Krapolye is okolya
|
Konviele lekepon tiyir gazik. Gazikye renase va kurenik ke tan ruptenik. Lanviele, ine askiyir da ruptenik piyir aze ko ilefa patecta vuidayar. Ruptenik mallaniyir. Gazikye va inaf kurenik worayar aze kaliyir : — Do rin va afizcek fu tiskí. In dulzeyer : — Do rin va afizcek ? Ine kaliyir : — Gue. Ayikya zo toktepeyer, nueson : « Tokcoba va gazik roplataer enide in dene jin va afizcek di tiskir, edje va kurenik su vuidar ? » Vexe, wetce gaanyanik, gorayar da va namulolye di atayar aze ta tuporara di egayar. Vani burmera, va estuks baron pakayar. Azon va sarmeem vetcoyeson deraykayar aze va gazik zanivayar. Gazik va intaf nubeem tcateyer aze va modivatcesiki malaykayar. Va taneaf estuks bokayar, estumuyur aze divpakudeyer. Azon va toleafa sarma nisayar voxe wiyir da mil burmeks koegiyir. Estumuyur aze malplatiyir. Azon va ironokaf estuks nisayar voxe rabateyer da tiyir mil burmeks. Bam gazik vangrupeyer. Gildayar da ayikya ganeyer enide ine di naruyur da kota ayikya, banyona iskeyena koe inafa mona is bata nesana, tid nuxafa. Gazikye va xiz diskiyir. Viele va nubeem tcateyer, va xiz ko lava drasuyur. Kot oluik, yoltkiraf gu garmi, wegayepeyer ! Batdume gazik va drasura va xiz me murobayar. Kreme senyayar aze dimdenlaniyir, aze va xiz vulkuyur. Ayikya va xiz kayestayar aze leve takak suyur. Teni vuidara, kurenikye dimdenlaniyir. Mo ilava senyayar aze va xiz kosmayar, voxe me kategiyir. Va mecoba pu kurenik kaliyir. Kevoke va ilava jovleyer ise gorayar da mevielu moe sid di senyeyer. Ayikya gan bata linulara zo duxapayar. Jontikedje ekeyer, kal rejdewera. Radimion den gadikye laniyir aze va int pu ine odiayar. Gadik va gazik gu arienta fure koerkeyayar. Va kurenikye dasugdason, kaliyir : — Pu batse ayikye, va jinafa okolya al viklunyú, eke ina dun ayudar ; azon al gorayá da pu battel al odiá. In va okolya al konoler nume al kiewagiyir, inde bettel sekas lev inafa mempera soluber. Voxe azon in al mea dulaper. Djugildá dume, djumé da battel vengar. Gazik va kurenikye powayar. Eruyur da ine di vengayar. Kurenikye kaliyir : — Va okolya, gue al kiewagí, eke bettan sekas lev inafa mempera luber. Voxe dure va inafe okolxe kolú nume va conyuta ke krapolinia kosmá. Okie jin, va krapolye kivá. Batdume va ina al illaní. Bam gazik kaliyir : — Battode, dimdenlanil ise va rinafa okolya wan kiewagil. Krapolye va rinafe okolxe rotir anton koolaniyir, vexe va inieem mea plekutur. Moi batyon ravlem, tcokesikeem buluyur, me remruyuson va ageltafa bula ke bata atatcera. |
