NyagaceemScapin Nakileem01 Nakila02
Taneaf nakileem, toleafa nakila[modifier]Scapin : Tokcoba, Octave jiomaik, tokinde til ? Tokcoba tir ? Tok zvak tir ? Wí da til skaltepeyen. Octave : Ax ! Abegaf Scapin, tí buktaf, gripokolewes, tel lovolkalaf ayik. Scapin : Va tokcoba ? Octave : Icde jin, va mecoba al remravel ? Scapin : Me. Octave : Do Géronte jiomaik gadikye artpir, ise sin va jin djukured. Scapin : Ex tokcoba ! Tokcoba co-tir lidawalkedafa? Octave : Kax ! Va lazava ke jinafa guyuca me grupel. Scapin : Me ; vexe ede pu jin fure djukalil ; ostik tí vinusik, dulapesik va arienta ke yikeem. Octave : Ax ! Scapin, ede va koncoba co-roredul ike va kon foalk co-roglotcal, enide mal jinaf tigis zvak zo impá, folinyí da co-tití loon dam bli endanus pu rin. Scapin : Ageltuson, abiccoba tir volrotisa tori jin, viele djuforná. Mal kelt arse al kazawá va norlanyaca va askira va yona agralaca isu dikiadurimaca va dana wetce « nyabaca » ravlem megrupesikaj yoltar ; ise megrecion rokalí da ar abictan lodeksaf gu rob is skujera, urlickeyes va aliuca loon dam jin koe bata olukafa exava : vexe, kax ! Riwetcuca rekeon rotarson krupter acum mali nigeyera va kotcoba al ebgá. Octave : Tokinde ? Toka arienta, Scapin ? Scapin : Stuva lize gu malherot va int seleyé. Octave : Gu malherot ! Scapin : Gue, va sint skudjimiyiv. Silvestre : Rin gu malherot ? Scapin : Gue. In icde jin ve tiyir malyansaf. Icde niauca ke decemda maninde aundeyé eke di gorayá da mea askití. Rotaxe ! Va rinafa stuva pu jin reizul. Octave : Grupel, Scapin, da weti toloy aksat Géronte jiomaik is gadikye belcon totaweyed ta kazakoyara lize sintaf dulapok aotcewed. Scapin : Va batcoba grupé. Octave : Ise da Léandre is jin gan sintafe gadikye zo iskewed, jin enintenon gan Silvestre, ise Léandre enintenon gan rin. Scapin : En : va bata vajulera al verkacká. Octave : Artimon, Léandre va korenana jotafa Misrikya ve kakeveyer. Scapin : Va bancoba dere grupé. Octave : Larde tiv napik, va intafa renapara pu jin davon odiayar aze ta wira va tela yikya va jin stayar. Trasiyí da inya listanyafa vox listafa leon dam in djumeyer da co-gotrasiyí. Kotvielon va inya pu jin kaliyir ; kotvulon ebdeeson va inafa listuca isu kuca ; siskeson va inafa ormusuca ; ise pu jin nyabon pulvison va mempera ke inafa dosita, ke dana va beta pulva pu jin munesteyer, sugason da va sin dum tel lodormus ke tamava krupté. Va jin konakviele motcayar kire tiyí gustansaf va inyon kaliks ise icde jinafa brunuca va renatey va jin gronon bokeyer. Scapin : Men wí liz djufil. Octave : Lanviele va jin dositayá enide va yon korik sus va inaf fuxaplek di denlaniyiv, kou monama kene notrafa nuda va konaka ikuzapasa tema ve gildeyev. Va tisa coba eruv. Ayikya pu cin repaleson ve kaliyir da va saca dene yon diveik batlize co-rowiyiv nume, vaxede tiyiv volgustaf, ganon zo di co- konteyev. Scapin : Tokliz batcoba va min jupar ? Octave : Rilituca ve askiyir da ta tisa wira va Léandre vebayá. Va bonta kolaniv lize va awalkesa guazikya tcicena gan batcesa zanisikya is ikuzapasa yikya, tela