Pone ke mawakwikya Luz00

Pone ke mawakwikya

Froyaks Pu Jules Huret W-ye Nanye, Tide bat bueem, golde toloya uxapafa lazavapa, va rinaf yolt djubendeyé. Taneon, enide grupel loeke rinaf yolt tir abegaf gu jin. Azon, ~ intotcanyon kalí, ~ kire va bata neva albatal. Ise va bata neva, nekev inaf afreem, albatal, kire ina tir murkiskafa, kire tir blira, is blira inde va ina gildat, min… Huret abegye, va jontika divulapon ayafa vola takasupú, va sina rinon farusiyina ton ematcap dem seltafa is suterotafa vayara. Sina va jin vebed. Dume, metan lokiewon is lodaludevon dam rin, kabdue yona ayafa xatca, va gabente ke ayatira isu buske pestaleyer. Va gabente kipesise, va buske boresise va gloganyik, batliz rokatrasil ! Bata neva, jinon sanegana vey bat vergumvelt : Pone ke mawakwikya, gan Célestine R- W-ya en zo suteyer. Ba taneafa toma zo blikeyé enide va nubasuteks di worayá aze tuenayá aze va konaki ki veyon suteyé. Taneon vewayá, landume en karolason da, ton batman tazuk, ton intafa frayenuca, bate pone va tanuskaca, va mintanya diyir, nume « plekuson va jine » anton co-tuentayá. Vexe Célestine R- W-ya tiyir listanyafa… Karakeyer. Ten xaayá kire tí ayikye, turkon… Movú da kioveyé. Askison va bata kobara eruna gan ina, trabe konakliz loplekuson va konaka kolma gu bata neva, kivá da va rifemesa kava roataleyé, da va gabentafo po irutayá, ise loeke va tiyisa kontega isu blira koe bat bueem gu kona suterotamaca ikarundayá… Batse, batcoba enide gu titisa kevbenura ke konak gorestaf is grupeaf is… olukapaf malyopasik abdidulzé !... O- M-

Xanto   Vergumvelt Le Journal d'une femme de chambre Sutesik Octave Mirbeau Piskura Eugène Fasquelle Ava Francava Evla 1900   Kalkotavara   Vergumvelt Pone ke mawakwikya Kalkotavasik Sabrina Benkelloun Piskura Kotava.org Evla 2012 Klita   Krentduga   Webesik Sab Krentduga Tuenayana (2012)

Pone ke mawakwikya (Octave Mirbeau) ←   - Froyaks luz - 1-eaf luz →