NyagaceemScapin Nakileem02 Nakila05
Toleaf nakileem, alubeafa nakila[modifier]Scapin : Ine veotar. Argante : Mana vanyeraja, mana krafiaransa ! In va mana vilteraja al iper ! Ax, ax, man eskarnaf jotik ! Scapin : Weltik, rinaf zanisik. Argante : Va Scapin, kiavá. Scapin : Va arienta ke nazbeikye modoval. Argante : Welidá da ina va jin nigesipir. Scapin : Weltik, blira tir kotrafa gu remok. Acum kottode gonegadat ; ostik valevion, va batvielu setiken kaliks ke savsik, al gildé. Argante : Va tokcoba ? Scapin : Zobe yasagadikye ezeon al gracar, pune va intafa endayuca icde kota mibafa walta rodaskina gan intafa dimpira gonuner nume roguzekar : va anteyayana mona ik dubieyena erba ik awalkeyes kurenik ik basbewayane nazbeikye ik brostayana nazbeikya ; nume ede meka batcoba al sokir, pune ine va falanya gogrewar. Luxe jin, va bat trakopamaf taveks kotviele ksubé ; ise dimdenlanison va oga, va zidera ke feliik ik vorcera ik lutsagara ik nugara ben dey ik peyara ik ustara djuprolevgá ; ise icde mancoba me sokiyisa, va balinyi al kavá. Argante : Acke. Vexe bata eskarnafa abdikurera volsafa gu bana jinon djumaskina, batse koncoba romejena, nume va aluteik su rupé enide volmiv di kojoá. Scapin : Folixé ! Weltik, ede va jin terektal, va arienta arkane fu lavanvul. Grupel inde bet jiz batlize gidilizer nume ape va int divulon fu koamnal. Argante : Ovel, efe. Voxe tokara joya ? Scapin : Va tanoya nuve al trasí. Jinafa forendara va rinafa nigera rekielon al vebar da va kon mergil koe taka aneyá enide va rin di tumeguyá ; lecen va kone telafe yasagadikye nigesine gan nazbeik me rowí kire zo sokonté ; ise, kotugale, til manon luntapaf gu jin. Argante : Tí rinaf vebanik. Scapin : Batdume va berikye ke bata abdikurenikya al kevlaní. Ine tir tanbat ebabudik, tanbat dugusik anton gimopulvis va remrura is dis va jiluca fixason va vor vas galemacek lodam atara va olkik. Va bata abdikurera gu ine al keyaksé, va drikuca ke tizafa rekiera ta vaon kojoara al nedí, is va dere rinaf mozeem wetce gadikye is surimara ke rinafa erba isu nikeem sedme malyerot is roka. Kotliz al tacepé eke ine va jinyona dragera adim al malterektar enide arienta ika itayacka di zo tenekar ; nume ine va kojoara va abdikurera fineter wari va erba al zilitil. Argante : Nume va tokcoba ine al erur ? Scapin : Ox ! Taneon, va ikadineks lodroe mona vodar. Argante : Azon ? Scapin : Va konaka vrostagaca. Argante : Is dere ? Scapin : Va alub-decemoy ok tev-decemoy erbolkam icle ikadineyer. Argante : Alub-decemoya ok tev-decemoya keftakola va ine atad ! Kas nuler ? Scapin : Batinde al kalí. Va manyona dragera al ilikatcú ise al askipí da gildar da gu erura va alub- decemoy ok tev-decemoy erbolkam me zo ortatal. Tere, arti konaka dewitca, batse daneks ke cinafa dokalira. « Fiste den ervolia fure gomallakí. Va int gorabandé nume erbolegara askir da, nekev int, va kona drageracka co-finé. Va zanokol olegá voxe ika ledroe tev-sanoy erbolkam va kon wadamaf me djupotrasí. » Argante : Ae kle ! Ika tev-sanoy erbolkam, vaon zilí. Scapin : « Va wast is westeem dere olegá ; ise ika ware tol-sanoy erbolkam. » Argante : Tol-sanoy erbolkam is tev-sanoy, dum anyust-sanoy. Scapin : Efe. Argante : Jontikdroe ; voxe ae, finé. Scapin : « Va okol tori jinaf zanisik ostik olegá, ika icle bar-sanoy erbolkam. » Argante : Maninde, fotce ! Rogozar ! Ine va mecoba seotatar. Scapin : Weltik. Argante : Me, ine ebledjik. Scapin : Djumel da inaf zanisik lanir ? Argante : Lakir oke lanir inde djumeter ! Ise feliik dere ! Scapin : Lorik ! Weltik, lente mana abiccoba me vukil ! Me fu alutal, bliké, ise va kotcoba zilil enide gu nubeem ke malyerot di zo giwal ! Argante : Kle, ae ! Va bat bar-sanoy erbolkam ware djuprozilí. Scapin : « Va astokol ta burera dere olegá… »~ al kalir. Argante : Ox ! Den oretlik moe astokol lakir ! Slikcoba ! Nume lent malyesik fitiv. Scapin : Vay, weltik… Argante : Me, batinde askití. Scapin : Weltik, va astokolam. Argante : Va mek astolam dace co-zilí. Scapin : Torigil… Argante : Me ! Abdualbá da alutatá. Scapin : Ex ! Weltik, va tokcoba pulvil, ise va tokcoba goral ? Va rimekeem ke malyerot kodisukel ! Wil ote va sperantara ik malyeroteka ik toktesa diotexa goskutul ! Tokote va mempes sulemik goyanetel : batultik ik koridasik ik aluteik ik tegivsutesik ik malyerotik ik munestesik ik malyesik ik erkeyik. Betbat korik ika lancoba va tela lokiewafa roka ke tamava tire djuproyolkasir ? Kon batultik va rolaf buntus tegiv atoeter kane di zo lanzatal teka grupetel. Koridasik do kevelik gildutur ise ika davafa erbanya va rin doleter. Rinaf aluteik, milinde, ba alutara va buntura me tigitir, oke va stugdusa dusivaja anton kalitir, mezomeson va mukot. Tegivsutesik arbe amtura kev rin restalitir ike yardutur. Tcokesik va koridasik va olkotca levokseter, ike koridasik va wiks dace me kalitir. Ise viele, cugkane xelkayason, va batcoba al ruutul, zo stuiketel da malyesik kev rin al zo yaneted, gan ont kon abidik ont kona intafa renanikya. Ex ! Weltik, ede royatel, va bato kusto ilfil ! Alutara tir nayara div tamava ; ise antafa trakura va jiz, va jin kal India co-royatesir. Argante : Tokdroe ine va astokol uldiner ? Scapin : Weltik, ika astokol is toloy okol is wast is westeem, ise dere enide in va bozama pu vistalesik di rokaldoder, va tol-decemoy erbolkam koton erur. Argante : Va tol-decemoy erbolkam ? Scapin : Gue. Argante, ~ zideson gozason kene wenyaxe ~: Benje, tetce, alutatá. Scapin : Undel !… Argante : Alutatá ! Scapin : Va int me ipel !… Argante : Djumalutá. Scapin : Vexe, ta alutara, va erba olegatal : ta buntus tegiv ; ta ikarictara, ta atoera is pirdara is warzera is kobara ke koridasik ; ta rupera va aluteik is alutara, ta roka va tioltera va eyelt, is kot ksudaks va tegivsuteks ; ta munesteks ke tcokesik olegatal, ta awolba ba zoltera ; ta kovertera ke tegivsutesik is viroyareem is restalieem is yardukseem, ta stujereem is sugdareem is lanireem ke tcokesik, volkare kot gonaskitin siabeks. Va bata erba pu battan zilil, batkane titil divargeyen. Argante : Tokkane, va tol-decemoy erbolkam ? Scapin : En, kevwatal. Va oyakeem ke malyerot al miv patavacká ; nume naavdá da zilison va tol-decemoy erbolkam pu battan, ika le decem-alub-sanoy va arak seotatal, a megan viunsureem isu tegireem isu nigera. Kore fitulaca anamkalina gan jontik ikoraf aluteik zo co-gobosolad, va zilira va bar-san-decemoy erbolkam lodam alutara co-abdualbá. Argante : Va batcoba nulé ise va kot aluteik gu rotakalira va jin budá. Scapin : Askitil inde djumetel ; vexe ika rin, va bet jiz co-ilfí. Argante : Va tol-decemoy erbolkam me zilití. Scapin : Batse icdeik. |
| |||||||||||||||||||||||||||||||||||||||
 Toleaf nakileem |
