Pu tawadayik jinaf berik
gan Élisée Reclus
|
« Kas en, ~ pu jin al erul, ~ kas en rinyon palik, i widavaf dodelik, va jinafa tawa djugakonarid, i va bata tawanya albana is sozilisa va ksent, ridolon efe, neke kozilir ? Va gadik is veygadik al sinkar ; ise nazbeik va abic beg rotir bason trasitir. Kas en va tawa djukonaril ise va jin div wico is matelama djumaloyal ? Kas jinaf vesk mea titir ke jin ?» Volgue, berik, batcoba vol tir ageltafa. Larde va sid albal ise midul, pune vebaltaks va rin en pasud. Rin va beg nazbasil, kle metan abdi jin vaon ronovestur, is abdi kurenik gesiayan gu rinafi bali, is abdi nazbeik daskiyin gan winafa yerumara. Va rinyona bourga aulackon sul, va vurpa is ziita ta katacera va tuolgaweyesa tawa videl, va faytawaza ta tunazbukara va sid videl. Mecoba tir baerdafa loon dam rinafa kobara, nume bettan co djudeswas va sid tusinkasaweyes tuke rinafa sugara kunon zo rotapsar !! Vexe va coba kalina pu rin, pu artan nurutis midusik vols tis me kalí. Toktan tid bat drowigaf kobasik, i bat tusudasik va sid ? Kontan koblison tir jiomapik. Viele ko kova al zo rundar, dem anameon gemafa baynaxa is lesoxa pibafa gu uzara is wira, gertik is palsotik is tegivsutesik is aryon korobik al kevlanid aze va miltel wetce direkef felisik va siday kiavayad. Aboyik, i ayikye lidam ayikya, dem siabeks is dilgavakirafi tayi is moavafi vefasiki kotlizu al vanvulted ; edje gu yal zo adoner, tegivsutesik mo nevapa vertokad da pintik va batlize yon sul isu banlize kuksa is kaikeon aalxo is jontika taya isu werdxo is arlize yona matela is dere aryona taya isu aalxo isu werdxo digir. Moe meftava, moe azeka vaon digir ; dace koe levesid va indxopo dere digir lize ayik sotre konaka decema oku decita kobad. Tumilgaweyeson, lanviele rotir, va konoleks ke gadaf jivot woratar. Rotir va bata kotcoba me lasuwitir ; voxe va warzeks volmiv kayestatar ise doleter. Kotlizu, kan vawa ik impadimak, kan kuksativ is biratota, eyeltap dem erba mal kot inaf tawadayaf pilkot pu in zo vanbureted. Kle, viele titit pockaf, kas va kotbat warzeks ke ayafa kobara jovletet ? Kas koe koldey ke konolesik isketet ? Kas va mana pilkuca tarkatat ? Volgue, nik, va kota batcoba konaritit. Va kotbata eluxaxa isu zovdom sollipatat, va tuvel ke batyone lamone moempatad, va batyono indxo vangitid. « Kobal kase djumestul !! ~ pu bat drowigaf midusik kalitit. ~ Mekbata kulaca wan tir ke rin !» Ise batar jiomik wawon kobliyis, migajeyxiskaf, mafelayan gan mek derbesik koe gadafo wico oku mintila vox telon ok voltelon kobason bexe tukulaweyes ? Va beti tawaki me digiyir lize va taka rotaykayar, vexe kan bitupera ik megara, kan yona kuvaca ke felisik ok bali, va yone divatcepe al grupurlickeyer, aze vaon re rebavar ike karnizar. Warolar lize me al faytawar, va beg wayan gan kobayas artan estur ise volper. Kas va bana pilkuca tarkatat, i va tela ke tukulanik memidus va tawa vox kan levetiraf meem volmiv zias nek nurutis pilkik ? Volgue, va bana pilkuca lidamu bata me tarkatat. Gire, viele titit pockaf, va batyono indxo konaritit ise pu tel drowigaf pilkik kalitit : « Radimon, tcadesik ! Larde al grukobal, wan kobal !! Va beg daskitin gan rinafa kobara daditil, vexe tawa miduna gan artan mea tir ke rin. Mea til felisik va beg. » Batinde va sid konaritit, en, konaritit, vexe bas battan va in dagis vols nyofas, enide pu bantan meronovuzas dimzilitit. Soe, mancoba me enide sin va ar copik silukon di rosaveted. Sidayki rokackani gan olkik ok yasa ok nikafa doda kare sinafa olkafa is dofa kobara zo gotur. Vielu koni sidayki va romidune