Charles Baudelaire

Charles Baudelaire

1821-1867 Francavaf ezlopik

Sposaf ezlopik ke 19-eafa decemda, Charles Baudelaire yoke bohème blira zo gruper. Olyasten sutesik, va Les Fleurs du Mal (Imweem ke Rotuca) tanoy grabom blison sanegayar. Bata ezlafa larma ba awira zo lanzayar ise zo urayayar kire tiyir lemistersesa va glastafa lidopa aze va izva voxon di denfiyir. Baudelaire ko afi va toluca wal tizuca is drelduca, is wal evakuca is listuca, is wal kiewuca is rotuca, is wal kusto is fuda, plekur. Vewara va rictela Kobliyise koe Paris ba 08/04/1821, Charles Baudelaire tir anton tevdafe viele gadikye awalker. Gadikya arti tanda va Aupick jadiwik tolkurer. Ine va bata tanara vewar nume kotviele titir tcakese va bat sayakik dem amidapafa voda isu gelavara. Va Louis le Grand olda koe Paris kofir. Baudelaire golde tcumivafa anda zo katcalar. Va Quartier Latin anameda toz nobar. Bak 1839, gu Louis le Grand olda zo aloyar voxe va ekul soe seotar. Va "bohème" blira ins kiblar. Glabik Inafa yasa, karolansasa va glusa blira ke yikye, poar bak 1841 da ine va totapa kal India rundanyar. Kore me ten koyar, Baudelaire va jontik lit koswavatas va intaf grabom (L'Albatros, Parfum exotique, ikz-) di malnarir. Baudelaire bak 1842 ko Paris dimdenlapir aze va Jeanne Duval vanpitis fertik kakever. Va konoleks kazawayan gu gadikye mepatason ixalar, nume batcoba plataer da yasa va ine malyeroton adomtar. Bam gonokobar enide va olegara pomoyar nume vanpir felik is malyopasik va yamba. Va listevafa griva tazukar. Va konaka ezla ke Imweem ke Rotuca toz suter. Suterotafa toza Bak 1847, Baudelaire va Edgar Allan Poe amerikaf suterotik kosmar. Dum bantan, va lana rieta va dulapera va rotuca is mila envara va yamba yoter. Va jontik suterot ke bat sutesik kalfrancavar nume pu francikeem tugrupenar : Yon zultaf reiz (1854) az Yona zultafa rupa (1856) az Yona warzafa zultafa rupa (1857) az Stuveem ke Arthur Gordon Pym (1858). Dere bak 1847, Baudelaire gan Marie Daubrun zo memper. Bantel va konaka ezla di koswavar. Vanion, Sabatier W-ya va inafa trakura ikakereler. Kevudapan grabom, fitc afanan Bak pereaksat ke 1857, Baudelaire va gijotaf grabom sanegar : Yona Imwa ke Rotuca. Bata ezlafa larma gu « situndara va sanefa lidopa is lidacka » zo lanzar. Baudelaire is piskusik va zersapa govododed. Warzafa piskura voldem tevoya urayayana ezla rape tiyayana malyera bak 1861 zo askir. Bozon titsuse, Baudelaire ko Belga mallapir aze konakviele laxar. Taneon pokolepese, azon gan bata bagala zo awuzapar. Koe Belga wali 1864 is 1866 zavzagir. Toz akoleper (syphillis is pulvadrasura ikz-). Ko Paris bak pereaksat ke 1866 dimdenlapir aze mulufter, anton balem-san-tevdafe. Baudelaire va blira al star, tcakerseson va lidafa beksa ke intafe sare nume tir ewavacka va basalmapan ezlopik. Mekagrupeyen remi blira, bat ezlopik va gabentucapa al malsaver. Gan radimifisik azon zo vankieveter : « ageltaf Lorik » zo sedme Rimbaud, « taneaf vamogeltrevik » sedme Breton, ok ware « tel lozolonaf ezlopik » sedme Valéry. inaf grabom va wituca ko ezlopa taneaster.

Charles Baudelaire  Blira 1821-1867  Ava Francava  Suterind Ezlopa   Suterot Ezlak Les Fleurs du mal (1857) - Imweem ke Rotuca Le Spleen de Paris (1869) - Spleen ke Paris

wp-de:Charles Baudelaire wp-en:Charles Baudelaire wp-eo:Charles Baudelaire wp-es:Charles Baudelaire wp-fr:Charles Baudelaire wp-it:Charles Baudelaire wp-nl:Charles Baudelaire wp-pt:Charles Baudelaire wp-ru:Бодлер, Шарль wp-tr:Charles Baudelaire