Tel Rotik dank 05
Alubeaf dank<poem> Va tel rotik ! Toktan va tel rotik kle gruper ? Va tel rotik ! Va tel rotik vol grupet ! Tel rotik va rotuca remayer Aze va nugeem tcater, Ise va nubeem tcater Nume dakter da tir guon volgunapaf Djay ! krapol ve kaliyir Pu ebeltaf dikdatol « Va ‘dolo’ zanival aze akenon ulit, Kot min tit vartik ! » Dikdatol va finhega ve nariyir Aze ve tukotrayar aze pu int ve gayar, Aze ve tukotrayar aze pu jaxok ve ziliyir, Aze ve tukotrayar aze pu int ve gayar, Aze ve tukotrayar aze pu jaxok ve ziliyir, « Batcoba tir rinafi poraki. » Narmol ve kaliyir : Tok bat bask ta zanivara va ‘dolo’ tir ? Kalil, jaxok lodam kot min tir ? Toklizu bata lodamaca tir ? Jaxok ve kaliyir : « Stapesa, narmol ! Rin va jin voltarkal ! Voxe al dakté… » Jaxok ve mibuweyer, Ve exukeyer ; Toz zideyer ! Ax ! tisikam dem pudapa ! Jaxok va gadikye is gadikya me al wir Voxe va ava ke gadikye pulvir Va ava ke gadikya pulvir ! Afizon, leve sid griawir, Mielon, semason ieper !... Va sid toz suxayar Enide lev sid griawir : Kinokuca tir merotcizana bagera Dolge in moe tawava ; In boreon va int fu kosuxedar, Va gopa levmadar, Kan toloyi kawodafi tresiki, Kadimon divmimason : ‘toy’, ‘toy’ ! Abicbata gopa ko ita ke dikdatol ve lubeyer. Dikdatol ve kaliyir : « Ex, ex ! jinaf djaz su zo jukloter » Dikdatol ven welveyer Ta da va jaxok vangir. Jaxok vakrilon ve grableyer Ise ben snavol va int ve rumkayar. Ebeltaf dikdatol ‘tyu tyu nama’ ve evieyer, Tit vudaf, tit takrelaf ! Viele dikdatol toz evier Monion isti mielcek, Lantan kalir : « Tir puda ke vartik ! » Artan kalir : « Tir puda ke deaxolgadikya ! » Metan lev dey va nuba plekur Ta da va ikra ageltar ! Dikdatol va jaxok ve ipeyer, Nume papteyer Moe lujoroykirafe vage ke narmol Nume va inaf batakaf fortey ve mopleyer. Kretsakoraf snavol ve kaliyir : « Nhaari ! Volkalafa ! Jinaf djaz zo jukloter ! » Udutafe ayedikye ve ziadgayar, Tel rodon tipokes ve mibuweyer, Tel semas va galafa ita ve perleyer, Ve welveyer, va dikdatol ve vangiyir Nume kan ‘fwan’ kotceem ve jivotgabeyer ! Dikdatol ve lubeyer. Va in atayason, Narmol va krapol ve kevdisukeyer Ve modisukeyer aze ve kaliyir : « Krapol jiomaik, Va bata bagera wil ! » Krapol ve kaliyir : « Ex ! Rin va jinafa poura aksal ! Al kalí da coba va jin kantasa Tir modisukera va jin ! » Krapolap ve perleyer, Krapol empas va niskapa, Molaciik Kan tanoya welvera va wivga zomes, Ciafe ayedikye koe wida, Gazik gwardes va budikeem, Tel kene kuksa krapolies Tel kene bostdomega krapolies Sersik va idulaf fortey ulis, Va keraya senges, Va idulanhaf lanhey naris Ta askira va delor, Krapoloc awalker lodame werdestur. Feliik koe oga, feliik koe mola. Bru ! vru ! vru ! Dum rodafa waspla narmol ve senhayar. Krapol va inaf kapray ‘warawu’ ve empayar! Aze va idulanhaf fortey uliyir. Lorzamhala is krapol Va ‘dolo’ toz toluliyid. Tcabanhesik ve artlaniyir. Va tel rotik ve kiavayar : « Tel rotik nik, kiavá ! » « Grewá, kiavá, feliik ! Rin gaveon artlanil ! Cin a rin va ‘dolo’ fu tenukev ! Va mona kolanil, cin dun uliv. » Tcabanhesik ve kolaniyir, Aze