Erxii Mergen is peroy awalt
|
Lekepon koe kelt peroy awalt tiyid. Vexe eaftafa sukara va sid twayar ise tukerayar. Kuksa di turodaweyed ise aal di likseweyed. Sane golde idul mejepeyer ise sulem sansanon awalkeyed. Kotcoba nuvelayar merotarutena, kotcoba fu tozuweyer. Vexe koe tana gola Erxii Mergen listaf yik bliyir. In lokiewon dam bettan truyur, kotcoba inon kulmena zo uzayar. Jontik sulem isu korik kal in laniyid, eruson : « Vay ! Va peroy awalt koe kelt tcekal nume vilal ! » Erxii Mergen tiyir greciapaf gu intafa trurelimuca nume trakuyur da tiyir takrelaf is pof is oklaf. Bam vruzayar da ede kan peroya tceka va peroy awalt me co-uzar, va intaf arekteem co-gaber ise mea co-tir ayik ise va aftalava mea co-ulitir voxe va tandaf werd co-estutur ise blison koe orikafe fe leve tawa ton bilotol wan co-blitir. Ve tiyir viele in va goni tozuyur. Va peroy awalt tidepon koe kelt zekas ronutalton tanaron tcekayar. Moi tcekara va teveaf, va pereaf ropeson ve tcekayar. Vexe baon edgabia va kelt ve kootalayar nume va awalt ve preyutayar, nume tceka va ironokaf awalt vox ault ke edgabia volfikunton me ve uzayar. Batdume kalit da edgabia va irigakiraf ault dir. Ironokaf awalt gan Erxii Mergen ve zo kovudayar nume kadim taltefa mevtava va int kalion ve palseyer. Trusik ve trakuyur : « Edgabia va jinafa wira al funher ». Bam moe intaf talas okol ve lakiyir aze va edgabia toz tcabanheyer enide atar. Vexe intaf okol pu in ve vogayar : « Va edgabia vanafiznomon tcabanheté ! Ede va in artion me co-ebidutú, va jinaf vabduef inheem gabetel aze mimatal ! Bam mea tití okol volse koe gurafo xojo blití. » Vexe ton beta laniga okol vulteyer, edgabia kaikeon kotviele zavzayar ise aname sinafa yona taka takrelon talayar. Tenion nom artayar voxe okol va sveri me al rotebiduyur. Erxii Mergen zo mibupuyur nume va vabduef inheem ke intaf vultes okol ve gabeyer. Batvielu, in koe gurafo is rilafo xojo bliyir ise al vanpir mongolaf grables slakol dem trelaf vabduef inheem. Oklaf Erxii Mergen, luxeon, va intafa pulva me ve dimnariyir nume va intaf arekteem ve gabeyer. Ton ayik mea di bliyir ise ve vanpiyir bilotol. Va aftalava mea uliyir voxe tandaf werd estuyur ise koe orikafe fe leve tawa bliyir. Batvielu kalit da bilotol bene kota inha va balemoy gelt anton dir ise Erxii Mergen wavegazdon vulkur da al vanpir bilotol, ise va intafe fe divlanir ise ker da awalt tidar enide in vaon tcekar. Kalit da edgabia va okollakisik dere nuler ieson : « Va jin ebidul ede rotil ! », ise va inafa taka nomon anametalar. Dere negat da atelaki ke bilotol ton « atela ke ayik » zo yoltar, va dani metan rotestur kire folinon tir cot ke Erxii Mergen. Pereaf awalt gan Erxii Mergen luxeon wan zo kovudar nume kadime taltefa mevtava va int palser. Batinde viel is miel moe Tawava ve tiyid. |
