Bioga va Kaikeda 1967
Sommaire
AbdipulviksTela Soka se batlize belcon Biogasa, Malgrupeson va dataf siak yo turovansanan pu ayikeem gan ayafa kosmara va kaikeda, Is kagrupeson va dulap mu varaf ayikeem tadlen gan abduxoa ke diliokafa vestara va kaikeda isu malsavera, Is karolason da vestara va kaikeda isu malsavera gosokid mu kote sane, beteke intafa skapafa ik opafa vonewera tir, Is djuwebeson va vonera va mantafa walvedeyafa dotegira icde opafa lidam rokafa kerdela se ke diliokafa vestara va kaikeda isu malsavera, Is karolason da bata dotegira va vonera va belcelafa gildura ke Sokeem is Saneeem webeter, Is tolrozeson va 1962 (XVIII) goraks yoltkiraf gu « Dakteks va rokanelkoteem vertas va tegiraceem ke Soka se icde vestara va kaikeda isu malsavera » tanboyon ikatcuyun gan jadifa Koka ke Tanaraf Vedeyeem ba 13/12/1963, Is tolrozeson va 1884 (XVIII) goraks koes va agiera ke Soka se icde litokara va oglukervokiraca ik koto kalvilaso ervo anam Tawava ik inkera va mano ervo mo keltxa, va goraks tanboyon ikatcuyun gan jadifa Koka ke Tanaraf Vedeyeem ba 17/10/1963, Is nhurnason va 110 (II) goraks ke gan jadifa Koka ke Tanaraf Vedeyeem ba 03/11/1947, lanhas va galbedura djupistolesa va dilidratcera ok diliempara ok relingara iku ropistolesa iku djubristusa iku robristusa, is karolason da bat goraks icde kaikeda tir rorewan, Is enbuivenon da Bioga va nelkoteem vertas va tegiraca yo ke soka se icde vestara va kaikeda (don Tael is kota keltxa) isu malsavera, va skura va enideem is nelkoteem ke Efaya ke Tanaraf Vedeyeem, TelizeemVa vleveaceem al gorad : I-eaf telizVestara va kaikeda (don Tael is kota keltxa) isu malsavera, mu kiewuca is dulap ke kota patcta, beteke intafa skapafa ik opafa vonewera tir, zo gonaskid ; sin tid doaca ke varaf ayikeem. Kaikeda, don Tael is kota keltxa, nuyon is volsolkatcason is gropon gu miltuca is rape walvedeyafa rokopa zo rovestar ise zo romalsaver, ton kota nuyon gogurovansanasa gola ke keltxa. Koe kaikeda, don Tael is kota keltxa opaneyara tir nuyafa, ise Soka se va walvedeyafa dotegira icde mana aneyara gotufavlad ise gobristud. II-eaf telizKoe kaikeda, don Tael is kota keltxa, va vedeyafa tupilkara kan etimara va nafaluca ik savera ok kerelera betkane vol romukar. III-eaf telizTegiraca yo ke tela biogasa Soka se icde vestara va kaikeda (don Tael is kota keltxa) isu malsavera, rape walvedeyafa rokopa don Efaya ke Tanaraf Vedeyeem, ta walvedeyafa gudiliara isu gumusara is tukuvara va walvedeyafa dotegira isu gildura, zo goskud. IV-eaf telizTela biogasa Soka se va int koed da va meka oglukervokiraca oku kalvilaso ervo litokatad ise va mano ervo mo keltxa me inketed ise va mano ervo ko kaikeda betinde me rundatad. Kota biogasa Soka va Tael is kota keltxa divlapuson diliokon malsaveter. Moe keltxa senura va sayakaxo is sayakinkexo is folkay is lwira va kota ervoinda is askira va sayakafa tiura se zo kalpoud. Kevoke favera va sayakaf unenik ta opaneyara ok diliokaca me zo pour. Dere favera va ugol ok inkexo adrafo gu diliokafa vestara va Tael ik kotara keltxa. V-eaf telizTela biogasa Soka se wetce staksenik ke ayikeem ko kaikeda va djobalopik yo karolatad nume va kota rotisa tcicera todon gu walta ok faxuca ok poana mosidara mo tawavo ke ara biogasa Soka ok mogrocelara getcatad. Todon gu mana mosidara oku mogrocelara, dimpira ke djobalopik yo den Soka dem sinaf darkdirem wiluon is musapon zo goskur. Viele va tegiraca yo koe kaikeda is moe keltxa trenatad, djobalopik yo ket ana biogasa Soka va kota rotisa tcicera pu djobalopik