5-eaf luz : Inde soka intamwon blisa abdi olgalicura oku sersaxo zo gobowed
Viele olgalicuyuna soka intamwon nuyon giblir, milinde al kalí, olgalicusik ta gira barindon rotaskir : taneindon va in vilason ; toleindon, miv sokeson ; bareindon iskeson va mweem is va int keldaskison ca culiekura is exoneson va otamafe bowere guvegesatase is gusagatase : mane bowere va batcoba ape askitir ; kire male olgalicusikafa tirka va intafa tira gir nume gruper da anton tuke battan is inafa nendara rovider ; ostik, soka nuyon giblisa gan intaf wideyikeem lodam artan lodrikon zo bower.
Sparta is Roma va tula batlize rozanudad.
Sparta koe Atina is Thebay giweyer, gu anton abictan odiason va roti ; soe azon tazdayad. Roma, ta gufeliara va Capua is Carthago is Numantia, va sin abdivilayad nume me di tazdayad. Koe Ellasa dum Sparta djufaveyer : va nuyuca dimziliyir ise va intaf mweem iskeyer voxe batcoba flinsiyir. Ta videra va bata coyunta, va jontik wid govilayar ; ta digira batcoba tiyir tel antaf mergilany. Ostik, ede bettan olgalicuyus va soka nuyon giblisa me vilar, bam goguzekar da zo vilatar. Koe mana soka, tcumivera kotviele kan iegara va nuyuca is namira va savsaf kizekseem zo lular, va namira dana ugalap ik yona kumaskira ke warzaf felisik meviele zo rorelvad. Beton xelkason, va betcoba askison, ede soka me zo solelar, ede sanelia me zo tcastar, ba taneafa katecta va nuyuca rozatar ise va yon deswayan kizeks rubdatar ise ladimvangiyir. Batinde, arti loa decemda leve levetiruca, Pisa va miremba ke Firenze kojoayar.
Voxe amidacapa tir icde patecta giblisa leve sersik. Ede zaava ke bat sersik mea krulder, giveges irubasikeem, va sint mea rodotrakas gu kiblara va warzaf felisik is nuyon me rodeblis, ta ervonarira me keyuwer ; nume olgalicusik drikon rowar oke va in konarir. Koe sokasane, volson, lotegisapaf blinelkot, lopopafa bogara, lolujapafa djujaxadara krulder, me ilsetikesa va savsavafa nuyuca isu me rotilsetikesa : olgalicusik me arkase gonogorar da va bata soka di vilar oke di soketer.
|
|
