Talteon me warzaca Luz11
11-eaf luzVa safta az safta mea patav. Ba jinafa artlapira, batlize fentugal tiyir nume, viele gasiza lubeyed tapayani tawaki tiyid riwe milwupefi dam roida. Re, aal gin tid kusaf. Cinafa blira va redjel gu sayakaxe dun goater. Kion ixam al giltavev. Geja tir nekira va awalk, dum veta ok kotcakola, dum grakola ik amatraspuakola. Vexe awalkolaf tod sotid loon feref isu gedraf isu udutaf. Cinafa trakura sotid dum warn ; gan betawes vieleem zo feredjad ; tinyid viele tildewev voxe tijid viele lev viltara tigiv. Dato feyukxo diveon is koe cin tigid. Kottan batlize sotir man voxosk cin : darekeaca mea krulded nume tire mea setikev. Amidaca reduyuna gan gaara is kotavera al zo relvad nume kagrupera va sina tir wavdaca. Belundatason va kona debala dile guntad, voxe kison va yona rioja taneon gokaikfina, va rotoda dere nekid. Batcoba sotir dumede lekeon co tiyiv talolk ke yona amidafa patecta ; sin al kaljeyed nume kot re tid milkerdelaf. Ede va amidaca djukagrupet, pune va taneug trumon gorindet. Tiv ayik neke anton tiv ton abigaf is kinokaf bask. Dene cin berucapa va palafa afida ke sanefa danka is abica gotuskuca ke flintik is sintafa bocafa lotira ke awalklanzana lospa divulon sokabelcar ; bata kotcoba va cin moe bliazenta rundar lize vanmiae wupe va pola ke xonuka isu faxuca kaikfiv nume va abic ronovugalatan bartiv kalion kodigiv. Ise batcoba volfistukon. Ede va mancoba co djukarolat, pune batse debala sotir gradilafa is entafa ; vexe toktan viunsur ?! Banse Tjaden yoke man swavasok, viele kona volnafa dilfura zo dakter, va kot az bocaf foriacek dem urtaabre dem umta yatkon govofixar kire me gruper kase arti tanoy bartiv wan blitir. Al keyaksepev kase over oke me : Kat boker kire kalir da va roida ko jivot zinulav lecen mana debalon gu kotrafa uvoona lodamu vlardafa loeke sowupesir. Va manyon zvak gidwiv. Sin tid zolonapaf ise sotid. Batlize, jowon ice xonuka, bli va cugunaykafa opeluca dikir ; gu vugafa adruca va int kimar, kotaf arak koe kenibapa tigir ; batcoba belcon sotir cinafa taneakuca isu giwara ; ede co tiv loon amidaf, pune valevion co tuoviskaweyev oke co emduyuv oke co xonukayav. Batse dumede va brinuga van naelxo co koaskiv. Kota bliexaksara va gublisara anton gozanudar nume va int batliz soye govodjur. Kotaf arak zo divstakser kire va fa volfavlon co raweyar. Batcoba tir antaf mergil ta giwara va cin. Dile lente int dum diveik va int wí viele remi yon aulaf bartiv tuspupiaweyesa elza, lize welimas tcazedaks ke darekeugal katrasí, va anamez ke jinafa refa blira pu jin razdar ; kle destá rabateson inde bata merokalina tegira, i bata yoltana gu blira, gu bat tazuk va int dace al zaler. Kotara exaksara tir koe moda ke fentugal ; blira va pitcara tanon dun viunsur, va int rojuson gu dratcereem ke awalk ; va cin gu sulem al artazukar nume va bato ervo yoltano gu wayeda getcar ; va cinafa gustuca al griopar enide lente ruzatetes virnaceem me fu konjotev ede afton is cuon co jiligav. Den cin va palafa pesta al divmoder enide va sostas bup divvawav ; pu cin va govitikafa brunuca al kozilir enide nekev kotcoba va kota lovafa