Dewitca Martin Luther King 1963 Washington
ba 28/08/1963 bak avlara koe Washington
|
Weti tanoya decemda, Amerikapik batvielon va min modivatces kan intafa lecafa izga va minafa Divadoltasa Etimara sugdavayar. Bati aldafi kexi ranher, dum storkapa koafisa kan pokolesuca va konak celemoy levetirik teytcalayan kan anteyasa volmalhuca. Bati kexi al pir dum daavaf vanafiz ta da va abrotcif miel ke inafa flintuca tenur. Vexe, arti decemda, Ebeltik men tir nuyaf. Arti decemda, blira ke Ebeltik eafton zo wandar kan koxoleem ke solblira is rodeem ke solkatcara. Arti decemda, moe intafa ewalama ke wawuca vanmiae welfapa ke ugafa triguca Ebeltik ileon blir. Arti decemda, koe alava se ke amerikaf selt Ebeltik ware prelkar ise koe vo tir divvoanaf. Batdume min batvielon batliz pit ta da va kinokafa ayagropa ranket. Maninde ko vedeyafu kelu pit ta da va anaxa di koyultut. Viele vegeduropik se ke minafe Sokasane va minafa Tadlemwa ke Daktera va Volruptesuca cuison al sutelad, va anaxa gokonoleyena gan kot Amerikik sin sugdayad. Bata anaxa tiyir abdiplekuks da pu kot ayik, en, pu Ebeltik dum Batakik, meroripindana roka se ke blira is nuyuca is aneyara va kaliuca zo co-ravaldud. Batvielon denafa da tove intaf ksevawideyikeem va intaf abduplekukseem Amerika al gracer. Ute da Amerika va intaf baerdaf kalveblagaks porar, pu ebeltikeem al bilder va anaxaja, dimstakseyena dem bendeks “mestapesa eksa”. Vexe min vewat da folit da tir mecoba roporasa koe falakoldap se ke vo. Acum, min pit ta da va bata anaxa koyultut, tana zilitisa, opelon atoeson, va kulaceem ke nuyuca is septuca ke malhuca. Min ko bato wetano xo dere pit ta da pu Amerika va dinesa kwitaca yo ke bat bartiv askit da setiket. Me tir gemelt da va talpega tuzakodason va intafa lujuca digit oke da va tuaulasiki ke sabegamara se narit. Tir bartiv da abdiplekukseem ke saneroti zo funter. Tir bartiv da va tapedaf is copaf krant se ke solblinuca divlanit ta da va awaltkirafa kelda ke zaavafa malhuca sistat. Tir bartiv da va intaf vedey sol bixeya se ke zaavafa volmalhuca soltioltet ise mo pistok ke beruca va in kizet. Tir bartiv da va malhuca mu kot loriknasbeik tugeltrat. Co-tir baliafa luxe vedey ede icde gemeltkwituca in itabuder. Bat belkus idulugal ke mwedafa volvaleuca ke Ebeltik se me tenuweter teka tublis abdugal ke nuyuca is miltuca vantuker. 1963 me tir tena vols toza. Tan pokoles da Ebeltik anton olegayar da fabar ise daletoe neditil da in valeaf, figon divmodeter, ede vedey tolon gilton tuskintawer. Me titid tildesuca is auluca koe Amerika kali da pu Ebeltikeem inaf wideyikaf rokeem al zo vanzilitir. Frelk yo ke kevmadara me tutenatad da vanvilad va rigavisiki yo ke minaf vedey kali awira ke roidas viel ke malhuca. Vexe va koncoba pu jinafe sane gokalí, ranheson moe emudes pikay vansas va malherotxe : olgalicuson va minafa mwedafa runda, kan rovorcenaca yo va int me tugunat. Me lagat da daniaskit va intaf nuyucasiput ulison mal vim ke piruca is bogasuca. Va lhumara moe bria se ke bagaliuca is ugda min kotviele gostat. Va intafa kretura se ilblisa ton altokafa tizuca me gonisket. Trenon, va int govanmadat kal ilamkaca yo lize glogafo do altelokafo va int katanar. Ribiegafa sayudasa swava al narisa va ebeltikafa doda, va min van rodaxasuca va kot batakik me gokolizir, kire jontik minaf ebeltaf berik, intafa anoeluca batvielon tir wazdesiki, al doplekud da intafi bali tir gluyakirafi do teli minafi. Minafa belcafa ruzadera ta da migexeem ke volmalhuca zo goguoter, gan tolzaavafa ervolia zo gostar. Va lhumara tison antaf min me rokallanit. Ise bad minafa abdulanira gotrenat va belcafa vabduelanira. Me rodimlanit. Tid jontiktan erus pu sayudasik ke Wideyaf Rokeem : « Tokviele adim titic valeaf ? » Min anton titit valeaf viele Ebeltik mea titir kosaf kan meromuxana aklaca yo ke ardialafa fitera se. Min anton titit valeaf viele intafo alto cuupuno gan koyara rotrasitir va brava koe vawafa iku widavafa gida se. Min anton titit valeaf viele liziranuyuca ke Ebeltik mea anton titir da in mal ralomam kal logijaf ralom