Djemila
Djemila
DjemilaAwalt va teyka mo miduckuna taya kopler, nume kimtaf levetirik kobas, kugdan gan usta ke susik is cepites is ciondan is anteyan, koe kusto en fogetigid. Yikye moekote, kapafe eke co-bevular ayikya, nutir kuncayarsane is fu awalkes. Aze levgon yolkar, inaf batakaf nubeem va gamiafi tresiki divgir, aze boregason mo sid ins luber. Ton madana usta, enintesik iper ; vexe kontan pokolakis va vawa, va in ginukon iegason azavzar. Bat kontan, tir ayikya, listarsafa, dem oklafa is felisa tiva, nuve ronodirgasa. Italkiskon lakir, dem kulaf ayikyemef aboz, ise va falpeyen zelt dadeon diskir ; rundanyan okol tir cuisaf, ontinaf is yinaxadiskaf, dem divulafa kseva ke guazafa moava, ilamton afton is orikon tcazedawes. — Tokcoba dilizer, icde bat gralombenik ? ~ erur. — In borer, sersik, lodame gokobar, vexe refema ke jinafa usta va inaf iteem fu bosolad. — Vakolaj, ~ kle me wil da in al krezer ? Banliz, izgon ic batyon aal, volmiv burel !! Ise ina kan nagotsa va mikacidom bazer liz lakir. Re, yikye moe preimaf tawarn tulwon senyer, poke voama otcesa vanmia batakafe ye. Listaf okol dem moavayaf im, gunuyan, va gamotsa grutcion bugdadar. Sersikya va int mosidar ; tannubon altogison va aalulim, xowar ise va levetirik men gire itafenkus kontenon nyaser. Gralombenik tir itabudenaf ; inaf paurayapeem ware kotraf gu ikuza, dum gojafa gila, moe zwaf tcoreem sayakiramaf dum tel ke rumeik, aykawer ; kranavaf soaks va art izgan gu sayama malker ; furove moe jo mardkoron traspur, dum muvabelaxa pumasa va trilnaxanya. — Ax ! In mempesarsaf ! ~ yikya prejar, ~ va inafa skaltera va jin me co-cené. Pesté da kaxe vanpí levetirik ke bat gralombenik. Va in dun disuker nume vol govogrikrezesir. Ba lana repalera, va in wori djukugreler ; pumason va vendayotsa ko lava, va inaf ozdeeem trigayer, aze, larde in va ulira pudamon erur, ina va vim nubabelcason askir liz in va kotafa lava kofigana bene bat pibaf cot pegon ulir. In ten krezer aze va lujaf iteem vanon ayewas kalon akoyenon disuker ; va vuskaf vim kagir, kan kutceem santar, kutcason bosolar. — Fuda moi kusto ! ~ prejar, ~ kas til lorafa listapikya divbureyesa va jinafa gloga ? — Awalkolackik poke rin tigir, vexe rotir giwatar. Tí Djemila, nazbeik ke Tugrul, i ke okilik ke Türkmen sane bowes va cenesa ervolia xultuyusa va tela rinafa. Viele gralombenikafa roda kabduo broca al farur, va rin lodam betar al katcalá nume jinafa takra gan rin forendason zo konteyer. Batvielu, gire al lawí, nume konakviele al wí ; ware revielon, koe azeka remi yon anteyas bartiv krabeyé kire va rin modovayá ise djunendayá. Terektason va batyona ewa, yikye daavon ve skotcotar ; madigimir aze, pok Djemila debanyayasa mo fedaf werd, badenyar. — Ax ! Sersikya ! ~ diviegar, ~ va rin dere al wiyí. Rem kinokafa is volpokolesa ikuzara wizusa va jinaf iteem, al awil, dum bitej otces vanmiae grenyaf suray, ise setikera va rinafa listuca va bakara gu levetirikafa kranavera loplekuyur. — Va rin modovayal ? Kas mancoba en tir ? — Ede co-grupeyé da rinafa disukera va int mo jin al aykayar, bata trakura co-tiyir medra ta kota ekena nakera va jin. — Ugal va min xuvar, ~ Djemila kontepenon kalir, ~ pu jin tavel : toktan til, tok rinaf yolt, tok rinafa ema ? — Tí Neriman-Bey, nazbeik ke Maxmud-Xan, i tcumpaf nutik ke Sanjar nafalik. Maxmud, grupel, va nafalik skotcasiyir, i va ucules va guzekara ke in. Va in il Farsa divbliyir, ise, ta tuaulara va nafalik, gadikye va kota gejura kopouyur. Puvefa is jorafa blira, ilamtafa, dene aboyikeem ant gazayar. Kotafizon gitcabaneyev, moe noldukaf okol do balem-decemoy vakol dem moavakiraf is akakiraf flek ; kotsielon, koe koafina