Mauprat

Bat teliz tir kotavaf suterotvildeks vols kalkotavaks. Ta pomara icde bata telizinda, va Suterotvildeks teliz disukel.

Mauprat

Rupa Bernard de Mauprat ba sanda va gadikeem al drasur. Nume lev ruptera va Tristan de Mauprat ziavik is inafe toloye nazbeikye al luber. Sin va in al lafirugad. Bat baroy ayik, ironokafa anga ke govitaf is udutaf oluikeem, dodubieson blid ise va vegungikeem kovudapad. Edmée de Mauprat kosyikya ke Bernard, egluyusa mon vreda ke Mauprat yasa, gan sin zo gralomer. Bat rostazik plataed enide Bernard va yikya di boer. Tufican kan ruyat, Bernard laskur, voxe yikya lajukagir aze do in otcer. Vask ke Mauprat yasa gan yon batultik zo dilfur. Mona anteyawer ise ziavik ke Bernard is toloy nazbeik bevulad awalkaf. Yikye gan Hubert titbiptik, gadikye ke Edmée zo emuder ise ta puvera pu Edmée djuprovayar. Vexe nekev jontika sugara, in va inafa abdugara kalvewar. Nume ko Amerika do ervolia ke Lafayette mallapir lize tevdon zavzar. Viele dimlapir, va antafe Edmée katrasir. Va kurera tolerur voxe tolvewar. Vanion, bak tcabanyera kan zeltara Edmée zo balier. Bernard ven gu gomilara zo uculer nume zo koflintar. Edmée, dimon galese, va in tcelmar. Ageltaf gunik, Antoine de Mauprat mexonukayas koe firdera ke intafe lamone, zo kosmar. Radimi bata ironokafa satolera, Edmée gorar da Bernard adim tir bagaliaf gu in nume va sint kured.

Xanto   Vergumvelt Mauprat Sutesik George Sand Ava Francava Evla 1837

George Sand : Francaf suterotik (Amantine Aurore Lucile Dupin, 1804-1876)