Firdausi

Abul Kasim Firdausi Tusi

940-1020 Persavaf ezlopik

Firdausi Tusi ( فردوسی طوسی Persavon) Firdausi, tir kan bat yolt ke dan xanta tir melanafa da Abul Kasim Mansur ibn Axmed ibn Faxr ed-Din tanoy persavaf ezlopik gilton zo yoltar. Moni 940 koe Cadab widel poke Tus koe Xorasan winka Firdausi ve kobliyir aze delapon zo gaayar ; va persava is mafelon digina arabava is paxlaviava belcon vayayar. Icde inaf jotucaf is milon oyaf tandeem abicon grupet ; anton da in va keafa vayara ta grupera va savsafa persafa izva askiyir ise da tiyir pegaf gu yoni icdefi cenkasiki rotrasini koe yona paxlavifa ugalda, pilkovon koe Danicver Dixan dotay. Lanamon, in va tugeltratan abdumimaks va ezlasutera va izva ke Persa ixam kobrayar, vexe va in Dakiki icdeon abdifiyir. Yoke folvafa awalkera ke battan bak 980 davon kokobayar, faveson va fosaks ke tel abdifisik beka konakviele vaon mekuvon karolayar. Tiyir rekolanya ta siskera va yona sega ke yon iranaf gradilik. Bardecemdon belkuyunon gan arabaf seltay, persaf vedey va gaderopafa is suterotafa volruptesuca boreon fu dimtrasiyir. Korik koteyaweyed kan yona nega va savsaf persikeem ; tiyid kalaf dimtrasison va man olukaceem, ise va po ke vedeyeva satolena akluca tulobliyir. Acum taneaf blok ke Firdausi boreon remotalayad. Bata poraca me stapeyer pu erbakiramaf ezlopik ; in va erbalevgisik olegayar. Va tan taneon trasiyir : va Abu Mansur bowesik va Tus winka, vexe inafa ezla men tenuweyer viele Abu Mansur ve awalkeyer. Bam tison 58-daf Firdausi va dendara ke tugazaweyes Xazni Maxmud kaaneyayar. Ko Xazni kle lakiyir lize, golde lickuca ke gazezlasikeem guyawes yoke licrakef kevlik, in flecupuyur da zo kodlapayar. Wori va progesuca ke sersik al kiewaskiyir ise tison porakirapaf is kulapaf va grabomeem diliodon co-gotenuyur viele aboyafa skujera va fol ke Maxmud kevon ripindayad. Tison aundapaf is zidapaf ise kabuyuson mo sultanik in va udutafa kleca va Xazni buluyur aze, enide va kaaneyareem kruleyer, widavawidavon lutceyer. Milon koe Bagdad El Kadir Billax xalifik, tori dan va Yusuf is Zuleixa ezlayar, va dendara kev ziduca ke Maxmud me ebleyer, acum ko Tus ixam guazanyafi Firdausi dimlakiyir lize bak 1020 moion awalkeyer. Zo negar da adim Maxmud sultanik, raveyeson va yona skujera tukosayasa va ezlopik, al eruyur da in vanmia aboyikeem di dimpiyir ise va yal dem 400 000 moavatalolk al stakseyer. Viele va tan tuvel ke Tus kamba zilisa va yal koolapiyir, enide ko awalkikxo zo stayar alto ke Firdausi va ar tuvel divolapiyir. Nazkeikya ke ezlopik vewayasa va stakseks pu gadikye, ta vegedura va oblasiki djukolnayani gan Firdausi erba zo uneyer. Aldaf suteks ke Firdausi zo yoltayar kan Cax-Namex (Neva ke Gazikeem) ; tir ugalafa nega va bifeem ke Persa bak 3600 tanda kali 636-eafa ilana, trabe evla ke islamafa olgalicura. Vaxe Cax-Namex, ke Firdausi anton zavzar Yusuf is Zuleixa ezla ; tir kridjoveks gan Alkuran neva va yona regala icde skeda ke Yosif do kurenikya ke Putifar.

Abul Kasim Firdausi Tusi  Blira 940-1020  Ava Persava  Suterind Ezlopa   Suterot Cax-Namex (Neva ke Gazikeem) Yusuf is Zuleixa

wp-de:Firdausi wp-en:Ferdowsi wp-es:Ferdowsi wp-eo:Abol-Gasem_Ferdoŭsio wp-fr:Firdawsi wp-it:Ferdowsi wp-nl:Ferdowsi wp-pt:Ferdusi wp-ru:Фирдоуси wp-sw:Firdusi wp-tr:Firdevsî