Nandi Vishala
|
Nandi Vishala tiyir kalafa jaftolya. Koe mona ke brahma korik pu dan al zo firviyir bliyir. Battan vaon obrapason viunsuyur. Kotvielon, brahma korik koe taya do Nandi Vishala kobayar aze ta sinkara is iwolara dimpiyir. In tiyir inaf antaf nik. Dere va int akoyeyer da puon pulvir ! Konviele, Nandi Vishala pu int ve kaliyir : « Feliik kotviele al tir vonaf dolge jin, fu lagá da va in pomá ! » – Jinaf vonaf feliik, in ontinapudon ve kaliyir, va jin terktanhal aze tagelton askil inde kalí ! Lanil ise va tel lokulaf dolekik ke widava trasil aze va doleray puon dragel : kalison da rinafa jaftolya tir tela antafa grupimpasa va decemoya lima kotrafa gu bixe is ye, va rinaf varaf megaks morbel… Brahma korik ta da va tel pulvis ve rwodeyer. « Jin lanon tí oviskaf, in ve trakuyur, noelkeon va puda se gildé ! » – Me, feliik, rin me til oviskaf ise en tir jin pu rin pulvis, Nandi Vishala, diepileson va trakura ke feliik in ve kaliyir. – Bam, ageltafa ?! En tir jinafa jaftolya pu jin pulvisa ?... in rwodeyeson ve divieyer abdi da kalir : – Vexe va tokcoba pu jin batinde dragel ? Da va intaf varaf megaks morbé nume va belunda ke varafa blira kaldrasutú ? Meviele ! – Kas va jin kle me dirnul ? Va dan kotviele al rozinulal ? Nandi Vishala ve zo gevayar. Lanil ise askil dum kalí, in karakeyer. Va jin folí ! Brahma korik ve undemeyer nume ve gorayar da askir. Arldon, kas Nandi Vishala kotviele me al tiyir jaftolyanha va dana kotinde al rozinulayar ?... Gazdeldeon, battan bam ve laniyir aze va tel lozolonaf parloesik ke wida worayar. Va valeapaf in ve trasiyir aze ve kaliyir : – Weltikye, kas pu jin rokalil : tok sulem yo moneon tid tel lopof ? – Lanon rokalí, nik, tid tel jinaf yo ! Tela lolistafa is tela lopofa jaftolya se, va rin gofolil ! – Soe kel da va tela jinafa wil nume morbé da boybetatal ! – Ox, ox ! Vexe til laopaf ! Rin va jin puvel. Kle, pu jin kalil tokenide aneyal ? – Va 1000 talolk pu rin morbé da jinafa jaftolya va decemoya lima kotrafa gu bixe is ye decemmetrolkon grupimpar… Ton levkipera fuxetolon ludzesa va gexata, volfolis parloesik batgemelton ve gorayar da va taveranha pu bat abdiwarsaf brahma korik rewar, nume ve kaliyir : – Va morbera plekú ! En tí volkeaf da va batcoba wí ! Jinafa wori popafa jaftolya se me co-grupaskid. Sin keri eldeviel kle ve kakevetcuyud. Nandi Vishala is feliik waveon ve artlaniyid. Lima se ixam tiyid kotrafa ise kotcoba tiyir vunafa. Dolekik ve pebuyur : – Ta wara va 1000 talolk, rinafa jaftolya va batcoba gonaskitir. Kabdue bat aal zavzá lizu in mallapitir. Gonimpatar kali da kabdu jin ironokafa lima tir. Dotrakul ? – Dotrakú ! brahma korik ve kaliyir. Battan gorston toz undeyer. Keskeon, jaftolya al ravalduyur da me rorodjeter nume gestiyir inde kan 1000 drikapon watan talolk co-askir. Batinde trakuyuson, laizon ve betaweyer ise koe taneafa lima lize Nandi Vishala ixam al zo vansorkayar va int ve rundayar. – Djay, abdulanil, in levgon ve ieyer. Akoyena gan ikatcun kom, jaftolya zavzayar titickenafa. – Kle abdulanil, en ! Webdaf ! brahma korik ware ve kaliyir, laizon kivason da va morbera tazdar. Dolekik yoke sugara se ke kevelik