Balemoya proyikya ke Araba
Balemoya proyikya ke Araba
Balemoya proyikya ke Araba[modifier]Ugale grelt, nuyaf is gondules, va broca moe moavayafe bixe ke Araba tienduyud, yikya ke letaxo tiyid oklafa is ciafa, zijnafa nek krenugafa, karolana is sontena gan ayikye ; tiyid miltik, ise va mil rokeem pojayad. Batdume va yerumanik tulon ronozambeyed, nume ayikya va woyok ke dofa broca opelon rovebetayar enide pu yerumanik sugdalayar da in di tiyir nuyaf. Viele sielon vanlaniyir, mea trasison va tuvel koe gubefa runda, gildayar da va pikay mea ronoremlaniyir, nume eruson va meka pebura illaniyir. Bata ayikya va intafa ceakuca grurojuyud ise malyedayad da ina tiyir tela sinafa tciamaca. Jontikviele va awalkera lodam volporuca kiblayad ; tulon bate tcumpafe Fatime, gralomeyene, ticu rundanyan wegidol va int takasotceson mimar nume batkane ataweyer, enide va rena ke intaf cenesik divvawayar. Konakviele bata listafa arabikya tiyid ezlopik ; va yona vartafa lyumara kareizuyud, i va yona aliafa stuva, va siskera va gradilik dankagayad, va nyukik gu vligura anzayad ; lecen, sedme sina, buduca tiyir tela listafa ayikyefa ceakaca, ise va kottelye bristuyud ise gu lyumara va platiyid ise koldayad, lodame va sinafa pirtuca kan dwiracka co-tutulwayad ike va zidera is gejafamafa lujuca co-vandiliyid. Nega pwader da lanviele kota nazbeikya ke savsaf gejik yoltkiraf gu Find, sposafa gu listuca, wison da bak ralentara ayik ke grelt tuaxaweyed ise klabuyud, va italkeem ton lugodafa volwerkuca levgon soltiolteyed aze, riwe lebafa, vanmia lyumasik ipeyed. — Me yatec, gejik !! ~ iegayad, ~ lecen mantode va sin kir parodjik volbagaliaf gu rena co-yategav ! » Va volnik ipec aze xultuc !! Gu bat meld dum blucte dem fortey is moava va int vagec !! » Battode ko cinaf meem va int gu cenera tildetec !! Vecan gejik gin lyumayad nume grelt moceneyer. Batugale, sutera men kruldeyer, nume artukafa prostewa va izva ke kot gradilik is ezlaf dankeem oxiloxilon gigoleyer. Batdume jontik skuks al griawid ; jontik yolt tid ilgrupenaf ; dile, volson, yolt koe nami ant zavzagid. Mancoba pakon dilizer, icde bata balemoya ayikya tiyisa sposackafa num riweyesa va semek vas « Balemoya Proyikya ke Araba »; sinaf yolt re wan tid sposaf, vexe sopron vaon grupenset. Tana tiyir yoltkirafa gu Sohr, nazbeik ke Lokman ; toleafa Djuma nazbeik ke Djadis ; bareafa Amra nazbeik ke Amir Malyik ; ironokaf Hind nazbeik ke Xus. Icde Djuma is Sohr va mecoba grupet vaxeda sina va gildatcapa is proyucapa digiyid, ise sinafa malyedackasuca va jadifa mafelara puon vodayar. Icde Amra rilitafa rupama zo kareizur : gadikye tiyir malyesik is okilapik ke grelt. Korik va Araba kal ine ilulaniyid enide va kon volfakaf uum gu inafa bagala is proyuca di atoeyed. Ine jontikviele miltekackon somalyedayar, vexe klaa va swavagwiduca loloon toz tuaxayar nume dile memalyon kogorayar. Lanviele Amra, kake marwida giterektasa va flidera va arienteem, pu gadikye kaliyir : — Retomon al roklal ; rinaf restaliks tir memalyaf. — Ovel, nazbeya, ~ abicedje undeyeson guazik kaliyir ;~ sel va jinafa kerava tutapedar, trak dile yater dumede likon modá : batdume, kalobrapatal kotviele malyeté, nume ede va kona konjotera ke jinafa swava co-sonketel, pune wetce walzera va peyara mo sid di dentatal !! Batvielu, kotviele Amir va vordava ke nazbeik gildeyer, gin kalobrayar nume va malyera mea roklayar. Vey bata stuva urima krulder : « Tel proyik somefolkir merotines : proyik kan peyara rekeugalon zo somewalzer. » Hind, nazbeikya ke Xus, tir tel tcumpik ke bata balema, ise jontika inafa trakura gan prostewa al zo vided. Va zultafa musafa witca nuve gruteyer. Kal zidotsa gruwiyir, nume tanon disukeson, va kotrafa nakila is beta pinta sovangrupeyer. Lanviele, kabdue broca vanmiae konaka yikya moe bixe debanyeyer ; do yastafa perfava waganyesa moe nubok vefayar. Laizon, zverimilk ticepon koe kelt va lospa vamootalayar. Hind itamadar aze va bat blokak vere luwiyir :
