Balgariafa prostewafa kurera
Prostewafa kureraAbdiugalon kurera tiyir tana loksevakirafa kapa remi blira ke balgariikeem. Toloy cadim tiyid dem kurera : abdi toza ke blinazbalarugal is kadimi tena ke idulugal, kaiki vebaltara is warolara. Batcoba kare yona vebara ke tawamidurafa tegiraca efe zo askiyir.
Jotikye va titis kurenik sumuon narayar. Va in loviele sielon katcalayar, katecton gu yona dofa belcara moe widaviga lize jotikeem stuteson va int relandeyer. Koe balgariafe stute, kottan belcon stutter, nuba koe nuba, tazukason va yon ematcap, ivamu ik derdakoraf ematc. Bam yikye pok tcaluteyena yikya va int ganeyer, va inafa nuba mivokon nariyir. Viele arienta abdufiyir, yikye va yikya is inyona pusikya toz dositayar, dimlanison va jora, kotviele ton sincucapa is werkucapa. Konaksielon, ine poke sul keyer lize ina va lavabda tukotrayar. Rukiaca va exaksunafa dulapera tiyir viele yikye va ulira ben abda ke yikya eruyur. Battode, xialara vrutawepeyer.
Gemelt sokir viele yikye va intyon vajgenik govestakser. Tiyid parloesik vajgeyen gu daktera pu lentefa yasa da ina va nazbeikya berde gokureyer. Va yon yal mu mona is yikya vanbureyed.
Vani gorara va kurera, yasa ke yikya va bueleks toz egayar. Kota yikya va kurerabueleks remion tadleyen mali sardugal digiyir. Kulafa yikya va loa toloya lima gamion vajkirafa gu bueleks vanbureyer. Azon winugafa aguntara sokiyir viele yikye va kureraxiz is yona imwa pu yikya firviyir ise pu gadikeem jukuyur. Yoke orpa koaykayasa da gadikeem me isker da nazbeikya drikon bulur, ine toz yanepeyer. Sopron gadikye va erura ikanaleyer nume kapa zo dakteyer. Ganenik dankayad, stuteyed. Koe konaki ki ke Balgaria, yikye va aguntanik ko warzafa mona dere rokojupayar. Arlize, yikya dene gadikeem tiskiyir, kali kureraviel arti rotir tanda ok dace tolda. Wori, viele yikya batinde zo walter, metan is mecoba rojoad.
Ba kureraviel, yikye is povakikye va lima divdielad, gu imwa is laytcalist ziked, va yon keraf serberd mo okol plekud aze do yon nik van mona ke yikya lakid enide va ina di nujidubied. Lecen nekev waltera, gadikeem medrikon isker da ina bulur nume povakikya is konaka nikya ile item ke aguntanikye va ina di gupalsenad. Ina koe mawa tigiyir, tiskisa va opaksevakirapaf (nelkon keraf) kureragem is imwon besayana. Italk va gexata besar. Bueleks tir gadiaf. Aguntanikya is gadikya va beg tori ganenikeem mielcekon al burmotad, ise guazikya ke wida va kureraprolk (okon feruglitsa) al asadad kane aguntanikye va taneafe stute (okon xoro) ke kurera jupatar.
Artlanis milk ke aguntanikye sumuon zo gilder, lorar. Ayikye tidon zeltad, artan lexud ise kamamasa trugapa nelkon zo gilder. Tuvel ke mona tir budepeyen nume aguntanikye va itaya gododer enide va mawa ka aguntanikya di vansar. Dile konak tuvel zo goremlanid. Viele erba me maer, yon nik is dere aguntanikye poason kolanid. Adim va aguntanikya lajunarid aze div gadafa mona divbured. Ayikya ~ gadikya is berikyeem is nikyeem ~ kalon is gabenton bored. Bam ayikya va ironokafe stute (xoro) wetce kaelik jupar aze va done pu monikeem is vuwikeem is nikyeem kalir.
Titis kurenikeem van uja lanir ise koeon bak migura yikye va italk ke kurenikya madar. Moi uja kottan van widaviga lanir. Kurenikye va feruglitsa prolk madar aze int is kurenikya wetce warzafa yasa va taneafe stute (xoro) jupad. Kulon zikeyena lima va kurenikeem is povakikeem ko mona ke yikye vanstad lize gan yon vuwik isu ganenik zo emuded. Guazikya va yon yal pu kurenikeem firvid ise va batakafa koxawa mo sid stoked lizo kurenikya lanitir enide va intafa mona di kolanitir. Sina va yoni kipi ke idulaf beg lev inaf meem plekud ise mo epiteem va toloyu gamiafu muktu dem lava aykad enide wid kase ina titir pofa umeke va lagapeem ke yasafa blira rozornatar.
Povakikye tir volapa koe balgariafa kurera. Konaka dulapesa orpa va inafa yordapa slamed. Tulon, viele lima lize povakikye tigiyir va za fu remlakiyir, jotaf poik leve za va int rundayad, ta pomara, enide za ba remlakira ke lima me atitsur, kire bora ke povakikye tiyir rusagafa nume xelkara zo gonaskiyid.
|
| ||||||||||||||||||||||||