voda rotcalutev aze kev ruzadera ke mekak konendav. Acum va budena is olgafa blira ugalav, i va blira drume welma, ise kona bifa va konaka yozda mal ludev rion bimilesir, vexe battode teyka ke gamiafa is eaftafa gelavara dene cin ve awir. Batse wupesis gemelt tid ; nedid da zalera sopron anton tir tcafa, da batcoba me tir enauluca vols niedarapa va auluca. Cinaf divef bliratazuk biwe tid amidaf gu tel ke moldebeltik ; vexe bantan va kotedje mana linulara me flecur kire soye mancoba sotir inafa tuwavaca ise in iclo royovar da lagaskison wan vonewer ; volson luxe cin, koefo po va vonera vols dimvonera me atced. Icde in preksaca tire tisa gan cin kan lagara is tca zo soseotar. Nume, kivanon, mielon, viele isti klokera divmodev, kalfelin gan vecara ke yona corara anamon orasa is guon nafen, vofav eke zobexa is jowa kake mielak tid tiguafa. Tiv teykama voldrikon kevnendana gan dzetama kev zivotc gu vanmecobara is oviskuca ; daruntev nume, dile, riwe belxav. Bam odjamafu nisu ke meld vanpir kolicas maserk ; ko int apcanyav aze ton ciwan itapeem rem miel disukev. Koe gaelera ke kenibes palik va tolpozilira anton pestalev nume batinde va gazda kev. Kotvielon is kotbartivon, kota gasiza is kot awalkik va bata tiguafa zobexa loloon sovibad ise tanda kalion rucad. Rabaté da, abicabicon, ina aname jin ixam empawer. Tulon, bata kimtafa rupa va Detering. Inye tiyir tan battel blipis van int. Xaka ve tiyir da ine va raneta koe matela kozwiyir. Batviele mal brimgaxo dimlaniyiv ise bata raneta ba afizara poke cinafo warzafo kowaxo rimekon ic kelda ben cin evodason ve awiyir. Tiyir toiskafa vexe nutiyir tsenke dem batakafa imwa. Resielon, va Detering me wiyiv. Tere, gison va konaka imwakirafa gama ke raneta koe nuba, in artlaniyir. Nuleyev, eruson kase va kon aguntanik co di kevlaniyir. Va mecoba dulzeyer voxe mo baplada senyayar. Remielon, gildeyé da kaliziweyer. Va welor nulevegayar. Va kona skaya griteyé nume kevlaniyí. Linulayar dumede koncoba vol fu tiyir, nume kaliyí : — Va meka akoydaca, xeim ‼ Detering ! — Ax ! Va tokcoba ? Me lajukenibé, opelon…! — Tokdume, kle, va batyona gama ke raneta al aneyal ? — Skre va kona gama ke raneta rovodaneyá, ~ mingasaf dulzer. Aze artimon dakir : ~ Dene jin, iltaalxopo dem raneta tigir. Viele sina imwed, winon mal nakolkxo, batcoba nutir ilavadualtap kir batakapafa ; re tir cadim. — Rotir konovera fure tid. Rotir dere, larde til tawamidusik va arevlara seotatal. Takenkalir vexe inafa swava arlize tigir. Viele tawadayik gan kona koefafa pestaka zo blizesir, pune sotir ton divulafa tiva belcon tukramena is warlafa, i ton tiva likon akoydafa is likon kontesa. Deaseteson va in, va begki erú ; drikon zilir. Batcoba tir tubizaca lecen in gitir totcidaf. Batdume krodoé. Mecoba sokir : diregazdon Detering linular dum gubeon. Tce al wir da eninté. Wori veyeldeon batlize mea tigir. Sonké voxe va mecoba kalí, isketeson va ugal mu in : rotir lajuremlanitir. Ixam konaktan va Xollanda al lajukallanid. Ba morozara inafa metigira zo katcalar. Arti tanoya safta, zo givav da in gan sayakabatultik al zo soper, i gan batyon sayakardialik cinon vligun. Va