divatce kaikfir, pune va bata kolpa medume tuwavon rokretud ; favera va aryon kobasik pasur. Kima kare olkikafa ik lospafa araya is kowarzera gedron zo gotur. Va coba midul, berik, batcoba va rin pasur, nume kotkane pomatat enide va ina videtel ; vexe coba memiduna tir ke kon dositik. Va kona runda mu in askil !! In va tawa dere grutunazbukatar. Vexe ede rin is in va winafi sidayki rokac, kas titic volproyaf zavzason sostan ? Antaf, antarsaf, midus tawadayamik sotir axarsaf nume va belcon totcidafa tuwava is ikoraf ristasik me grulyumar. Kase lajublir, pune batcoba tir zulton gu kuranira. Va int gu kota sazrinta godelvejar ise va int kunon gu kuranafa nakera gogruider. Viele tapara va rapor ludzer, viele awalt anteyar, viele muvar ike evieson sukar, in dun kobar ; viele molavara va inafa direfa warolara wizur, viele idul tukalkar, in va ark gabenton vebaltar, i va bat sinkansatas. Viele faytawaraviel sokitir, pune in va olk div art tiolteter enide ko bourga di kabur. Nekev gripokolera, figafa folixa dun tir : in va pak ke warolaksam nek adraf wetar, dirnuson da kaiki figaf fentugal, kaiki anteyas idulugal, dent soe tulukraweter ise va faytawaza jontolatar oke jonbaratar oke rotir jonsanatar. Va mana noafa renara mu bata tawa pestaler, i va tawa kuncasipisa va in kobas, is mejesipisa va in kivas is gripokolen, is tudaavapasa viele ksentkirapafa conya dzaved. Meka rena tir pofa loon dam tela ke tawadayik mu tsaxan is faytawan sid, i mu bat sid lize in al koblir ise liz dimfitir ! Neke jontik volnik anameon tigid ise va digira va inafi sonteni sidayki djumad ! Koaykasik va inafa ziita grastur ise va pak ke inafa denta divnarir ; dolekik va ar pak vangir ; impadimak va in icde remburera va arsay dere buver. In kotlizu zo mocoer. Ise kore iegat : « Va koayka me dodel, va krupa me dodel !!», in soe doder kire tir antaf, kire va kon vegungik me dirnur, i va konar tawadayamik ik pilkotik ik yofrik, nume va int do sin me rovekuljer. In is kotar vudenon is gritananon zo gulevetirad. Tire ede tawadayikeem ke mila utca al gildayar eke tutanara va po kev ristara rolaumasir, pune arse me co iskeyer da doda ke taneakaf ugal xonukeyed, i « nikafa lospa » inde koe Serba is aryona Slava patecta zo rozad. Dofa pilkuca ke batyona gesia me tir solzarteks dem meropatano karnizxo wale gleida ik rebava ik kelor. Dositik me mijed enide co gogruped kase kon ksent atriyis rone bourga oku talte va sin en pasur. Mek rabatesik, mek palsotik, mek tegivsutesik co roverkas va dulapok wal dositikeem. Vani warolara, abdi sare ke warzafa ziara, sin va sint gikatanad ise va dof arienteem flided. Kureyese yikye is yasa dadisa va loote kon nazbeik ok tanoy emudenik, va intafa warzafa debala konedid nume va lomantaf pak ke dofa kiewega seotad enide va intyona laumasa olegara di daniaskid. Lum kare siddivatce is bewota zo licar oke laumasir, nume kottan koe intafa kobar, kalaf kir diliokaf do kot berik pokeon kobas moe sidayki sabeyeni kare olegara ke kottan. Debalon gu kwitaf goaspil, palik va sint pomad : ede fird va kono wico al vumber, pune va tolvegedura volant viunsud ; ede soist va tayaki al vilar, pune ari mu moxayan digisik zo egar. Tanoy palik va bonoleem ke doda baspesir, ise namulol is jaftol va kelda van bonolxe sielon meplatinon grudimlanid. Dota belcon tir pilkuca ke dotikeem is kot dotik. En, vexe dota, dum olkik, sotir axafa ede zavzar sostana. Rotir va dikaf rosaven sid tori kot pakesik dadir nume kottan aelmejer ! Riwe kotviele ina tir lyumasa va lokulaf jiomik nurudigis va lanbata taya oku lanbana, i va lano