berma belcon durguyuv, ise vanmiae dolpa is stute, tela lolistafa levetirikya va cin tuizkayad. Vexe Sanjar nafalik va jin abreyer, den intaf bermikeem rozayar ise va jin gu santa is yal adoneyer. Kaxe ! geja ve sokiyir, nume va brinuga gopakeyé. Bata egalepon jiadaweyer, nume, udutapon tulevetirayan, moi enlistafa blira, va xonukara anton djuprokeyé. — Lorik tir gijaf ! ~ Djemila diviegar, ~ til ke ema miltafa gu jinafa, nume va rin memalaytcuson ronorená, beka lieke co-rená kore co-til tel lodulkaf ayik ! Golde surtera mea borel !! Kas tanoy somecenen gradilik tir ? Ede va jinafa renara walzilil, pune belcon yatetet aze den lamone ke rinafe gadafe sersikye lakitit ise titil jinaf yerumanik. — Tela xakapa kle tiyir tuvel ke keltafa kalaca ? ~ yikye kalir, mason va plaxafa fonta ke Djemila ;~ otcet, zavzagit, xabe !! Rinafa renara va ribiegaf leltor mu jin askir, nume tití volrobakan gu kota mejera ke kotar dam rin. — Ageltafa, Neriman sersik, va rin renal ? ~ ina kalir, santason va ebeltafa is pibafa kenda ke gralombenik, ~ va pluktafa blira tiyisa rinafa koe berma ke Maxmud-Xan mu jin co-kalebgal ? Batlize, blira tir loon figafa, Türkmen sane kan gejavefara anton deasewer, tanoya tapega tir buduca ; vexe va rin gu zidera ke jinafe gadikye me djukeunisí : ine co-tir merowidlane, ise, ede va minafa renara co-uculer, pune va rin volmiv co-bastakar. — Ede va min co-onser, pune co-xonukatat, ~ Neriman kalir, ranyason is tuzwawemeson. — Ax ! Pune do rin co-awalketé ! — Co-awalket ! ~ in kalir, skeuson licason va ina mo takra, ~ solve minaf kutceem va somepuskena kaluca men al rodrumnid ! Drasura va bli, loxe, volse drasura va rena, man kranav ! — Blitit, ~ ina sustepeson kalir, ~ va rin remielon tunuyatá, otcetet !! Vozeson ampuson, va okol gin rundanyar aze va Neriman sersik pok gralombenikaf arak dimstar. — In riwe al awalker, ~ pu susik kalir, ~ lasetikel, diretomon, da levetirik tir tana minafa kulaca, ise xonukasira va tanoy tir dubiera va rinaf feliik !! Tugrul moe okol pokolakir ; vukir enide va nazbeik di malterektar : — Nope Allax ! ~ pu ina iegar, ~ va man bondeem me dwil !! Volnik vaon dafutud loote minafo jaftolxo rogid. — Ageltafa, ~ Djemila brunon ieson kalir, ~ ison diremeldon va varafa milkava miv govegralomé. Tixuleson yater solve gadikye kakdisuker, oklafe wison da ina tir pofa is oblifa lion dam tele intafe budafe nazbeikye. Nubema ko takra va barksusik al komodar. Djemila valevo yona orikafa galza is remo yon vwepaf plor va fertik nyaper ; va gandipisa takra ke yikye gilder. — Va mecoba kival, kotcoba keniber, ~ kalir, santason kan kutcotsa va inafa oblaka. Miel tir bitejkiraf vox taeliskaf ; orikansaf sedme toloy otcesik. Krizeem ke okol gu kolpa ke tcalist belkusisa va boralor al zo anamplekud ; reme widava, remi kunoya crakera, okol kan fexa vion zo stad ; azon moe milost sin va rijust voldaneyason tcepason vumbed. Arti loon tanoy bartiv ke bata oviskafa vultera, vukid enide di gaeloyed. — Nuyaf ! Nuyaf ! ~ Neriman diviegar, plukton gelavason va fedaf gael ke miel. ~ Ey jinaf sersik, maneke blira tir listafa kabdue min, anton daava ik puve ik rena ; tit feliik ke tamava ! — Me, ~ Djemila kalir, ton nuba altogisa va kurd ke okol dimexowason is bemuon oblakasotceson. — Tokcoba tir ? — Zo onset ! — Klokel, renanya, cugaf amlit va miel gazar. — Va yon okolik… Gildé, sin koo azeka talad, dum sure ; tid jinafe berikye, ape. — Otcet !! ~ Neriman kalir, nagason va okol. Jontikedje, jontikedje, batinde vulted, in lidixaf, ina vumeltafa is kalobrasa is kadimon disukepesa. — Vukit !! ~ ina adim kalir, ~ gokoaliet. — Otcet !! Otcet !! ~ yikye iegar. Vexe ina