pok tuvel ve debanhayar. Krapol jiomaik pu in ve kaliyir : « Feliik ! Toke rinafe volse tir ? » Tcabanhesik ve kaliyir : « Jinafe antafe ‘tana’ volse Tir dajkera. » Krapol ve kaliyir : « Kiewafa ! Va cinon ulino ‘dolo’ zanival ! » Tcabanhesik va finhega dem ‘dolo’ Ve nariyir nume ve uliyir, Va ‘dolo’ ve lirdeyer aze pu krapol ve ziliyir, Va finhega ve plekuyur aze ve ziliyir Pu lorzamhala. Toleon va finhega tukotrayar Aze pu int gimayar. Ve kaliyir : « Ax, kiewafa ! ‘Dolo’ ke tel rotik tir sutkafo ! » Va finhega tukotrayar nume ve uliyir, Aze va krapol ve modisukeyer. Krapol ve kaliyir : « Nun ! Va jinafa poura su aksal ! » Ve welveyer aze ve kurdayar Moe tuvelpikay, Ve krapolieyer, Iepeyer, Krapolieyer, Yatkon buudayar. Tcabanhesik ve kaliyir : « Feliik, va jin ixel, Jin va rinon volpuvesa coba me grupeyé, Me kevaliet, eim ! Va rin bliké ! » Krapol va in me rwaveyer. In va siput grutcizas, Va ael grutcizas, Va ‘tankun’ sulemye grudilfus, Va ayadol koe mola grubalies, Va ‘sensen milk grukevalies, Va ‘son’ milk grugwardes, In, oblif kabusik, Krapol va in me ve terektayar ! Inafa blikera me ve zo rwaveyer ! Koe ban kiray, Zielt tir ton tidafa gasiza, Tir keve rebava, Ex en ! Ex en ! Ex en ! Krapol me vandiliweyer ! Va tcabanhesik fu ipeyer, Dimelanimiyir, Toleon ve grableyer ta da iper, Ve illanimiyir, Kev sid va gasiza ve plekuyur, Aze yatkon ve krapolieyer. Sanene ve zo dajkeyer, zo kovudayar ! Dajken budik va kiewuca me xoler, Kovudan budik va kiblaranha me dir ! Kontoron va zielt Plekuver. Krapol va inafa blikera ikudar, Kontoron va batcoba me tcizar. Kategira ke dajken ayikap Tir eaftapafa ! In va flam baron madar, Krapol me ixer. Tcabanhesik ve epitaplekuyur Ise ve kulmeyer. ‘Kidun’ lor ! Vilt va in ve remruyur. Va taka ve koayar Aze va ast ve divayar. Krapol vadimon ve lubeyer. Fulay ! Kontoron ve ipeyer Nume ten atayar. « Toklize jinaf wed ? Kufta, toklize til ? » Kax, zamhala senheyer Abrotcanhon, Tcabanhesik mo ault va nuga ve plekuyur. Ax ! Volkalafa ! Batcoba, me tolon zo gilaskir ! Zamhala va in ve ipeyer : ‘Puyin’ ! Tcabanhesik va wed ve nariyir Nume va jivot ve sollipayar Aulttakon ‘gwe’ ! Tcabanhesik pok kot artan ve senhayar Va int divatceson. Pofo ‘dolo’ is perakejort tid meguces, Baroy belcon ve divgaelayad. Tcabanhesik tir awalkaf Gradilik al senhar Zamhala tir awalkafa, Al senhar. Krapol al luber, Zegodafa taka tir empanafa. Narmol tir awalkaf, Kretsakoraf snavol su senhar. Dikdatol al luber Al divblir. Jaxok mea blir. Vakol al xonukar Lotkol tir vumbeyen. Wil tir awalkaf. Suroga tir senhayas. Voxe ‘dolo’ ke tel rotik zo ulinsiyir. ‘Dolo’ iano kan plebotkita, me kotron zo rotulir, ‘Dolo’ vodaso va decitoy talolk, Bato ‘dolo’ me tir jiadayano. Krodoet ! Koe kaikexo me krodoera tir ! Bup ke ara tamava, Bat bup me tir kotraf. Tel rotik ! Ax ! Pu win kalí, tel rotik tir volsaas ! Tel rotik ! Denon ! Tel rotik me tir kiewaf ! Tel rotik ! Va tel rotik vol grupet ! Va tel rotik ! Kas va tel rotik al wic ? Va tel rotik ! Djay, tel rotik me zo gruper ! </poem> |
 ← 4-eaf dank - 5-eaf dank - → |
