Kev Digiraroka Babeuf
gan Gracchus Babeuf
|
Dum jin va riga ke nelkoteem gu darsafa digiraroka dozilil. Do jin va volmweduca ke bata roka dojenial. Ruyel da batcoba tir tana lowavlafa redura ke ayafa roklera. Dere kagrupel da batlizu kota minafa fogra isu skeura isu gomilara isu rotinda malfid. Viele bate sane zo koafir, va bata tciamafa ageltaca rogilder ise pegon djuprovangruper : ilt va kottan pasud voxe tawa tir ke metan ; ise viele Antonelle batlize tigir ise dere kalir djam dodasok tir tel antaf malyaf ; eze bat sok mek diliodaf is enkalaf selt rokrulder djamarse ; me gildá dume tele Sane, denon djumese va intafe kiewe, nume djumese va kota malyaca isu vonaca, me zo co-rojupar da va djublira koe tel antaf sok ke diliodaf is enkalaf selt fawokon fuxar. Sume rokalira da ugale ilamotara ke rofavera va digiraroka loeke zo burer : sumeon da bata baliafa kizera va aludevarsaf zaeem bam zo co-rokalir, sedme jin ina va jontik femok volson nudrasur, dan, mea gluyason belcon va yona nelkafa levgira, va aal gu tela lodrikafa widlasira wonad. Va jontik medigisik askic, va sin pu vumbesa warkuca ke abic tolgenisik jovlec, zaeem ke baliafa kizera va digira mea tid merodimaotcena. Fure asregenik zo askid da unded ise kagruped da batcoba tir ageltacapa, da ilt va kottan pasud volse tawa va metan ; da ilgrupeson va batcoba tit eglunaf ; da batcoba tir oviskapafa ortara ke lok ke wideyikeem, zavzason levetiraf is kosaf gu ristara ke lek ; da va int metunuyara gu mana mirembara tir kipeaca ; maninde medablura va gesiarasok, antaf malyaf is vonaf, antaf rapalaf gu karaf pestakeem ke tuwava ; sok eze dan mek diliodaf is enkalaf selt rokrulder. Francafa Artowara pu min al kowazdeper da yona rofavera, wori savsafa, me tiyid merosoltawana ; volson sinafa ilamotara isu leguca gu sinafa krulderapa va vilara lodirgulon al yaned. Artowara pu min al kowazdeper da Francafe Sane, wori guazafe sanepe, soe me tir merodevanikatcuse va yona betapara va yon inaf kizeks is merodefinese va wetapara ta tulokiewara va sin. Kas mali 1789 va kotcoba me al betar, rade bat antaf kizeks va digira ? |
| |||||||||||||||||||||||||||||||||||||||