yo ke kotara biogasa Soka getcatad. Tela biogasa Soka se, icde kota wica sinon kosmana koe kaikeda (don Tael is kota keltxa) is rotadlesa va wupe va bli ok galuca ke djobalopik, va kotara biogasa Soka ok Jadif Suteptik ke Tanaraf Vedeyeem Grustaks davon kowalzeted. VI-eaf telizTela biogasa Soka se tid walvedeyon blodafa gu vedeyafa tegiraca yo koe kaikeda, don Tael is kota keltxa, bokana gan boweref viley se ok mebowerefi koeti yo, is gu obrara ta da rape va slemakseem ke bata Bioga vedeyafa tegiraca yo zo skud. Tegiraca yo ke mebowerefi koeti se koe kaikeda, don Tael is kota keltxa, va rictara is trenafa enintera gan tela kalvekafa biogasa Soka gomukad. Todon gu tegiraca yo skuna koe kaikeda, ton Tael is kota keltxa, gan walvedeyaf grustaks, bloduca va tarkara va gewobakseem ke bata Bioga va bat walvedeyaf grustaks is tela biogasa Soka se pasusa va bat grustaks kosiatar. VII-eaf telizKota biogasa Soka diotesa va plekkabura ko kaikeda (don Tael is kota keltxa) iku tudiotenasa, is kota biogasa Soka ke dana tawavo ik inkexo se va plekkabura zanudad, tid walvedeyavilon gunaf gu kida se lazavana gan bat plek ik tana inafa tadlesaca moe Tawava ik alpoz ik kaikeda, don Tael is kota keltxa, dolge ara biogasa Soka ok korik vaon ruptes oku koeti. VIII-eaf telizBiogasa Soka vertokasa va plekkabura ko kaikeda, koe intafo mwaxo isu stujera, va bat plek tis koe kaikeda ok moe keltxa is inaf korikeem milinde tis, videter. Pilkucarokeem va plek kabuyun ko kaikeda, don vanstayan ok vegeduyun plek yo moe keltxa, is va inaf tadlesaceem, gudokotawer viele man plek oku tadlesaca tid koe kaikeda ok moe keltxa ise viele mo Tawava dimpid. Plek ok plekafa tadlesaca trasina kaike jowa ke biogasa Soka vaon vertokayana, pu bata biogasa Soka zo godimzilid, ise bata Soka abdi dimzilira va pilkomodas orig yo erunon bam godafur. IX-eaf telizIcde vestara va kaikeda (don Tael is kota keltxa) isu malsavera, biogas Sokeem male nelkot yo va belcelafa dotegira isu tcicera gotegitid ise va kota tegiraca koe kaikeda, don Tael is kota keltxa, nhurnanhason va vadjes dulapeem ke kotara biogasa Soka trenatad. Tela biogasa Soka se va vayara va kaikeda don Tael is kota keltxa askuteted ise, inde vetuigasa uzertasa keska yo is savekafa betara se va tawavanameda danesa va koara va kaikedafa dorora yo zo taruted nume oleganon kalvekon sabegason, va vestara dioteted. Ede biogasa Soka kaltrakur da tegiraca guzekana gan int ok tan intaf ruptesik koe kaikeda (don Tael is kota keltxa) oku bagalara, va funhera rotison dasafa gu ara biogasa Soka icde diliokafa vestara va kaikeda (don Tael is kota keltxa) isu malsavera co-lazavad, abdi tozura va mana tegiraca oku bagalara in va kalvekafa walvedeyafa rupera se gobokatar. Kota biogasa Soka kaltrakusa da tegiraca guzekana gan ara biogasa Soka koe kaikeda (don Tael is kota keltxa) oku bagalara, va funhera rotison dasafa gu tegiraca yo va diliokafa vestara va kaikeda (don Tael is kota keltxa) isu malsavera co-lazavad, roterur da icde mana tegiraca oku bagalara rupera zo bokar. X-eaf telizTa tukuvara va walvedeyafa dotegira icde vestara va kaikeda (don Tael is kota keltxa) isu malsavera, rape mukoteem ke bata Bioga, tela biogasa Soka se va erura yo ke kotara biogasa Soka djuseotasa va tulodrikara va disvera va talara ke darkplek ganon kabun milton rindeted. Ord ke mana tulodrikara va disvera is inaf finen gropeem kan belcelafu walkalu gan tela icdena Soka yo zo gotutud. XI-eaf telizTa tukuvara va walvedeyafa dotegira icde diliokafa vestara va kaikeda isu