« Kotviele rumeikany awalker, pumkik ke Lorik mo Tawava titfir, ko meem va awalkaf velik narir, wiltfenkupur, va koto xo albayano gan rumeik koofir, ise va nubacek dem imwa yestar. Kottol va batyona imwa pu Lorik burer enide in di askir da sin lolistaf dam moe Tawava gire tideon imweted. Lorikany keve takra va yona imwa xuvar ise va kutcara mo tela abdualbana aykar. Bata kutcara va puda askir nume in vanmia tama ke volkalikeem va int aotcer. »
Tir rupa pwadena gan pumkik ke Lorik divbureson ko kelt va awalkaf velik, ise rumeik dum klokeson va in kevterektayar. Aze vamoo yono xo lize velik al vefayar, vamoo yona matela dem mafelafa imwa sin talayad.
― Va tokyona ta taplekura koe kelt divburetet ? ~ pumkik eruyur.
Cuisaf raltaal pokeon tigiyir vexe trukafa nuba va colk al empayar inde geiltkirapafa divatoawemesa gama rumkaweyed ise kotlizu turodaweyed.
― Volkalaf aal, ~ velik kaliyir ; ~ va in naril enide tideon poke Lorik in gire imweter.
Nume pumkik va raltaal nariyir. Va velik dabluyur ; rumeik itafenkumuyur. Sin va yona kulafa imwa, don fereon ikudano tciugo is auma, kotlize di yestayad
― Va uma imwa dure dit, ~ velik kaliyir, ~ aze sporoyason sugdalayar, vexe van Lorik men di talayad.
Ixam mielayar, kotlize amlitap gazayar ; va orikafa is nilafa vawilama dem jontika guazafa bapla isu guboy isu tsenteks vamootalayad. Tiyir viel ke divsokera ; batyona empanafa razeka isu girodafi kudjaki isu batyona florma va meplinafa wira jontikote nediyid.
Aze pumkik pu velik vanmiae batyon empaks va konaki imwakki nediyir ; kuiva ke tawa al iliksantuweyer, beneon zae ke omuweyesa is tudoritayana imwapa ke taya wan giyid.
― Va in divburet, ~ pumkik kaliyir ; ~ tidtalason va dume kalití.
Sin ko rid tidtalayad, aze pumkik batinde negayar :
― Banlize, koe bata orikafa vawila, koe fukinda, akoles kimtaf velikam zavzoteyer. Mali taneaf rumeugal, koe ilava senyeyer. Konakviele pesteyer logalaf, kan kedeem va mawa anamelaniyir, me loon. Bak idulugal, awaltolya va bata kimtafa vreda tomatomon afiayad, nume velikam tuke awalt va int tuidalayar ise va keraf fortey koo intaf geldelaf is remawis gelteem disukeyer, kalison : « Re, va Lorik grewá, rodedivlaní. » Va kusanyuca ke aalxo kan tajdagama vanbureyena gan nazbeik ke vegungik anton grupeyer. Va bata gama vamoe taka giyir nume vleve aalap do dadofa awaltara is lexa ke barafa dankara ke decitoyi zverimi batinde nutildeweyer.
Konviele bak nazbalarugal, nazbeik ke vegungik va konaka tayimwa pu in dere vanbureyer ; tana, xuyavon, va zaeeem wan diyir. Ko furutsa zo taplekuyur aze mo dilk poke ilava zo aykayar. Taplekuyuna gan fikuntafa nuba, va yona banga askiyir, aze va yona warzafa imwa kotilanon warzeyer. Tiyir matela ke akoles velik, inafa antafa jwa moe bata tawava ; in rustoleyer, ropeson miduyur ise kotviele aykayar maninde in va meka awaltolya remo krintala drasuyur. Acum imwa vopeweyer ise do inaf klokeem tulistaweyer ; mu in imweyer ise va kofiga anamgimayar ise va yona ekoltafa siva monediyir. Viele Lorikany van in va velik ve dimrozayar, in abdi awalkera van imwa blagaweyer. Weti tanda velik dene Lorik re tigir, nume mali tanda imwa moe dilk al zo vulkuyur nume al turodaweyer. Bak viel ke divsokera, vanmia dorita ke vawila, al zo mimayar, ise va batse bata omunafa imwaja ko minafe tsenke al kayestat, kire va loa daava lodam tela lokulafa imwa ke gazafa matela al lazavayar.
― Vexe tokkane va kota batcoba grupel ? ~ velik eruyur.
― Grupé, ~ pumkik dulzeyer, ~ kire tiyí bat akoles velikam lanis kan kedeem. Va jinafa imwa en kagrupé.
Ise velik, itafenkupuson, va sizuntasa is ilamtafa gexata ke pumkik disukeyer. Milviele, sin va kelt ke Lorik kofiyid lize daava is kaluca tid kruldesafa. Viele Lorikany va awalkaf velik keve takra al xuvayar, va wilteem dum mu ban pumkik tuatrisayar, ise kottol va sint nubagison belcon tidtalayad. Lorikany keve takra va kota imwa dere licayar, vexe pu omunafa tayimwaja kutcayar, nume in vere tiyir nugakiraf aze do pumkikeem anamefis va Lorik ton yonu ivamu kale tamenaav dankayar, ise kot tisik lion tiyir kalaf. Ae sin dankayad, milgik lidam velik, kumzilin pintikany lidam tayimwaja mimayana omunafa vanmia dorita, koe orikafa is nilafa vawilama.