Germana al vanlaniyir ; batinde, tire mekase dadiyir, ise lion opelon, grunson al narteyer. Kottan co gogildayar da mana yatera anton tiyir beviaca is ugalorafa eglura. Vexe va tokcoba malyesik ke gejapirdot arte decemoy decitmetrolk vadime redjel gildad ? Azon va beta giva va Detering mea al gildev. Dere dile, wupesisa gijarotiaca cinon dimelagdayana awid, dum ganta div tuidularsan gantak. Va xonukera ke Berger re gopulví. Ixam jontikedje cinafa brimga tid merovidena ise redjel al tuterawer, inde, pulvickison, mea tirkagejuv. Viele dilfura az kevdilfura al dilized, joapayana conya is ubzeyena lyumara mal bete gasizafe kal are anton zavzad. Taneafa redjelconya al zo remrur nume lospa kotlize al rundanyad, va jontik feyuk lize lyumara wan dilizer. Koe gasizafe tigiv ; englik vakrileon tigid ; va intafa eliwa gritanamed nume va cin lajukadimvulted, zo ivamudav. Vexe xaara tir wavdaca, lecen sel is vikiz vamoe cin ezad ; metan co kagruper da djuxaav ; rotir dere me djumaskiv. Manvulon metan unt sogruper. Va yone vanstise moldeyedave gildev. Cinafo lyestasiko va lenteon ivamuacku gu viltara besar. Lava ke tufentasiko vanpir ganta ; va bor silukon govodeav, kottan koon sever ; batkane va plawa wan dadiv nume wan roviltav ; vexe kadimeon teyputcegara loloon vanstid. Abicedje titiv buktaf. Batse toleafo lyestasiko pokapon awir. Ko feyuk vakrile cin zo palser. Batse Berger su aneyar ; aze re, kadime cin, kevdilfura dilizer ; zo iloblav aze va intik gin uzerav. Viele, azon, kake gelbenye tigiv, tan battan kevterigeyes va bliga pwader da arte abica decemoya bora sayakaf vakol bakayan senyer. — Toklize ? ~ Berger erur. Battel kalir. Berger malteriger. Va vakol djugiwar oke parmon djuviltar. Weti tevaksat wori, va mancoba me co dwiyir. Co tiyir loon becaf. Va in lakagiv. Vexe larde goreston bulur, pune anton rokaliv : « In oviskaf » aze iskev. Lecen viele va korik mo sid me ve romimat mei ronubegat, mana yokagera ke redjel sowupesid. Ise rane ke Berger tir vas tanoy metrolk is anyust-sanoyi lumki ; in tir tel lopoik ke rumala. Tire, tir oviskaf kire va teyrebava co remlanir ! Vexe batse bata sizunta va in al pedrar ise gu oviskik artazukar, i bata sizunta maninde pitcasa va kot min. Soye ar mantan va kotcoba toz empad oke yated ; va lantan dure lasuxas va sid kan nubeem is art va dil int kotawatason dace al wí. Tire, bata coba va jontika jidjara dere gikid, vexe sina ixam unt tid sugdalackasa bazexa. Berger dem tanoy viltaks koe woyail zo dimstar, vexe ison, tan inaf levburesik gan vilt ko koelt zo bakar. Müller xonukeyer. Va in gu djobal ko jivot kevuon zo viltayar. Remi bartivacku gwidapon is mejepeson wan bliyir. Levi xonukera va vobor pu jin ziliyir ise va intaf stazeem yaleyer, i va stazeem konoleyemb gu Kemmerich. Diskí lecen in katickir. Kaiki jin, batse Tjaden digitir ; pu in al abdizilí. Va Müller al lajukotawav, vexe in tce koe dili zavzaginsitir. Cinafa redjelconya kadimon zo dimstad. Lenteon slik englaf ik amerikaf iewaf milk tigid. Slika corned beef atela is slika batakafa dentafa regelta is sliki warzafi buli is sliko severo tigid. Luxe cin, tiv