aalxo oku lano baspexo. Acagickir nume ede jiomik ant co tigir, pune va jlokaf korobik co xultuyur ; vexe jiomik me tir antaf, va winkabowesik is ardialokilik, is va gertikeem is palsotikeem, is va kotafe bowere dem mweem is ervolia mu int diskir. Todon gu olegara, va buli roglebasi va bettan co kevidus va sid dadir. Batdume, kore doda kunon co over, arse gijarotiikeem va ina di kiovesir. Ise kore pu ina lidam sostanaf koaykanik iegapat : « Me xaal !!», ina gonoxaar, kosafa gu sostanuca is axuca. Kle tic axaf, kot win, pilkotamik sostanaf ok gesiayan dene doda, tic axackaf kev kottan djutulevetiras va win, i kev sidaygetusik sates va winaf pilkotam, i kev bowesik djumabdinaris va cug warzeks. Ede va sint me grututanac, ton osk ton olkik do olkik ik dota do dota voxosk patecta do patecta, vanmia kobasikafa walvedeyacapa, va bali ke kunoy is celemoy ayik ixam asregeyen gu kota rokara va faytawara is warolara is blis ton kubana levetiruca sure pakatac, i ke ayik anton trasis va ektudara viele tilikeem zo dulapokar da zilir, i ke ayik jontikinde dun gowipites, onton dulkon eruson va segura, onton dace nubasotceson is dildeson va totcidafa gesturama. Battan va sid zo zelayad, ise win dere dire rotir. Kas amidacapa wal sinafi bali isu winafi tir ? Dratcera va sin ixam zomer ; va win tankon ok tolkon ware umber. Golde volkaluca ok wupe va sint tutanac !! Va coba ware dikisa kevrojuc aze va drasuks dimolgalicuc !! Edeme winafi direfi bali arse tir aklafi, lecen remi opaf is nuvaf ugal tigit, nume bowesik, kalzanin gan razopikafa is tavesikafa ervolia, tori win va seltafa grustara egad lize kotcoba dum koe iaxe zo verkatar, lize foalk va kotcoba lidam dace ayik gadeter ; lize bantel titir racka betatana bro guazafa azilxa viele djumovatar ike djukuranitir. Batinde koe volnoafe divatcepe ke Amerikafo Ronexopo bitupesu sistu gilduckusu va bowere, inde tid kot kulik oku djupovanpis olkik, va yono datafo indxo koe bodaxo al mbi kaxaad aze tre ayik is dirot va sino gu zaipiaxe artazukad. Welmot ke lana miduna taya tir vas winka. Bata darkapa pu tec grupepes jadiwik zo odiar, i pu midunyusik is kazanyasik deksaf gu vodackafa gunestera va warzenda ke kona taya oku relt. Bantan ko delvejafa mona iste intaf pilkot koirubar. Koe inyona glesta decemoyi ziasiki is decemoyi faytawasiki is decemoyo vebaltasiko is tol-sanoyo basfayasiko tigid ; mon alub-sanoye omaze impadimane gan lizimeltasiko, moo witoka wal tayagolda is lovegungaf molt dem yone proske pasuse va in isu tota, dun lapid aze dun dimlapid. Sumepulvisikif gort mal lamonemona kal kote ke indxo stir ; puda ke felisik kotlizu zo gilder ; in va kot lor kalterektar, va koti tegi kaldisuker ; mecoba medirganon gan in isu meenintenon zo askir. Kle tokcoba dodelik is tawadayik koe bata grustackana tamava vanpid ? Foalk is okol is ayik milinde zo faved : wetce li po cugeke goyazgano dem cugafa warzenda vox vugafa ixalara mu tilafa belunda zo torigid. Bonolxe zo deraykayad inde bonol dace div kolna va goconyukana bourga vas konak decitmetrolk kal tayotsa toz suxad : kota sinafa bora zo patavar, kota pu felisik zilidur. Milinde lizira ke dodelik artu dofo kenibexo zo verkad. Banlize, meka ayikya iku rumeik santason ik kutcason roskaltes va kobara. Kobasik fuxe braora dem delmik is redakik is merotaruten rankesik zo lospad. Goni tir nuvafa sopura va dirgana kobara, tir guamlitawera koe ema. Viele kon foalk gribavawer, pune merodimgabenon zo dimfaver. Viele kon okol luber nume volins iniempar, pune ko oblaka zo dierkar aze ko cotxo zo impadimar. Viele kon