kabdufir aze va inaf okol ben fexa narir. — Terektal !! ~ kalir, ~ tanoy kevelik va min fu kallakit, Axmet jinafe taneafe berikye. Inafa rundanyana okolya tir a kevlik moe tawava, edgabia me rodekadimetalar, ina va suka kaiklakir. Vexe minaf okol, tis inaf oc, va kota onsera vols ina robudad. Jinare berikye valevion al zo solumad, re tit kaike sinafa uzara. Axmet ant en vanlakipir, me rodivvawat, va in rovoket. Okol, bat az ban, daavon ve ied. — Sin va gadikya su kagruped, ~ Djemila kalir. Aze lent okolik tigis artu mon tol-sanoy metrolk iper. — Va jin ten onsel, oke doaliel !! ~ iegar, malimpason va abalt. — Mewerkikya ! Kinokik ke minaf grelt ! ~ Axmet iegar, ~ va rinafa gomilara vugdal, oke va krizaf fertik zurtel aze dimlakil edje ugal wan tir !! — Leon pulvil, voxe va fortey !! ~ Djemila kalir, blion dilfuson. Mantaf imiz va sint vordavad, lupud, yozdakabuson koe miel, okol astolewed ise welved, anamplekun gu anamon wibra dem furove dum rujod. Berikye is berikya tid milton budafa isu pofa, voxe ina tir lotuzafa is loplaxafa. — Jastrik ! ~ Axmet levgon iegar, pestaleson da okol leveon fazder. — Va fortey ke berik me al djumalplé, ~ Djemila kalir, ~ mea rotonsel, anton kiewaxe ! — Rotapsara ke gadikye is berikyeeem va rin kralir !! Vexe toloy fertik ixam ilon tigid, giwan, batviele nuyaf. Kagaelad, aze fure va okol avlasid. Neriman va dositik vanlanir, kan ma va fonta mar, va kutcara djuseotar. Djemila vion dimplatir, izga faluna gan mielizga moe inafo jo tigir, inaf listaf paurayeem kev iteem omawer. — Kas va nyukik co-rená ? ~ ina kan roatalena puda kalir ; ~ tokdume, viele lyumayá, vadimeon al zavzagil, mekolyumason ? — Ox ! renanya, ~ sersikye uculeson dulzer, ~ kas dene Türkmen sane orpa tir lyumara sotre toloy kev tanoy ? Va jin al kabdufil nume keyé kase co-tuaxaweyel, pune va siluk co-narayá. Disukeson va rin lyumas, jinafa takra intotcon gandiyir ; va jin gu rinafo gradilafo po skebuyul, rin dem listuca levrotiyisa va jin. — Rinafa dirnura va jinafa tructuca derber, ixel da va rin al rotuldiné !? — Va rin ixé, ika bata kutcara vewayana. — Naril, ~ ina kalir. Sin va vafo is stezafo aalxo faluso va sinafa conyuta kallakid. Batlize, kuncanaf, va int mosidad aze ta tilderama keri afizara senyad. Djukrodoecked voxe moda va sinafa kuranira xultur nume komodeped. Neriman sersik gan eaftafe ie levgon zo divmodar. Madagir, aze afiztoza va kovudasa is turaporasa disukexa pu in nedir. Gulalumkirafe perake, dem soakseem gamagamon tazukas ginca is impadimawes ton rukomap moe sid, va nimateem ke Djemila ko fenkuwepesa gariza al vangir aze va ina vion gelavar. Nekev ekena mejera, i nekev mayakaf is titickaf is gutiskaf iteem pokuon flexas mo ina va yambafa disukera, koe bata virnafa debala, gradilaf yik va wontuca lajuvider. — Va abalt malimpal, ~ pu Neriman kalir, ~ aze va taka gu alto solparsal !! Yikye, paokafe, ton broewes usuk, mekon zekal. — Wickil da meke wupe kev rin tir ! ~ ina iegar. Ine talgermitar, nimateem skotcar ; ine va runda me bulur. — Icle, va abalt pu jin kabul, va int fu lakevrojú !! Ine fazder, poiskafe. Bam Djemila va boikersena is vligusa disukera pu in stakser, inaf art kranavon malkewer. — Ey ! Va kinokuca ! va kinokuca ! Va tele lonyukafe ayikye albayá, mu ine va gadikye is grelt al relmé, va berikye al lyumá, va int al volporá ! Div jinafa takra ! Tisik parodjapaf loon dam dibla ! Xonukason tí kalaf kire va int gu rin tunuyá. Ax ! Alto ke bata rostaza wetce naboxa kunon vodar lodame wal rinaf meem co-kenibé ! Aze, preyutason va gexata ko nubeem, Djemila va int pu perake jovler. Ine fure koton koartokar. |
| |||||||||||||||||||||||||||||||||||||||
