Keuca is Zijnuca

Keuca is Zijnuca

Bamanavaf reiz (Malia)

Lekeon tiyir gazik zijnaf maneke inaf sedenik yo wetce ‘Keuca is Zijnuca’ va jin al ikayoltad. In tiyir guazapaf. Larde ugal getcayan gan Lorik tiyir riwe tenaf, in va intafe nasbeikye se rozar ise kalir : – Vanlanic, jinaf nasbeikeem ! Va jinaf ugal al kotaskí. Malion wal win va konoleks djuwalzilí. Rwodeson van tel loklaaf nasbeik, in kalir : – Rin, taneon gokiblal ! Taneanasbalik dulzer : – Me, Gade, wal nastolikeem va konoleks taneon walzilil. Edeme, viele va Lorik al denatal, sin kalitid da rin kapbure sin va jin gogolal. Guazik kalir : – Kiewafa ! Pu tel lojotik tenur ise kalir : – Va tokcoba ke konoleks djumel ? – Pu jin zilil, in dulzer, va kota jonkawesa kiewega isu mejonkawesa, va rinaf bonoleem is talerba gildá. Batcoba pu in zo zilir nume in mallanir. Toleik pu gadikye kalir : – Va rinaf kotraf plebot zilil ! Kotraf plebot isu midusiki pu in zo zilir. In dere mallanir. Bareik kalir : – Kotrafa opa pu jin zo zilir ! Keskeon konolera va opa tir riwe merotisa ise kottan kabdue grupeik va int blagar. Opa pu in zo zilir. Dere in divburer. Adim tir siluk ke taneanasbalik. Gadikye pu in kalir : – Trakú da kot dulapkiraf plek tid puskeyen. Tok pak rotir rinaf ? Taneanasbalik dulzer : – Gade, va rinafa keuca is zijnuca pu jin zilil. Va batcoba kuraní. – Va batcoba en kuranil ? – En, va batcoba. Nume gadikye pu taneanasbalafe nasbeikye va ‘Keuca is Zijnuca’ zilir. Taneanasbalik divburer. Kaikimon, Lorik va guazaf gazik pu int dimrozar. In awalker… Kreme, tele lojotafe nasbeikye kazawayane va gojen kiewegeem (bonoleem is erba) toz jorur ise mepatason ixalar, mekrafiason ede batcoba vodanhar oke vodajar. Ta meka kiewaca va sin faver. Bata tegirinda pu Kiewegeem ilpuver maneke in kalir : – Cin va rinafa linulara tabiv. Jijasa kiewega anton gotir tixolafa. Den ‘Keuca is Zijnuca’ ve malav. Nume Kiewegeem ve griawir aze dene ‘Keuca is Zijnuca’ di tir… Digisik va plebot, dere, toz linular oklaf. Va metan kivar meie tarkar. Meguliason va bettan, va plebot kalgreber. Batcoba sopron volpuver pu Plebot dan kalir : – Jin, Plebot, va batcoba tabí. Mepusken plebot, va in preyutal ! Larde rin vaon monedil, va ‘Keuca is Zijnuca’ dená. Nume in va ‘Keuca is Zijnuca’ dere kazokever. Tel konoleyes va opa, dere, toz linular krumtaf. Va metan krafiar. Va kottan pluker ise bakar. Silukon opa keviewer nume va ‘Keuca is Zijnuca’ denar. Kotraf konoleks va taneanasbalafe nasbeikye areldon denayar. Ware dure konoleks gan ‘Keuca is Zijnuca’ taneanasbalik kalsus zo digir.

Xanto   Vergumvelt Muɲu-ka-sabali Sutesik - Piskura - Ava Bamanava Evla -   Kalkotavara   Vergumvelt Keuca is Zijnuca Kalkotavasik Abdoulaye Coulibaly Piskura - Evla 2008   Krentduga   Webesik Soundiata Krentduga Gotuenana