Antoine de Saint-Exupéry
|
Antoine de Saint-Exupéry (29/06/1900 koe Lyon – 31/07/1944 talason griawiyis) tiyir francaf suterotik is severostasik. Inafa bagala va tanealik koe severoind is va gejaseverostasik va mweduca zilitir enide va intafa staksapa bilder : tir tuke kaikfira va int da kontan vanpir ayik. Exulera[modifier]Saint-Exupéry bak 1900 koe yasa ke francaf is oluaf glastapikeem koblir. Do aluboy berik va kalaf rumeugal walzilir. Vexe bak 1904, gadikye takradeonon levgon mulufter, iskeson va antafe Marie de Saint-Exupéry vartetese va tevoy nazbeik. Do berikeem in va poneme suteyer. Gadikya va man abdievlaf nyobrugal kiewon ik roton ugalayar, vexe intafa tuwavafa kiewatrakusuca nover da in va vebanaceem lentetir. Tison gustapaf, do Antoine va yona gelukafa gluya layeyer nume kotoulon zilison va intafe kiewe va donafa gaara puon di firviyir. Pu sontene nazbeikye va ganon kotliron videten vodeem remziliyir : va teluca is artantarkasuca is seltafa medivlapusuca. In tir cugunaykikya ektusa va kotafa blira pu nazbeikeem, ton ayikuca arayatana gan Saint-Exupéry bal kota koyara. Saint-Exupéry koe Saint-Maurice de Rémens vanmiae berikeem va kotaf rumeugal ugalar. Tele loliste ke intafa blira, in logaveon kalitir. Vexe bak idulugal ke 1917, piza askir da bata rezatcafa trutca roidar. Waleniskayrotepeyeson, François nastolafe berikye, vefaradositik, mulufter. Tir atitsusi blirakipi ke Antoine. Tanoulon, in vanpir mal sardik kal yasokilik. Vanpir ayik. Arti sanda, kotcakola va Marie-Madeleine berikya soltiolter. Bak 1926 in gan Didier Daurat (gadesik va Latécoère az Aéropostale) zo segeyer, taneon ta piutesopura kan severotalara mal Toulouse kal Dakar (Senegala) edje va taneafa neva sutelayar. Bak 1927, wetce soktokilik koe Cap Juby koe Magriba zo dasugdayar, vuidan ta tulokiewara va skedeem ke sistu do yon mauraf solsiik is dere espanikeem ; batlize va Jean Mermoz is Henri Guillaumet di kakeveyer. Ta vonera va Aéropostale sistu kale Patagonia bak 07/1929 va toloy battel ko Geeamerika kazokeveyer. Bak 1931 va salvadoraf suterotik is yambikya Consuelo Suncin Sandoval de Gómez (mulufteyes bak 1979) koe Agay (Franca) kureyer. Mali 1932, remi da sistu uzertanu gan gaderopa tir debalajafu, ektudason va sutera is felikeba in lirkkiron lapter. Bak 1939, ko severoervolia lize va severofa pilkomodara sopur in klioton zo dimemuder aze ko New York va Franca bulur mukotason da va amerikikeem kogejar. Aze bak 1942 ko Québec. Wetce gaulleevik gan kontol vox pétainevik gan artol estovan, flecur da intafa puda zo gilder. Vexe tenon tre sugapara, bak 1943, in ko intafa savsafa pilkomodarabraora zo lajuplayer ta konaka afigasuterafa vuidara vamoe Franca ik Germana ik Italia, krupteson da antaf pakes kontan tir mwedaf ta vrutara va bifeem. Ba 31/07/1944 bal severofa pilkomodara vamoo Marseille gola in griawir.
Inaf grabom[modifier]Ede in me tir kotron mivtanizvaf, intaf grabom zo koswayar gan intafa blira ke piutef severostasik. Rade Le Petit Prince (Sersikam), lanon tela intafa losanefa kiewatca, loon ezlaf is trakuropaf reiz. Vol de nuit (Mieltalara)[modifier]Sanegayan bak 12/1930, bat grabom pu Antoine de Saint-Exupéry va Femina francafo suterotafo Poradro ve vodayar. Va jontika kalkotavara nazbayar ise elpatafa zalera pu Hollywood dere di zo doleyer. Mali bata ilana, severostasik pu suterotik loloon rundiskeyer. Citadelle (Widaki)[modifier]Bak 1936 bokayan, bat grabom gan Saint-Exupéry me ve zo tenukeyer. Sanegayan bak 1948 koe taneaf siatos male geltsuteks, va varaf trak ke sutesik me ruldayar. Tel nubasutekseem bak 1948 di zo bulkayar nume di noveyer da inaf xialareem loon zo tarkar. Citadelle me tir tenukeyen grabom. Koe trak ke sutesik, zo co-gobasgamar ise kare lirkkiron rodimjoan nustaf azed zo co-gofabdur. Sutesik va milaf watseem fereon al dimnarir, ta da lodelimafa muxara ok koafira va bat kan tana ewava ke dana in va birga digir. Le Petit Prince (Sersikam)[modifier]Neva bak 1943 koe New York zo piskuyur. |
| |||||||||||||
wp-de:Antoine de Saint-Exupéry wp-en:Antoine de Saint-Exupéry wp-es:Antoine de Saint-Exupéry wp-eo:Antoine de Saint-Exupéry wp-fr:Antoine de Saint-Exupéry wp-it:Antoine de Saint-Exupéry wp-nl:Antoine de Saint-Exupéry wp-pt:Antoine de Saint-Exupéry wp-ru:Сент-Экзюпери, Антуан де wp-tr:Antoine de Saint-Exupéry