mazdaf is aelepes. Sinka tir rotarsafa is dem cug ikaplekus ug jontikeke tuakolawev. Koe Germana rabik va int al tukulad edje batlize amatraspuakola va cinaf lanyeyeem anteyar. Soye beti mikaci tir kotrafi gu kurdanyes anelik. Pu volredjelxoikeem va batyona tawakirafa is blafotafa is kimtafa is trobindasa vola co gonedit, i va batyono alto likon blaganyeso dem amatraspura kranavesison puskesa va fortey, is biwe kipteson va sint dure rodedisukeso is rodekaliso, kan malkes kutceem ware kranavbupes : « Dimplekura va pami tir giopaca… » Cinafa kaburervolia tir bocon gu mergil ; va dik werk dadir ise bulipima tid lamerseyena jontikeke beta bulira mea tir musafa nume va basvajoteks mo cinyon sayakik dace stakser. Va dik okol dadiv ; cinaf iewaf milk tid forteyenjaf gofromen sardik me rodebures va eyelt nek sotre kuna gruxonukes. Va geja sogildansad, anton grupabdulanid nume zo viltarsad. Tanoy severoik va toloya rumala dem bat kseldunik mo sid suskeson al ser, abdida ba volrundanyara va impadimak, gildayad kane rogelbeyed. — Germana fure titir tuvlardayana, ~ Kat kalir. Me pokolev da tena ke batcoba co titir. Cinafa trakura lepon artfid. Bettel zo roviltar nume vol rovodawalker. Zo robakar ; mantode ropexe tir direfa recela. Ont waveon ok gaveon zo vigabel, ont artode wal beweem ke tan redakaf selaropik lubel, i ke tan selaropik dem azilgamda bene tialtludze kalis : « Va tokcoba ? Icde bat nimat trelaf lomon dam ban ? Moe redjel me godevultel, ede til takrelaf. Bat ayik tir dralaf gu zanira. Malbulul ‼» Kat va tana rupa anamofiyisa va kotaf redjel male Vosges fluvor kale Vlaandera pwader, i va rupa va redakaf selaropik volunt gibelis va konak yolt bak selasa worara az medisukeson gikalis ba abdulanira ke rozan lantan : « Dralaf tori redjel. Va sayakik banliz olegat. » Azon korik dem intanimat va int atoer ; redakik tolkalir : « Dralaf tori redjel. » Bam kle ( pwadeson va batcoba Kat pudamadar ) bat ayik kalir : « Va intanimat ixam dí, voxe ede re mo redjel mallapí nume jinafa taka viltanon di zo empar, pune va intataka volmiv eputú nume batkane, vanpití redakaf selaropik, jin dere. » Kot cin gu bata dulzera zo keldaskipiv. Dile rovotid selaropikany, ise tire jontik tid ; wori, oton gu decemoya worara va in, kot sayakik wal nubeem ke batjontik korik tanon ok tolon vol rovoluber, i ke epusik va gradilik lasugartazukas va cug parmaf dralik isu abdaraf gu dralik tori redjel moe dil intafa vexala. Jontika mana rupa sotid ; loviele lopon pirafa. Soe mekon tid dofa gu tarlera ik volugda : tid ronkafa ise va beta coba gu inaf yolt duvud ; lecen, koe sayakafa blira jontika mocoera isu memalyaca isu straca sodilized. Kas me tir granaca da, nekev kotcoba, vertega az vertega van bata loloon gripokolena lyumara djuprovulted ise dilfura az dilfura mo dure dimelanisa is kelkana conya dun dilized ? Bort, dare tis balgeks, al vanpid eaftervo. Ton azakakorafa conyapa va int atoed ise lodam arcoba sedme cin va relkuca ke geja cugeke viwazed. Va bati buli dagimasi va bwevasa viltara ben cin, me wiv ; dilfusa kevelafa conya tid dem ayatisik dum cin ; vexe bati buli tid foalk, inafa