malsavera, tela biogasa Soka se sopusa va tegiraca yo koe kaikeda don Tael is kota keltxa, cugon rotison dojeniad da icde ord is stara va bata tegiraca yo is sopurafo xo se is benprostelaniks yo, va Jadif Suteptik ke Tanaraf Vedeyeem Grustaks is saneg is walvedeyaf opikeem givatad. Kremeon kazawayason va cenkara, Jadif Suteptik ke Tanaraf Vedeyeem Grustaks gotitir gadiaf ta da va amuzenhera va bata cenkara ravaldur. XII-eaf telizKota recela isu inkexo, varaf ugol is kot darkdirem tis moe Tael ok ara keltxa titid rovansan, koe gropa ke walduca, gan kaatoesik yo ke kotara biogasa Soka. Bat kaatoesik yo va kota guzekana worara abdion razdutud enide kuranina rupera se di rodilizeted ise ravaldura va musaca is tarutera va preksafa sopura se moe woraxo loeke di roxelkatad. XIII-eaf telizGewobakseem ke bata Bioga tir gorewan dolge tegiraca yo sopuna gan tela biogasa Soka se icde vestara va kaikeda isu malsavera, don Tael is kota keltxa, ede mana tegiraca gan tanoya biogasa Soka zo co-sopur oke doon gan ara Soka, tulon orkon gu walboweref walvedeyaf grustaks yo. Kota zvakesa askiputaca, kapbure tegiraca yo sopuna gan walboweref walvedeyaf grustaks icde vestara va kaikeda (don Tael is kota keltxa) isu malsavera, do ont stinaf walvedeyaf grustaks ont tana ok konaka bewafa Soka ke bat grustaks batlize tisa biogasa, gan biogas Sokeem zo tenekatar. XIV-eaf teliz1. Bata bioga tori sugdara ke kota Soka zo fenkur. Kota Soka mesugdayasa va bata Bioga abdi tudrumkara, rape bareafi kuparki ke bat teliz, betviele royoteter. 2. Bata Bioga ta vlabera ke tela sugdasa soka yo zo levplekutur. Vlabesiki se is yotesiki yo den Bowere ke Tanarasokeem ke Amerika is tele ke Tanaragazaxo dem Brita is Lenteeirea is tele ke Tanaxo dem Seltevafe Sovietafe Sokasane yo, dasugdane wetce daykarafe bowere se koe bata Bioga, zo daykatad. 3. Bata Bioga tudrumkaweter viele aluboye bowere, don daykarafe bowere se dasugdane koe bata Bioga, va intafi vlabesiki yo al daykatad. 4. Luxe Soka se ke dana vlabesiki yo kaiki tudrumkawera ke bata Bioga zo daykatad, Bioga ba daykarevla va sinafi vlabesiki yo oku yotesiki tudrumkaweter. 5. Daykarafe bowere se, icde evla ke kota sugdara is evla ke kota daykara va koti vlabesiki va bata Bioga is evla ke yotera va bata Bioga is evla ke tudrumkawera ke Bioga is kotara golera, va kota Soka sugdayasa va bata Bioga oku yoteyesa davon kowalzeted. 6. Bata Bioga gan daykarafe bowere se rape gewobakseem ke 102-eaf teliz ke Efaya ke Tanaraf Vedeyeem zo vertokatar. XV-eaf telizKota biogasa Soka va betara va Bioga rodrager. Betara tove kota biogasa Soka betaranalesa tudrumkaweter vielu gan tela lo biogasa Soka se al zo naleter ise azon tove kotara biogasa Soka ba inafa nalera va mana betara. XVI-eaf telizKota biogasa Soka, arti tanda kaiki tudrumkawera ke bata Bioga, kan suterafa kowalzera manena pu daykarafe bowere se rogoler da va int djudivbiogar. Mana kowalzera tudrumkawer. XVII-eaf teliz1. Bata Bioga, ke dana englavaf siatos isu rossiavaf isu espanavaf isu francavaf isu siniavaf milinde sovodanhad, ko savseluxaxo ke daykarafe bowere se zo daykatad. Tulanon rapalaf ksudaks yo va bata Bioga pu Sokabowere yo sugdayasa va Bioga oku yoteyesa gan daykarafe bowere se zo maneted. VlaberaMofolison va bata kotcoba, tel vlevef sugdasik yo, batenide verton rictayan, va bata Bioga al sugdad. Askina ton baroy tulok koe Washington is London is Moskva, ba tol-san-pereaf viel ke taneaksat ke tan-decit-lerd-decem-tev-san-perda ilana. |
| |||||||||||||||||||||||||||||||||||||||