rolanir. Min anton titit valeaf viele intaf nasbeikeem, milon tel demaf tulogijawesik se, wetce milgik se zo askipeted ise viele intafa bagaliuca mea voidatar kan bopica « Anton Ebeltik se ». Min anton titit valeaf viele Ebeltik ke Mississippi robrudatar ise Ebeltik ke New York folitir da brutarovak yo krulded. Me, min me tit valeaf ise anton titit viele roka dum lava is malhuca dum meroturodawes soist al bimileted. Jin me afaná da winaf lantan se batliz al pid golde slika duxanaca yo is kevelaca yo. Kontan se levion divlanid va vwepaf flintolk. Artan se pid mal gola lize intafa aneyara va nuyuca va sin al askir da zo alier gan xefto se ke brazara is waxa yo ke ardialafa fintera. Trenac da kobac dison va lanuca da meriwesa mejesuca tori win kalustesa titir. Dimlanic ko Mississippi, dimlanic ko Alabama, dimlanic ko South Carolina, dimlanic ko Georgia, dimlanic ko Louisiana, se dimlanic ko vard ik ralom ke lentakafa widava, grupeson da betinde bata tira robetar ise fu betar. Koe krant ke volpokesuca vol abilet ! Pu win batlize is batviele, jinaf nikeem, beka, en, beka batvielon is eldeon va volfakaca yo min golentetit, jin kotviele baton kloká : tir klokara enekastawesa koe amerikafa rietava. Jin kloká da, boreon, minafo vo ranheter ise pojanhatar va geltranhuca ke intafa folisaca : “Min torigit da bat ageltaceem miv tid denaf da kot ayik al zo redur miltaf”. Jin kloká da boreon moe blakerafi kesi yo ke Georgia nasbeik se ke savsaf levetirik yo is tel se ke savsaf levetirikdigisik yo anam azega ke beruca belcon rodebanhatad. Jin kloká da donon Mississippi Soka, soka lize tey se ke volmalhuca is ristara anteyawed, ton dwag ke nuyuca is malhuca boreon zo wartazukatar. Jin kloká da jinaf balemoy veynasbeik se boreon blitid koe vedey lize me zo torigitid kan almakseva vols andavoda. Jin batvielon kloká ! Jin kloká da boreon donon koe Alabama, lize intaf bowesik pulvipir va ravlem se dum “kevura” ik “tumekara” va galdaf mweem, da banlize donon koe Alabama, boreon ebeltikocye is batakikocya va nuba pu sint rozilitid dum berikye is berikya. Jin batvielon kloká ! Jin kloká da boreon kotraf krant zo kamadatar, da koti kesi isu mevtava zo tuomatad, da arstaxo se zo tuazentatad ise da vralgafa kelda se zo turontatad, da aliuca ke Jiomaik pu kot cotik zo razdutur. Manu tir minafa pokolesuca. Tir folira do dana geon di dimlaní. Tuke bata folira, min grusolwitit vanmiae mevtava ke volpokolesuca va rapor ke pokolesuca. Tuke bata folira va iejes voldotrak ke intaf vedey ton ilamtaf drijk ke beruca min gruwartazukatat. Tuke bata folira, min belcon grukobatat ise belcon grubliketet ise belcon grulhumatat ise ko flint belcon grulanitit ise va lazava ke nuyuca belcon grurojutut, grupeson da boreon titit nuyaf. Titir viele kot loriknasbeik rodankatar va bata pulva se bam ditisa va warzafa sugdala : “Vo, tir rin, zijnaf liz ke nuyuca, tir rin va dan danká. Vo lize jinaf abdigadik se al awalked, vo tuke dano befoltasik se tiyid oklaf, sol eliwa ke kota rinafa mevtava nuyucabiota mamar !” Ise, ede Amerika gotir vedeyap, batcoba tuageltawer ! Tidu ribiegafi kesi yo koe New Hampshire nuyucabiota mamar ! Tidu ilamkafa mevtava se koe New York Soka nuyucabiota mamar ! Tidu ontine se ke Alleghanys koe Pennsylvania nuyucabiota mamar ! Tidu noldafa vokliba yo ke Rocky Mountains koe Colorado nuyucabiota mamar ! Tidu tamafa kolliava se koe California nuyucabiota mamar ! Vexe batcoba tir dika. Tidu Stone mevta koe Georgia nuyucabiota mamar ! Tidu Lookout mevta koe Tennessee nuyucabiota mamar! Tidu kota venta isu kesi koe Mississippi nuyucabiota mamar ! Sol eliwa ke kota mevtava nuyucabiota mamar ! Viele min noveter da nuyucabiota mamar koe kota wida ik widel ik widava ik soka, rokapatat va viel viele kot loriknasbeik se, Ebeltik is Batakik, Judeik ik Mejudeik, Kevotcerevik ik Katalikevik, pu sint va nuba rozilitit ise rodankatat va pulveem ke guazaf Negrospiritual : “Adim nuyaf, adim nuyaf, pu gijarotif Lorik va kava zilit, min adim tit nuyaf !”. |
| |||||||||||||||||||||||||||||||||||||||