goma tid teniskafa, dum geja : sini sokovilad viele va feyuk vurkon titnid aze mevukison divnid, ton ageltucaf milk dem jaftoldunolies leltor putcegas va vikiz, i merocenen azakaf sulem selus va xonukesik ik bakanik… Lenteon, ko tiguarsafa alma va int cugeke tupinav ; kev sinafa ctakafa gijarotiuca, cinaf meem tid baplolk ise moldey vanteyaxa. Gasiza is tieganta is bortaf milk : coba selusa is vumbesa is atasa. Amatraspuakola is grakola is riftakola : coba belkesisa is anteyasa is atasa. Brimga is ropexe is dofo zaxaxo : ara kasaca sometir. Bertinck, i cinaf rumalaredakik, bal dilfura xonuker. Tiyir tan bat cuisaf redjelfayik vabduon tigis kotviele wupe tir. In mali tolda do cin tigiyir, me bakayanon. Soye, tere, kona rotaca va in co gonartnir. Koe gasizafeyuk tigiv, iste yon volnik. Goagantaki va jin vanstid, dem alitara ke punta ok tolna. Va toloy ayik ervokiraf gu tanoyo firdesiko ; battan va sarma keve ge burer ise bantan va yaxay divmimas va tey koe nubeem gir. Ede va cin uzatason vanlanickid, pune fu zo burmev kire div cinafa tirka me rovodimelaniv. Va sin viltav. Wori lajuvanlanid nume debala turotar. Bertinck do cin koe feyuk senyer. Viele katcalar da cinyona viltara me artnid, lecen golde tizuca ke sinaf tey ben bet ayik va int nedis lasugelbersev, pune va zelt narir, div feyuk teriger, aze madagiyison moe ladaveem kulmer. Viltar ; milvulon vilt ben in ermitawer : in zo uzar. Soe, zavzagir lize tigir ise wan kulmer. Lanviele va zelt omar aze kev epita gin plekur ; adim viltara sokir, Bertinck isker da ervo kaluber aze kalir : « Ae !» aze ko feyuk dimteriger. Bantan ke toloy sayakik bures va firdesiko zo bakar ; luber, yaxay sol battan buber, tey kotliz anamgimawer nume ayik teyer. Bertinck ko jivot su zo viltar. Azon moion, roida ke gasiza va inafa itowa ve nokodar. Mila roida va kafka ke Leer dere poon soltiolter. Leer brer ise va meem altogir. Va fortey kalion drasur. Metan rogreler. Arti konaka wexa, kev int altosoar, dum vlardafa veyna. Remi bemugal tiyir solokseropikany, va tokcoba batcoba al zanudar ? Aksat az aksat tiskid. Bat idulugal ke decit-lerd-decem-san-anyuste tanda tir tel loon portaf ke kot isu forteykiraf. Afizcek tid dum pumkik dem moavuke is falte, i dum vurkik vamoe vilaxopo. Kot cin grupev da va geja fu tazdav. Vaon pulvimiv. Dimelaniv ; kaiki bata dilfurapa, mea rotaskitiv ; va sayakik is werk mea dadiv. Soe, lyumara wan tir, wan xonukev… Idulugal ke decit-lerd-decem-san-anyuste tanda… Meviele blira koe inafa kimtafa viwazera al nutir rojugemena lion dam re sedme cin : kerafe tsage ke nakxo moe werdolk, idulaf sielcek koe fedafa is orikackafa mawa ; ebeltaf is bulaf aal ke nom, bitej is nisa lava, klokera is keniberapa, ey bli, bli, bli !