3-eaf luz : Icde aotcafo sersaxo[modifier]
Koe warzafo sersaxo kote arge kakevewed.
Taneon, ede ino me tir varon warzafo vox loplekuyuno dum bewa gu ara, tazukason va belca royoltana gu aotcafi koeti, taneafa klita ke betara ton tuwavafe arge vegodafe gu koto warzafo sersaxo awir : ayik, djupotulokiewas va bali, va betara va felisik albar ; bata pokolera ko inafa nuba va ervo kev noeltafe bowere plekur ; voxe azon bagala askir da in wir da rokleyer nume va debala tulodastirbayar : merotaruten daneks ke ara tuwavafa is gubefa olegara ke warzaf sersik gonovanyas va warzaf bowenikeem gu kiewagira va ervolia is jontika famiwara numafa gu warzafa levrotira.
Tirka ke sersik tir maninde, battode va kottan bakayan gu bliaca wetce nik dir ; voxe bantode va nuca is saguca ke kottel tudrikayas va intafa mupera me rovideter, ont ede va sin walteyemb me lieke rokeldaskir, ont ede kev sin va yon gradilaf is tizaf wayot me djukuyazgar ; kire ta mupera ko patecta, damo gijarotiuca ke intafa ervolia, sersik gan progera ke irubasikeem zo sogopomar.
Batdume Louis XII, gazik ke Franca, va Milano gola vere kalwayar, milinde tazdatana, ise taneon antafo po ke Lodovico Sforza ta solimpara di tiyid umafo. Ae, tuvelfenkuyus irubasikeem, ortan gu intafa pokolera is buven gu lo ken gunt, va idara ke warzafa felira me rotcizayad.
Ae viele sersik va batinde tcumiveyena patecta sodimolgalicur, lolirkkiron tazdatar : olgaliscusik, nyurnason va bata tcumivera, va ravaldara va olgalicuks leraliduson gu mergileem dioter, ont esteson va gunikeem, ont aneyason va tubizikeem, ont tupoason va koti intafi acafi sokaki.
Batdume dere, ta taneatomon tioltera va Milano gu Franca, lulason is nisuson cane bata winka, tanoy Lodovico dacik staper. Enide toleatomon di tazdar, gijarotiikeem kevon gotutanaweyer nume inafa ervolia di zo gwardeyed ise div Italia in di zo aloyayar ; batcoba kan yona abdion divrozayana lazava anton dilizeyer : soe, va bata winka taneatomon lidam toleatomon tazdayar.
Ostik, bazera va jadif lazaveem ke taneafa divplatira tir umafa ; voxe, icde toleafa, loon gonazavzawet ise va rotunen mergileem ke Louis XII rindet, va mergileem rofaveten gan ar sersik ta lokiewafa giwera koe warzaf olgalicuks dam askiyis gazik ke Franca.
Kle kalí da, ta tutanara gu savsaf pasuks ke olgalicusik, olgalicuyuna soka tir koe mila coyunta oke me, ise tir milavafa oke me.
Battode, videra va ina tir drikaca, moekote viele nuyon me giblir : ta musafa digira, zaava ke feliyis sersik al zo gogriawisir ; ise ede, larde lideem tir milaf, icde kotaf ark inafa savsafa tirinda zo isker, irubasikeem aulon fure blitir. Batinde Bretana is Burgunda is Gascona is Normandia jontikedje al zavzad tutanafa gu Franca ; ise kore avafa amidaca co-tid, larde giltaceem is lideem tid vektas, bata soka drikon robrospatad. Opelon, ede djuvider, warzaf digisik va toloya coba gonobrar : bata tir, milinde su kalí, griawisira va zaava ke savsaf sersik ; bana tir meroatalera va mweem is koaykarinda : batinde, savsafo sersaxo isu warzafo va tanoyo alto fure tazukatad.
Vexe, bantode, trabe viele urlickeyena soka tir koe ara coyunta dam tela tutanamba, viele sin va mila ava isu yon kizey me did, bam arge tid slike nume ta videra falapa is deksucapa gotid. Tan lokiewaf is lokeskotaf mergil co-tir da cenyesik va intafa oga koeon inker : mecoba va digira loeke co-tumusar ise co-tuslar. Turkaf sersik dolge Ellasa maninde al gorar, nume, nekev kota intafa sabegara, mesokeson meinde al co-rovideyer.
Sokeson koe patecta, warzaf sersik va kona volvura runion sonker nume vere rorujar. Ede tir ilef, anton gruper viele ina ixam tir mantafa nume wayotera mea rotir.
