NyagaceemScapin Nakileem02 Nakila06
Toleaf nakileem, teveafa nakila[modifier]Silvestre : Scapin, askil da va bate Argante di wimí, va gadikye ke Octave ! Scapin : Tokdume, weltik ? Silvestre : Su grupé da ine va jin djukojizar nume malyerot va abdikurera ke berya di co-joar. Scapin : Me grupé kase ine va mana trakura dir ; vexe va rinaf tol-decemoy erbolkam me djuprofiner, kalison da slikcoba. Silvestre : Kal awalk ! Rem taka ! Rem jivot ! Va ine gotrasí pune kojoatá, kore moe krafol blison di klibutú ( Argante, enide me zo wir, kake Scapin skotcason palsenon zavzagir ). Scapin : Weltik, bate gadikye ke Octave tir budafe, nume va rin rotir me kivatar. Silvestre : Ine ? Ine ? Ko fortey ! Rem taka ! Ede batlize co-tigir, ko jivot vere co-dugá ! Toktan bat korik tir ? Scapin : Me ine, weltik, me ine. Silvestre : Kas tir ke inaf nikeem ? Scapin : Volgue, weltik, volson, tir volnapik. Silvestre : Volnapik ? Scapin : Gue. Silvestre : Ax, fotce ! Zo felbé. Til volnik ke bat Argante facilik, ex ? Scapin : Gue, en, dulzoé. Silvestre, ~ va inafa nuba figon narir ~ : Batliz uzal, uzal ! Va rin bosá ise poron vogá, kan buren dug, kan kota rotiyana vruza, da abdi miel gu bat tozekik, gu bat Argante facilik, tunuyatá ! Va jin dirnul ! Scapin : Weltik, koe bata patecta tizuca zo soreyur. Silvestre : Va kotcoba nulé, ise va mecoba rodrasú. Scapin : Ine efe kalobratar ; ise va jontik vuwik isu nik isu kwik dikir. Ape va sin kev rinafa vidjera faveter. Silvestre : Va batcoba eruckú, fotce ! Va batcoba. ( Va dug divplekur aze kotliz platir, dumede jontiktan lenteon co-tigid. ) Ax rem taka ! Ax rem jivot ! Aje va ine is inyon nik dure me trasí ! Aje lent jin do bar-sanoy korik me awir ! Aje va sin ipes dem ervo koe nuba me wí ! Manon, webdik, va jin laoon dilfuc ? Benje, fotce ! Atá, meumbeson ! Acon lyumá ! Platí ! Va nuganya, va ita ! Ax ! Facilik, ax ! Gedujik, batliz djudugac : pune fu uzearsac. Levgic, webdik, levgic ! Tetce ! Va bata dugara ! va bana ! va ara ! ware ! Tokon, dimelanic ? Va nuga axon, fotce ! Va nuganya ! Scapin : Ex, ex, ex ! Weltik, me tiv ke ine. Silvestre : Batinde grupetec da va jin me govetsunec. Scapin : Kle, rabateckel ote korik ika tol-decemoy erbolkam zo atatad. Ox ! Va falapa mu rin pokolé. Argante, ~ skotcapason ~: Scapin. Scapin : Ixedá ? Argante : Xaá nume va tol-decemoy erbolkam zilí. Scapin : Zo felbé, va rin albason. Argante : Va in kevlanit, bene int gí. Scapin : Va sin pu jin opelon deal. Ta videra va poruca, larde al bevulal artan, batliz me gonawil ! Ostik, kivá da ede ine va rin co-kosmar, pune lodroe co-roterur. Argante : Efe, vexe co-albá da wí inde jinafa erba fu zo zilir. Scapin : Kas va jin budaxal ? Argante : Volgue ; vexe… Scapin : Fotce, weltik, tí ont nyagik ont telik : bat vols ban oke ban vols bat. Kas va rin co- djulevcoé ? Ison va dulapok araf gu tel ke rin is jinaf feliik do dan djuvangluyal, koe bata arienta co- aneyá ? Ede zo uculegá, pune va koncoba mea forná nume batvielu va artan vandelvejatas va rinafa arienta di gotrasil. Argante : Kle gil ! Scapin : Me, weltik, va rinafa erba pu jin me nafel. Tití sensaf da va artan fu favel. Argante : Lorik ! Gil ! Scapin : Me, kalí, va jin me dirnul. Kas grupel ede va rinafa erba me djugralombé ? Argante : Gil, kalí, va jin ten aklel ! Voxe modoval da va int gu in abdinendal. Scapin : Iskel da askí, me ti fitulik. Argante : Dene jin va rin fu ké. Scapin : En lanití. Batse battel. Va bantel gonaneyá ! Ax, fotce ! Batse in. Nuve kelt va sin, va bat az ban, ko jinafa dona vanstar. |
| |||||||||||||||||||||||||||||||||||||||
 Toleaf nakileem |