… Idulugal ke decit-lerd-decem-san-anyuste tanda… Meviele va kranavera unt al tcizav loote viele van taneafa conya mallaniv. Lularsafu nisuju va gejanonura is dilira al awid ; va takra skalted ise va beta malfira loeke tuportad. Idulugal ke decit-lerd-decem-san-anyuste tanda… Meviele blira moe redjel al tir pirafa is virnafa loon dam remi bartiveem leve viltara, viele paokafa gexata koe dibla senyed ise nubeem ton tanoya pumbara zadred : « Me, me, me, me re ! Me re larde tena fu sokir !» Idulugal ke decit-lerd-decem-san-anyuste tanda… Pokolesa sukara santasa va data taya apkayana gan viltara, lujafa vozera ke braldera is gripokolera, kranavesa sustera ke awalkera, volrogildana bibera : « Tokdume ? Tokdume batcoba me zo tenutcer ? Ise tokdume batyona lorara daktesa va tena ?» Jontik severoik batlize tigid ise tid frendapaf eke va mangiyis sayakik tcabaned milinde tove libakol co askid. Sotre tanoyo germanafo severo, aluboyo englafo ik amerikafo icle tigid. Sotre tanoy germanaf sayakik, legaf is aeles koe bata brimga, aluboy kevelik tigid, i godjaf is iewaf koe bana brimga. Sotre tanoya sayakabegxa, alub-sanoy gaezak dem atela dene kevelaxo tigid. Me zo cenev kire wetce sayakik tiv loon pof isu bagalakiraf ; ae gan granafa otarsa zo seluv ise zo malplativ. Va konaka muvasa safta su levgav : lukoptaf kelt, lukoptafa is plawadelesa tawa, lukoptafa awalkera. Viele kan gena van taneafa redjelconya mallapiv, abda va cinaf toayot isu vage ixam konir aze slar miledje koe brimga zavzagiv. Me turodawev. Kontan ware diskis va stazeem va ticak gu eyelt anamplekur enide kuritcakirafa lava anton vion di konir. Zelt koarugawed, tantazukot koarugawed, kotcoba sotieplawer ise sovoltankotar ; kotcoba tir tawaflava kevtraspusa is puntafa dem blafotafa ujiwa moplekumba va kerafa derda ke data forteyafa warula. Awalkik is bakanik is moblisik vion kosidawed. Zivotc va cin monirsir. Onotcara ke gasizaki koe bata lukoptafa is blafotafa dojewera va yonu kizoyu isu rumeafe ie ke kot uzan cin solimpar, nume remi sollipan mielcek kali ilamaf amlit brer. Cinaf nubeem tir tawa ; alto kuritca ; iteem ujiwa dem muva. Me grupev kase wan tiv blis. Aze idul mo cinyone ye luber, i abdaf is xetkaf dum aseza, aze bak tan bat afizcek ke idulugaltena, Kat dimeluber. In is jin anton tigiv ; va eepta gasupé, rumiya nutir nokodayana, areldon viltara va niska ke nimat al uzar nume Kat gripokolenon brer : « Re, tagelton re… » Va in vinú : « Toktan gruper edje atara wan jijatar ? Rin, re zo giwal… » Bakaks tizon wan forteyar. Va ant Kat vol rotiské edje va ksid co laganeyá. Ostik, va mek vegungaf selas play grupé. Kat tir bagackaf ; ben ge narí aze va greles play vanlanir. Tolon vukiv. Golde remburera mejeper. Pulvimiv. Va bergo ke intaf tantazukot al fenkú aze poon gaelé : furové ise kotrafa vola gan sure sugara zo deer ; nekevon karaké enide di gin laniv, lecen tawova tir wupefa. — Gin mallanit, Kat ? — Fiste, Paul. — Kle abdulanit ‼ Kamadá. In moe bat spaf nimat ranyer ise va aal altogir ; bam va ban bakayan nimat obrason narí ; va tanoya botcera askir aze va bade ke bat galaf nimat lev ma plekú. Cinafa kelda loloon tuwavdawer ; dile kona gasiza azdar. Loeke kalion laní, fortey ke Kat belaxon traspur. Va int me ronendav lecen gasiza kaiknid valevida va int rovobravav. Ko feyukam ins lubev, ketemeson ; va yelada mal jinaf menk pu Kat zilí. Va tanoya ruseta vikizev. — En, Kat, ~ gabenton kalí, ~ kle fiste re va sint solparsat. In stivawer ise va jin disuker. — Kas va goyol