Dewitca ke Seattle okilik
pu Isaac Stevens bowesik
|
Mana rieta sedme cin nutir divulafa. Larde va feduca ke gael is jowikara ke lava somedigiv, pune tokkane va sina rolustec ? Koti ki ke bat siday sotir baerdafi gu jinafe sane. Kota afigasa pailtegatoa, is kota bixefa domega, is kota brakolpa koe orikafi mikaci, is kota senta, is kota bezafa felkura koe namira is bagala ke jinafe sane sotid baerdafa. Jaxipa traspusa koe aal va namiks ke kerik soremburer. Awalkik ke batakikeem va intafo vo sovulkud viele va bitej vanmiaotalad. Cinaf awalkik va bat cuisaf siday somevulkud lecen in sotir gadik ke kerikeem. Tiv sidayki nume in tir koe cin. Kofigafa imwa sotir cinafa berikya ; wocol is okol is kiizap sotid cinafe berikye. Pistxed is tcavo koe werdxo is idul ke okolam is ayik, kotbat va mila yasa sopasur. Acum, viele Okilapik ke Washington volmiv kalir da va cinaf siday djuluster, pune pu cin erursur. Okilapik volmiv kalir da va kono xo mu cin ickrileter inde vanmiaeon erodon di roblitiv. Titir cinafe gadikye nume titiv inyon nazbeik. Batdume va rinafa djulustera va cinaf siday krafiav. Vexe mancoba me titir drikafa. Lecen bat siday sotir baerdaf. Bata jowikasa lava traspusa koo voa ik kuksa me anton tir lava vols dere fortey ke abdigadikeem. Ede va sidayki pu win dolev, pune gosetikec da in tir baerdaf ise kota utsalafa tcazedara ko aftafa lava ke uzda va yona bifa ke blira ke jinafe sane isu namiks sopulvir. Prejara ke lava sotir puda ke gadikye ke jinafe gadikye. Kota kuksa sotir berik, va cin grisiputer. Kuksa va cinyon witkot soburer ise va cinaf nazbeikeem sosinkar. Ede va cinaf siday pu win dolev, pune gosetikec ise pu winaf nazbeikeem di gotavec da kota voa sotir minafe berikye, ise batvielu pu kuksa va krenugaca milafa gu tela pu berik di gonedic. Grupev da batakik va cinafa lida somegildar. Koni sidayki sedme in va betari sovektar lecen in tir diveik mielon artlakis az konaris bas tawava va intafa olegara. Tawava sometir inaf berik vols volnik, nume moida in olgalicur, pune kaiklakir. Va naboxa ke abdigadik gijovler voxe mancoba someslaster. Naboxa ke abdigadik is gadakiewega ke inaf nazbeikeem zo ilsetiker. In va gadikya is tawava is berikye is kelt wetce rolustena ik rotelakena coba gisuler, i wetce namulol ok jebes mard. Inafa molera va tawava sovumbeter nume va ant letaxo kadimeon isketer. Diliodaxo koe batakikafa widava sometigir. Meko xo ta gildera va toa imwugalon atrisa ik lupuwera ke wilteem ke kona beza. Vexe rotir mancoba lecen tí govitik nume me gildá. Iyepta va oblaka anton nupobaxar. Nume tok dulap ta blira tir kase ayik, va antiafa iera ke zveri ik prilara ke yona salma mielon aname tourka, me rogilder ? Tí kerik nume me gildá. Indiik va mamack ke suka vamo tourkalavek, is va dakela ke miv suka tcatena gan miafizafa muvara ik kofigana gan pailtega, sokabdualbar. Suka sotir tciamafa gu kerik lecen kota coba va mil gael sowalzilir. Sulem is aal is ayik. Va mil gael volant sowalzilid. Batakik va kagaelan gael numekatcalar. Dum ayik olegas va konak viel enide di divgaelar, va alitara somepestaler. Vexe ede va cinaf siday pu win dolev, pune gosetikec da suka sotir tciamafa gu cin, da gael va swava do kotcoba blisina sowalzilir. Suka ziliyisa pu cinaf abdigadik va inafa taneafa gaelera, va inafa bocafa repalera dere al kazawar. Nume ede va cinaf siday pu win dolev, pune va in ezeon di gosuc ise gu baerdaca gokruptec, i gu dum xo liz dace batakik va suka tuzijnana gan werdxofa imwa rogrivuter. Batinde va winafa firvira djudolesa va cinaf siday krafiatav. Vexe ede co djupromalnalev, pune va co kredapá : batakikeem va sulem ke bat siday dum berik gonaskipeter. Tí govitik nume va mekara blirinda gruper. Va decitoy gartol zaxawes koe werda is jovleyen gan batakik balieyes male pokolapis impadimak al wí. Tí govitik nume me gildá kane vikizas azilokol rotir zolonaf loon dam gartol anton cinon atan enide di laptev. Tokcoba ayik a sulem tir ? Ede kot sulem co griawir, pune ayik golde swavantiucapa co awalketer. Lecen coba tove sulem fepoar, tove ayik fure fepoar. Kota coba va sint sogid. Pu winaf nazbeikeem gotavec da sinon sistan sid sotir dem guboy ke cinaf abdigadikeem. Enide sin va tawava di tarkad, pune pu cinaf nazbeikeem kalic da sid sotir kulaf gu kota blira ke cinafa zaava. Pu winaf nazbeikeem va coba cinon kogrupeyena pu cinaf kotavec, da tawava sotir minafa gadikya. Kotcoba fepoasa kev tawava, kev bet nazbeik ke tawava fepoar. Ede ayik mo sid putcer, pune mo int putcer. Icleon grupev : tawava va ayik somepasur ; ayik va tawava sopasur. Va batcoba, grupev. Kota coba va sint sogid, dum fortey tutanas va mila yasa. Kota coba va sint sogid. Kotcoba fepoasa kev tawava, kev bet nazbeik ke tawava fepoar. Me tir layeyes va remay ke bli : anton sotir femam. Va kotcoba sopuna kev remay, kev int sopur. Dace batakik, dem lorik gozas is pu in pulvis dum volant toloy nik, gu dofi bali me zo rozawaler. Skre rotir tit berik. Rabatecketet. Va koncoba grupev, ise batakik lanviele rotir kosmatar : cinaf lorik tir mil lorik. Rotir re trakuc da va in digic milinde va cinaf siday djudigic, vexe me rotic. In tir lorik ke ayik ise inafa saara sotir miltafa tove kerik lidam batakik. Bat siday sotir tciamaca ke in, nume dasara va tawava sotir vliguranzara va inaf redusik. Batakik dere sogriawitir ; rotir waveon loon dam kotar grelt. Va intafa ilava fuc nume vanmiae intaf zail konmielon di personec. Vexe awalkeson sizuntatac, lujaf tuke po ke lorik vanstayas va win kal bat siday is yoke kona manafa erava askiyis da va bat siday is kerik re mofelic. Bata erava tir bula tove cin lecen me gildav viele gartol zo staker, ise govitaf okol zo sekiar, ise birgaxo ke aalxo golde ayafa dakela alitar, ise wira va imwepesa venta gan pulvis fem zo tuspupiar. Toklize amnaxo tigir ? Al griawir. Toklize kiiz tigir ? Al griawir. Bliratena, mobliratoza. |
| |||||||||||||||||||||||||||||||||||||||