Ostik, inafa tigira weyonar da inaf fayik va winka vumbed ; ise, kottode, rokucilara va pokef miv sersik tir keldaskira ke irubasikeem. Sin va loa lazava dere did, ont ta albara ede djutid sagaf bowenik, ont ta kivara ede djutid rotaf. Adim, diveik co-djuruzades va bata soka va int lefakapon xuyavosar ; larde sersik soker, kigdera va soka tir lirkkirapafa.
Tel lokiewaf radimif mergil tir exonera va boniaxo ko tanoya ok toloya gola tisa dum marna ke patecta : edeme sayakik is nugervoliik jontikote zo gokiewagid. Exonera va boniaxo tir yarlamafa gu sersik ; in va sin oyakiskon ok riwe rostaksar ise kiewagir ; va korik deswamb va taya ik mona ta zilira pu kon warzaf irubasik anton bakar. Okie ayik batinde kantan anton tis lekam ke sanelia is tcaston sokes is zavzas copaf, meviele rotudasawed ; miledje kottan mezomeyes gan inafa nustuca batdume guaulawer ; ostik, kivason da dere zo di asreger, me rovelinular rotaf. Tanravlemon, mano boniaxo, yarlamafo, tid losagafo is levajaso va bowenikeem ; nume, milinde abdion su kalí, kontan vaon mejes tison copaf is tcastaf me rodedasar. Icdeon gokatcalat da ayik zo gosantar oke zo goselur ; va int gu lutsagama sojaxadar ; gu lutsagapa me sorotaskir ; batdume ede va ayik djukantal, askil maninde va inafa jaxadara vol di crakel.
Voxe, ede ute staksara va boniaxo, va kiewagira va yon milk goral, danesa ixalara kimiskon laumar nume ta videra kot ziliduks ke soka zo raweyar. Acum urlickera vanpir tazdarapa loeke bakasa kire irubasikeem loon zo moxar ; lecen kot olkoy lidam soka gan vredara va milk isu yona lanira zo mejesid. Okie, kottan rotis leve bata vajara, vanpir volnik ke sersik, ostik rodedasas volnik kir deneon lutsagan. Mana sura kle kotinde tir giopafa lieke dam tela ke boniaxo co-tir wemtafa.
Vexe arcoba. Viele olgalicuyuna soka tir koe ara coyunta dam konolerokafa soka ke olgalicusik, in va jontikara ropera me gofrayer : govanpir okilik is nendasik va yon legijarotif vegungaf sersik ke coyunta, ta tuacara va telyon lopof ke sin gokobar, ise goweyonar da, konon yontason, ligijarotif diveik va int co-kostar ; mana kostara jontikkase zo co-proger ; kire bat diveik gan kottan volvaleaf gu bitonuca ik kivara ape di zo co-rozar. Ae batinde ko Ellasa romik gan gadesikeem ke Etola zo kostayad, ise kofira va kotara azafa patecta mu sin gan irubasikeem di zo fenkuyur.
Icde batcoba, batse fira ke arienta : batvielu gijarotif diveik tigir koe coyunta, kot legijarotif sokes sersik va in suved ise va inafa arienta proged, lulan gan inafa lickuca dolge kontan logijarotif dam sin. In va legijarotif sersik me gonowar larde kottan ta tazukara va tanoya flava do olgalicuyuna soka va int keyur. Anton gorubar da kot ke sin va porso ik rictularsa narir : kan sinafa pomara is intaf mergileem, va tuomara va telyon logijarotif mekuncason jiadatar ise vanpitir antaf cotcesik ke coyunta. Ede, mantode, frayer da linular kiewaf, va ilt ke olgalicura fure tazdatar ; ise liedje videter, va jontika argeinda isu boikera satoleter.
Romik, koe kota feliana patecta, va gonaskira meviele frayeyed. Va yona boniaxo reduyud, va acikeem nendayad volse va inafa gijarotiuca laumayad ; va zolonikeem tuomayar ; me iskeyed da kon gijarotif diveik va folam roturlickeyer. Va tanoya tula wazdú. Wit va coba koe Ellasa sin askiyid : va Axaya galda isu Etola levgiyid ; va Makedona gazaxo tuomayad, va Antiokos aloyayad ; vexe damo beta zanara ke Axaya sane ik Etola, me noveyed da bate toloye sane va intafa soka di laumasiyid ; meka yanera ke Filippos rotaskiyir da sin vanpiyid nik, teka in va koncoba tazdayar, ise gijarotiucapa ke Antiokos meviele rotaskiyir da sin fineyed da in va kona soka koe bata coyunta digiyir.