ayik va kuncara zertur, viele volins bewempar oke vozeper, efe me zo jiadar neke ae zo grifuner : ezeon gonawalker, cuuson va metan gu inyona temera. Teni kobarapa, viele tuwava tildewer, gadesik va int dere tilder ise va intafa ervolia taruler. Diretandon va uma tokoda dem niska is relt wan trasitir, vexe tarutecketer da va milyon daretandaf kobasik di uneter. Sin va intafa bagala co ropulvitid, lion dam felisik co fogegrupeted, co rovegejeted, toktan gruper ? Va sidayki miduni gan sin rotir co suvetec nume co gestitic da ini vaon pasur ! Efe, ede kaluca ke ayikeem co tir redura va abic felemerbik jwas mu intyona skeura iku rinta va yon warzeks flavan gan kot tulevetiran kobasik, bata opafa sidsavera ke jontikote efrudik co tir klokana rietava. Erbaf daneks ke manyona ja tid zultaf, viele bitupera va intaf reduks me rawar. Lana dentafa tokoda seotana gan kobara ke alub-decemoy ayik va alub-kunoy co sinkar ; va oyak ke totcidafa kuba, granafa warzenda tuke arsay divtunsen kan tota az dolen jonsanon gu warzeravoda vadjer. Tire ede cug jontik mekobas is kubiskaf raweyasik slikeke tucopawed, pune va kotbat warzeks mea di rolusted nume, lanzan gu aelxonukera, va bitupesik mea di tukular. Vexe bantan va enekeugal someviunsur : wara taneon is fira moe moavakelda sotid, azon in boyoteter, nazbeik wergutur ! « Kaiki cin egale !» Batse, kobas palik albas va bourga lize va bula ke dentcolk remrus va olgafa tawakuiva taneatomon wiyil, batse teli bali egani pu rin ! Va taya is warolaks mbi konaritil, va int mbi konaritil, gu kon vikizas is opagaf azilfoalk zo gluyedatal, nume koe yeldvikiz keve madasiki vieleon kun-tol-deciton gomamadal. Batse drowigafa tawamidura. Ise me aeskel renaruson viele rinafa takra djuyerumatar ; van pokolanisa yikya me takaskaral : stujesik va kafara va kobara ke tilik me nover. Ede bantan va rinafa yerumara ta nazbara djupronoveter, pune kire va rin al karolackatar ; va bata levetirafa gloga inon nyofana ditil ; titil parodjackaf nume rinafa strafa zaava rononazbalketer. Rinaf direkeugal sotir tel ke dodelik, i tel ke iaxef nazbeik ! Meugale savsavafa levetiruca, ta jupara va xekasok, va ayuga linuvon feredjayar ise nyofayar. Viujaf is blaganyes is kotcakolaf tisik dure anton kagaelas va baynukdakela ik sum is gopa, va tok ayapak wan dir ? Va bata xonukera kotkane tarutec, palik !! Va intafi sidayki lickon videc, win digis va ki !! Ini tir winafi bli is teli ke yerumanikya renana isu nazbeikeem. Va int gesiac, do jontik dositik digis sidayki dratceni dum winafi gan iaxedigisik ik tcabanerafamik ik erbabeitasik ; va kota winafa vegungikafa eksaca ilsetikec !! Ise ko dota va sint lospac lize kot dulap tir gotuskaf, lize kota werdkuiva va kot dotik rojus dikitir. Sotre decema ok decita ok kuna, ixam titic pockaf kev jiomik is inaf zanisikeem ; voxe men titic pockaf kev ervolia. Kle va sint dotadoton gesiac ise tela lodaxafa va po ke kota daditir !! Ison, va kottan mekon digis rozec !! Va batyon widavaf copik rotir winon djurabogan vox gonalban lecen sin pomatad enide va sidayki di videtec ise va teli konariyini di dimolgalicutuc. Do sin, dilfutuc, va karnizaf rebavegeem vetrovgatac ; do sin va ayafa dotapa zabdutuc lize volant kobatac ta tublisara va sid isu tulistara is kalafa blira, moe bata tawanya zilisa va beg. Vexe ede va batcoba me askic, pune kotcoba tir buktafa. Ton levetirik ik wipitesik xonuketec. « Aelec, ~ dotagadesik ke Aljazaira pu yon dulkaf is uneiskaf krinanik sure kaliyir, ~ kle va sint estuc !» Élisée RECLUS |
| |||||||||||||||||||||||||||||||||||||||