Zveri va sid pokon motalad, mon warula liz gilulid. Yikya melorason vanlaniyid aze patayad, sini tiyid tev-san-tevoyi. Tev-san-tevoyi do bar-san-bar do tan dum decemoyi ; tanoya disukera al stapeyer enide Hind va sini di ropatayar ise va tela katca di rokagrupeyer. Inafa swava lidamu disukera tiyir gwidafa is wilufa, nume icde kota bibera meklabuson gidulzeyer. — Sedme rin, toke ayikye tir tele bagaliafe gu karolanuca ? ~ lanviele kontan eruyur. — Tir, ~ Hind dulzeyer, ~ ayik listaf gu gexata is ubaf gu alto, dem ontinaf is femaf nimat, dem oklafa berga, dem bagafa is blifa laniga, gruf is vonaf avik balte vajules va dulap ke artan, gilerumb vox someerus, firvirsis va emudesa azega vox va int meganes den artan, rundilis va berik is somemotcas. — Voxe toke ayikye tir tele rotafe ? — Tir ayik lukastiskaf, trelaf is alnaf, dem strokafa godela, keniberses is plekus mo artan va viunsura va intaf arienteem, dem poiskafa ma, nek soustas va valevik, lidiskaf is mefavlaf is mekobas ayik, kontan gimeterektan is somevegemb. — Ise, sedme rin, toka ayikya tir tela galpena ? — Tir ayik dem aftafa is remawisa alma, dem kofigas gaeloy ; tel somekaiklanis va tuvelpikay, lasugudas va trig gu eksa, trumaf gu exoma, is fiste gruplekus va lava ko vrod is grubowes va megaks ke yasa ; voxe lokiewafa ayikya tir tela gisa moe ma va nazbeikye, dem are nazbeikye radimelanise, is dadisa va bareafe nazbeikye koe jivot. — Voxe toka gonakladana ayikya ? — Tir mazdaf is odayaf ayik, dem orikaf biak, dem ontinafa is kizoyusafa puda, lanison tusukasis is madas va gopa, gis kan nuba va nazbeikya vox kotviele radekatas va ocikya ; adim tir tel pulvis viele gostivawer voxe stivawes viele gopulvir. Bata askiputafa proyuca, tisa tana riwedara ke Hind, va klok is lozijnafa ezlopa me divlapuyur ; in va tuwava is darka is govitafa ilamkuca ke letaxo albayar. — Mecoba tir listafa, ~ diviegayar, ~ loon dam ilon kozwira va lanis grelt tice bria, ke dana soayan broceem is milkikeem is wegidoleem moe kelt liotawed, i moe turolmukan ba titawaltara ! Va yon lidaf undeks ke in isu emonjelk is konaka pimtasa ezla dem katcalaf noglotaf is ksevakiraf martig dadit. Ware tir ayikya alion tunuyayasa va intaf grelt gu krizafa jiomikafa roka anamstegeyena gan kalstegesik. Ofaira, ikayoltkirafa gu Intropik, oluafa velikya ke Djadis grelt, ba siel ke vidia, kare prostewa pu Imlik bowes wetce gazik va ocikeem ke Djadis, zo zurteyer. Bat jotaf aguntanik, ziderses, div gazafa broca otceyer, aze, boredapasa is ton sukezas usuk, iegason kan pana puda va grelt koevulteyer : — Ax ! nazbeikye ke Djadis, ko toka struca al lubec ? Kas mancoba en tir ? Meriyomawalkeson tcizac da winaf aguntanik iku yerumanik zo situndad ! Voxe tic ayik is loote dam mical ! Ax ! Mea tic bagaliaf gu blira, ede va awalkera gu bata krizafa levplekura kunon me abdualbac. Me, mea tic ayikye ! Va int kofigac, va ayikyafe vage diskic, va intaf iteem gu xol dorora tuebeltac, ise va florma gampec !! Ae tokdume me tic ayikya ise tokdume me tiv ayikye ! Va winafi goni co-ravev ; vexe, grupec, tove kottel oklon merodetakamadas is medjuprorojus va cin, va vligura anton satolev. Bata olukafa zidera va kro ko tabodjarsana gloga ke jontik greltik ke Djadis divmodayar ; berikye ke Ofaira isu aguntanik va urbera pu int kodirgayad : Imlik ko ikse zo sumpayar, aze do intaf aboyikeem zo stakeyer. |
| |||||||||||||||||||||||||||||||||||||||