setikel, Kat, i va goyol cinon kucilodayan ? Kas setikel kane va jin gu stakera al giwal, viele ware tiyí warzik ise taneon al zo baká ? Batugale ware boreyé. Kat, riwe weti barda. Enkalison takumar. Kivara va zavzara antafa ko jin gepoyter. Viele Kat arliz zo rembureter, pune batlize va kon nik mea dikití. — Kat, kotinde fiste va sint tolwitit, ede efe dilira sokitir abdida al dimpitil. — Kas folil da dem batmana inia gin tití dralaf gu redjel ? ~ piron erur. — Kan tildera fraskewetel. Waleniskay tir defres. Rotir kotcoba dilizenyeter. — Va ruseta ware zilil ‼ — Rotir, stekeon, va koncoba belcon robokatat, Kat. Tí gabentapaf. Volrotir va Kat mea wití, i va Kat jinaf nik, dem lubes epiteem is nyoxama, i va Kat lodam betar ayik jinon grupen, i va Kat walzilimb va batyona tanda, mekase va Kat mea wití. — Va rinafe mane zilil, kottode, Kat, enide dadití viele dene jin tigití. Ise batse tele jinafe, fu suté. Va eluxaki ko inaf ucom fargié. Ixam pestalepé da zo jovlé, beka in poke jin ware debanyer ! Kas pokeon zavzagitison va jinafa nuga kalion goviltá ? Laizon, va elnie gildé ise Kat tukusawer ise tublafotawer. — Abdulanit ‼ ~ tcipar. Pomatason vozeson welvé ; va in ben ge narí aze toz vulter, vultemeson enide nimat me zo botcerser. Jinafa larida tir rodafa : va yona kerafa kretsa kabduonisa va iteem wí, viele, talgalicason is sugarsason ware lanison, riwe lopceson, va greles play adim artlaní. Batlize jinaf badeeem wayawer, vexe va umo po dadí nume mo eliwa ke bat spaf nimat ke Kat ins lubé. Arti konaka wexa, vion gin ranyá ; jinaf nugeem isu nubeem tizon skotced ; va intaf menk wavdon trasí aze va tanoy artcek ulí. Askison va batcoba, jinaf kutceem buper. Vexe kicé : Kat re tir musedaf. Abicviele, va gojaf soist dem puda kostisa va oblaka walwí. — Va mana kuncara co romegayal, ~ selasik kalir. Me gildason disuké. Va Kat nedir aze dakir : — Rabatecké da in al xonuker. Va ina ewa me gildá. — Va nimat al zo viltar, ~ kalí. Me zekason, selasik : — Vox dere arcoba… Rwodé. Jinaf iteem wan tir skaltaf. Re gin furové ; batcoba ken paurayeem kevtraspur, bosolá aze va Kat disuké ; in senyer, mezekas. — In al krezer, ~ kalion kalí. Selasik azdadamar : — Soe lodam rin va mancoba grupecké ! In al xonuker ; va kotcoba rinon djumena morbé. — Mekase, weti sanoya wexa pu in ware al pulví ; al krezer. Nubeem ke Kat tir idulaf ; va in ben epiteem narí aze kan yelada pragá. Bam pestalé da jinaf gelteem tir abdaf. Viele kaku inafa taka deswá, wí da tir forteykiraf. Selasik wal talgeem gin azdadar : — Wil ? Teka al sonké, gasizaki moo kelda va taka ke Kat al konir ; batcoba anton tir feme, efe al tir kimi, i egluyusa roida, voxe al staper. Kat al xonuker. Vion gin debanyá. — Kas va inaf sayakabuak isu xeem djunaril ? ~ ekavakirik pu jin erur. Enkalí nume mbi zilí. Selasik zo gevar. — Wori me tic vuwik ? Gue, me tiv vuwik ; me, meinde… Kas fu rodemallaní ? Kas va nugeem wan dí ? Itamadá aze anamdisuké aze do iteem bangé, ivamuzovdason vieli vukí. Kotcoba tir gubefa : vaxeda Stanislas Katcinsky wagnunik tir xonukeyes. Azon, va mecoba grupé. |
| |||||||||||||||||||||||||||||||||||||||