lolistafa is lokontesa kotlize is kotugale rowina. Scapin : Ax, ax ! Octave : Artanya al nuvelayar mayakafa inde tiyir ; kire intafe tanoye vage tiyir gratcaja dem futainejaf mielewazalteem ; ise divatcetakaxa tiyir blafotafe « cornette » kavlepeyene tice taka, iskese da usuk mo epiteem lubejer ; ise wori, batinde vagekirafa inya kunsumpon vebeyer ise intafa ilka anton tiyir tcolera is mempera. Scapin : Va pisa coba pestalé. Octave : Ede co-wiyil inde kalí, co-krupteyel da in mafelaf. Scapin : Ox ! Me etraká ; ise, me wiyison, gildacká da in tiyir mempepes. Octave : Inaf ikuzeem me tiyir gexatemoyas volplinaf ikuzeem ; ikuzason in tiyir kucakontes ise inaf kranav tiyir tel lolistaf ke tamava. Scapin : Va batcoba gildacká. Octave : In askiyir da kottan boregar, mo alto ke bata awalkesikya, ke abegafa gadikya inde kaliyir, renason va int mimason ; ise kottan tuke mana andanya zo remruyur. Scapin : Tire, batcoba tir kontesa ; ise gildacká da bata andanya al askir da va in renal. Octave : Ax ! Scapin, dace bartik co-renayar. Scapin : Efe : tokkane co-roweyonat ? Octave : Moi konaka pulva kane va tulozijnara va kranav ke bata mempesa vanmananikya lagayá, batlizu di divlaniyiv ; ise pu Léandre eruyú va coba icde bat korik in trakuyur, pune fenton dulzeyer da va in listaf krupteyer. Golde pulvisa fentuca ve zo puileyer voxe pu in va keska ke man listaceem mo jinafa gloga me djunedí. Silvestre : Ede va bata nega me tulial, eldeon wan tigitit. Iskel da kan toloy ravlem tenú. Inafa takra malion koteyawer. In mea roblir ede ta vinura va neciafa vanmananikya me di lanir. Inafa ferefa worara, gan zanisikya vanpiyisa bowesik nope awalkera ke gadikya, zo dimemuded : batse inye gripokolewepese. In xuvar ise voser ise dilder : mecoba. Mbi kalir da yikya, beka kiewegiskafa is mezobena, tir ke telafa yasa ; ise da vaxede kurera va yona onkara vol naler. Gan man volfakaceem inafa renara zo tulogijar. In koe taka ruper ise tegular ise under ise sespar aze kogorar : weti barka do inya al kurer. Scapin : Gildá. Silvestre : Ostik, va dimlapira ke gadikye anton keyene arti toloy aksat doon torigil ; is va kosmara gan ziavikye va birga ke cinafa kurera, is va ara guzekana kurera do nazbeikya ke Géronte jiomaik is nuve toleaf kurenik ke Taranto. Octave : Ise moekote, va vuranuca lize bata neciikya tigir, is va jinafa merotisuca va dadira va grelera torigil. Scapin : Tir kotcoba ? Golde man grewej zo toktepec. Me jonte stubewec ! Me til kinokaf tokteyenon gan mana abiccoba ? Tetce ! Rin til ontinaf is pwertaf dum gadik ise mal taka me co-rotrasil ise koe swava va kona durimafa beya ik telaf suzenk ta tumalyara va winafa arienta me co-roglotcal ? Benje ! Stapeson ! Co-albá da lekeon va minaf guazikeem co-gonortayá ; va yontol co-coeckeyé ; ise anton tiyí jotapaf viele kan kunoy oblif randay va int ixam sugdavayá. Silvestre : Welidá da kelt va rinaf fitc pu jin me al zilir, nume me tí ormus eke gu malyerot va int roselé. Octave : Batse neciafe Hyacinte : |
| |||||||||||||||||||||||||||||||||||||||
 Taneaf nakileem |