kipepeyer. Luxe Nandi Vishala, in tiyir yatkaf da baton zo askipeyer solve da pu feliik kotviele al zanayar. Ve gorayar da vaon randayer nume en ve vewayar da abdulanir. Arti konaka mekiewaskisa yovara bak dana brahma korik va jaftolya lutsagapayar, adim ve gonebkayar. – Djay ! wan kipeson dolekik ve kaliyir. Rin me ekemon foliyil da tanoya jaftolya, kore tisa popofa, co-grupaskir, en ? Brahma korik va mecoba ve dulzeyer aze va 1000 talolk ziliyir, va intaf megaks ke konaka tanda. Va mecoba kalison gabenton ve dimpiyir, jaftolya kadimeon. Konakvielon brahma korik mea pulviyir meie kenibeyer. Nandi Vishala mea zideyer voxe intafa skuyuna randayera zo argeyer. Denon, feliik va tavera riweyer voxe me tiyir ikoraf. In tolon puon ve kaliyir : – Ex bam feliik, tokcoba icde rin sokir ? – Tokcoba, tokcoba icde jin sokir ? in ware yatkaf ve dulzeyer. Pu jin al abdiplekur da va 1000 talolk watá volse va jinaf varaf megakseem su tazdá ! Jin en tí rawanik. – Tokdume rin batviele va jin lutsagayar ? Kas va rin abdion al volvegeyer ? Kas lente kobara konviele al otceyé ? Me rokayal da va jin batinde askipeyel. Undeyeson, brahma korik ve irglieyer : – Va jin ixel, nik. Ageltafa, weti konak viel va jinafa felilera al vulkú, volse batvielon en al zo esteyé, in ve moveyer. – Rin mu jin kotviele al tiyir vonaf, va rin tolon djupomá. Tolon lanil aze va dolekik wil aze va milafa morbera vexe batviele kovefara titir 2000 talolk. – Tokinde ? Vaon me digí ! ayik ve divieyer. – Va jin dirnul ! Ede va jinon grupeyen agralaf feliik dimvanpil, pu rin ravaldú da me batcetel. Karavaldun, brahma korik van dolekik tollaniyir. Batviele, battan en ve kalkipeyer : – Geltron, va rin me kagrupé ! Ixam tanon al morbel nume al tazdal. Voxe kabdue jin tolon til, jontolon dam taneon battomon morbeson ? Me, mea kagrupé, soe va oviskamik albá nume va rinafa warzafa morbera nalé. – Batcoba su zo kalir. Eldeon kle ! brahma korik levkipeson ve kaliyir. Eldeon, brahma korik is intafa jaftolya ba kakevetca uxon ve tiyid. Ayik tiyir toktenaf kire grupeyer da ede co-tazdatar, koe debalaja co-titir. Vexe zijnaf iteem ke Nandi Vishala vaon karavaldumuyur. Kotcoba sokinhiyir. Brahma korik ben taneafa lima ve demayar aze ve tidlaniyir aze va dirkey ve nariyir. Aze ton aliewepesa takra ve kabuyur : – Djay, nik ! Zijnon abdulanil ! Baton… Nume Nandi Vishala koo lo tev-decemoy metrolk va decemoya lima, lavion me sugason impayar… Dolekik itafenkupuyur ! Merotisa da jaftolya tir lipofa. Va brahma korik ve powayar : – Taxa, wal ! Tid rinaf 2000 talolk, vaon al riwer ! Pu jin kalil, tokdroe va jaftolya dolel ? Va 3000 talolk pu rin ikaon zilí ! – Ox, weltikye, vol folil ! Nandi Vishala tir jinaf lokiewaf nik ise jin noelkeon al kagrupé da batcoba tiyir droiskafa ! Vexe grewá ise boreon ! Kulaf dolekik zo ziwideyer ! Geltron, bat brahma korik tiyir oviskaf : in ika jaftolya va 3000 talolk vewar, batcoba meviele al zo wiyir ! Do 2000 talolk ton bagafa takra Brahma korik ve dimdenlaniyir. Va jaftolya ve grewayar : – Ise moekote va rin grewá da va bata tavera al zilil. Daletoe grupé da erba tir abica ! Ise dum abdion va rin wan viunsunhutú. |
