NyagaceemScapin Nakileem02 Nakila02

Nhagaceem ke Scapin

Toleaf nakileem, toleafa nakila Géronte : Tokcoba bata arienta batviele rotir ? Lorotaf dam tel inaf ! Sedme jin, va toka rotisa lorotaca me gildá ; ise krupté da kurera voldo finera ke gadikye tir tegira kaike kota gesta. Ax ! Rin batliz. Léandre, vultese enide va in dablur : Ax ! Gadikye, va mana daava peztalé wison da dimpil ! Géronte, vewase da dablur : Aulon. Pulvimit ! Léandre : Mejel da va rin dablú, ise da… Géronte, va in toleon malplatison : Aulon, pu rin kalí ! Léandre : Va tokcoba ? Rin vewal, gadikye, da pu rin dabluson daavamuxá ! Géronte : En, va koncoba godimaotcet, kottol ! Léandre : Va tokcoba ? Géronte : Ronton ranhel, ta da lenteon wí ! Léandre : Tokinde ? Géronte : Va jin ititon disukel ! Léandre : Ex, bam ? Géronte : Tokcoba batlize kle al sokir ? Léandre : Sokiyisa ? Géronte : En. Va tokcoba al askil bak da tiyí gracaf ? Léandre : Gadikye, va tokcoba trakul da al askí ? Géronte : Me tir jin trakus va rinafa askira, vexe va rinon askiyina coba erú. Léandre : Jin, va meka temenaca al askí. Géronte : Va mecoba ? Léandre : Me. Géronte : Rin en til lanaf. Léandre : Tí lanaf gu intafa volgunuca. Géronte : Wori Scapin icde rin al kalijí. Léandre : Scapin ! Géronte : Ax, ax ! Bat yolt va rin tukerar. Léandre : In icde jin va koncoba pu rin al kalí ? Géronte : Ta tuvlardara va bata arienta bato xo tir kalvekansafo, nume arlize fu rindet. Ko oga lanit ! Artimon dimpití. Ax ! Zatkik, ede rin va jin al griporal, wetce nasbeik va rin co-kaagdé acum co-rogoral da va jin narmon otcel.

Xanto   Vergumvelt Les fourberies de Scapin Sutesik Jean-Baptiste Molière Piskura - Ava Francava Evla 1671   Kalkotavara   Vergumvelt Nhagaceem ke Scapin Kalkotavasik Staren Fetcey Piskura - Evla 2006/2008 Klita Kalkotavaks   Krentduga   Webesik Vieux Daniel Krentduga Tolbeliyina

Nyagaceem ke Scapin (Molière) Toleaf nakileem ← 1-eafa nakila - 2-eafa nakila - 3-eafa nakila →