webera miv ok kan kon intaf kaatoesik ronorabater. Wideyikya, anton dosteganon gu miltafa pakara va osk tufa voxosk sanefa ristura is gotura va masiz ke koaykara isu razeka isu jijacek, royoter.
XV-eaf teliz
Ayikyeem va int dotanas ta webera va tela ke ayikyeeem, va kot sanef askisik icde inafa ristura ronofabur.
XVI-eaf teliz
Kot selt, lize ozera va rokeem me zo ravaldar meie rotisolparsara zo gotur, va meka tadlemwa dadir ; tadlemwa tir mekafa tode lo korik vas Vedey va sutelara me al dotegid.
XVII-eaf teliz
Pilkaca tid ke toloy belcaf ikrikeem ok tanoy ; tove kot va roka aykad tode sanefa olegara, mwedon rabatena, denon diner, is krede malyafa is abdilafa stemokara.
Radimipulviks
Ayikya, divmodel ! biota va ova koe varafe tame mamar ; va intaf rokeem kagrupel ! Gijarotifa ginuca ke tuwava vanmiae abdimalyeks ik ukuca ik broya ik rotuxara mea tigir. Teyok va ageltuca va kot fitulaf ik stibes rujod al tekar. Levetirafe ayikye va intafo po al jonkar, ta busumempara va rinafo po al gokucilar. Tunuyaweyese, tove dositikya al tumemalyawer. Ey ayikya ! Ayikya, tokviele ten tic mewisa ? Va tokyon gunt remi Artowara al kayestac ? Va lopofa vligura, va lomurobana ikudara. Remi yona avonarafa decemda, va axuca ke ayikye anton gazayad. Winafa ginuca al zo vilar ; tokcoba kle zavzar ke win ? Minia va memalyaceem ke ayikye. Imaxura va winafa gadakiewega, rigavayana gan proyaf kexieem ke tuwava ; va tokcoba gu mana bokaranya co-cubec ? Va ewanya ke Mwasik ke « Kurera koe Kana » ? Kas crakec da minaf francaf mwasik, tuwadasik va bata lida slikedje bene yona gama ke gaderopa vox mea cavafa, pu win di tolkalic : « Ayikya, toka doaca wal win is cin tir ? ». « Kotcoba » co-godulzec.
Ede, golde intafa axuca, sin mingad ise volnope intaf nelkoteem va bata afra wan plekud : va ovapo gu yona giopafa vamoefa espura takrelon tcakec ; lev prolk ke trakopa va sint katanac ; va fapa ke intafa anda vokec, nume va batyone intotcikye, va me levetirotaf sontesik teriges tite win vols oklafe gu walzilira va jweem ke Ilamik do win, fure witic. Gu bet kevun karniz va int rovetunuyac ; fiste djukutunuyac. Va mayakafa trutca va winafa abdifa tira koe selt dure rindet ; nume larde vedeyafa gaara ale re tir, wit kase minaf proyaf mwasik va gaara va ayikya galon trakutud.
Ayikya va rotuca loote dam kiewuca al askid. Stegera is palsera al tid ke sina. Coba kigdeyesa gan po, gan beya al zo dimzilir, ise mecoba acagiyir. Jiva is azil, kotcoba tiyir levplekunafa gu sina ; sina va gomil lidam ceakuca dirgayad. Francafe bowere, moekote, va mielafa ristura ke ayikya rupteyer ; kev inafa metixoluca ilput va meka birga videyer : perma ik dirgareba ik elda ik taneatireba ik papeba ik eteba, sopron kotcoba adalasa va akoyduca ke ayikye, tirbafa ok tumtafa, kotcoba gan warkuca is bitonuca ke bat ikrikeem zo levplekuyur, ke dare govligun vox tarkan, vox mali artowara gotarkan vox vligun.
|