Romik, battode, tegiyid dum stropaf sersik gonaskir, sersik govetrakus va anoelaf volvureem voxu dere rosokitis, enide golde xeyuca kotkane rowayoter. Ae sumion abdiwinon, wayotera batinde tir lodrikafa ; volson ede volvura al zo isker da vonewer, ugal mea zavzar nume rotaca tumerofraskenawer. Batcoba bam tir dum mazduca ; selaropik kalir da, icde nelkot, tir akola drikafa gu fraskera vox lirkkirafa gu grupera, nume abdufison vanpir drikafa gu grupera vox lirkkirafa gu fraskera. Batcoba arienton gu soka sokir : battode rotaca sumion zo abdiwir, coba anton rotisa ke endayapik, nume fure zo frasketer ; voxe viele kabe afi ba sizuntasa sokira anton zo wir, bantode fraskera tir volrotisa. Batdume romik, grupabdiwis va kota rotoda, kotviele vere wayoteyed ise ta tarutera va geja meviele iskeyed da arienta vonewer : sin en grupeyed da ina meviele zo taruter ise, ede zo obukayar, batcoba tir joke volnik. Batdume, beka bam co-rotagieyed, va Filippos is Antiokos govegejayad, dene dace Ellasa enide, kev sin koe Italia, me gonovaskiyid. Va bata pulvira ke art ke xeyik, kotviele batugale gildena (va belunda ke ugal pojal), meviele karolayad ; va tela ke voda is xeyuca abdualbayad ; kire ugal va kotcoba kabdueon aloyar ise va kiewuca lidam rotuca is rotuca lidam kiewuca kadimeon vanburer.
Vexe dim Franca, rindet kase ina va kona wonayana arienta al askir. Va Louis XII gazik vols Charles VIII anton fu pulví kire battan loon jontikedje va intaf olgalicukseem koe Italia al videyer, nume inafa dioterinda lokiewon zo rogrupeyed. Okie gorabateyet da ta videra va soka amidapafa gu tela djuloplekumba vol askiyir.
Golde bitonuca ke Venezia batkane djumurlickesa va lik ke Lombardia dacaxo, Louis XII gazik ko Italia zo kostayar. Va ukey narayan gan gazik me djukurespú : larde in va nuga ko Italia djumaykayar lize va mek nik digiyir ise tegira ke Charles VIII va kot tuvel al budeyer, va yona taneafa trasina naca gonodabluyur ; ise inaf ukey dace co-rotiyir fikuntaf, tode valev jontika brinuga mekon aron al roklayar. Ae, moi olgalicura va Lombardia, va vartuca suyuna golde Charles VIII tolwayar : Genova va int gruideyer ; Firenze vanpir vangluyanik ; veybiptik ke Mantova is dacik ke Ferrara is Bentivogli yasa is jiomikya ke Forli is jiomik ke Faenza isu Rimini isu Camerino isu Piombino is Lucca is Pisa is Siena, kot va inafa nuca vanvulteyer. Acum Venezia va intafa xeyaca gokagrupeyer viele ta urlickera va toloya widava koe Lombardia al askiyir da gazik ke Franca vanpiyir nafalik dem toloya bareaca ke Italia.
Mantode, Louis XII va varafa rictela koe bata coyunta ape drikon co-videyer ede va vamoeon konediyin staraverteem co-gruksubeyer ; ede co-nendayar va bat jontik nik ise co-rojuyur, va acaf is skotcas nik, va battan lente Uja is bantan kabdue Venezia, va nik gonozavzas sagaf gu int kane va kot artan wan deraykas va kona gijarotiuca drikon rocenyeyer.
Vexe moi artlapira ko Milano, vol askiyir, pomason da Alexander VI papik va Romagna di koilkayar. Louis XII me kagrupeyer da va int zelason va jontik kavangluyayas nik va int tuacayar ise va Uja tulogijayar, loplekuson gu swavafi roti, ixam rictelakirapafi, va lizolonafi sersafi roti.
Bata taneafa rokla va jontikara doimpayar manote ta ninkera va bitonuca ke Alexander is tatcera va olgalicura va Toscana gazik ko Italia miv di golapiyir.
Ise arcoba. Tison valeansaf gu bata tulogijara va Uja is zelara va jontik nik, Louis, braldes keri digira va Napoli gazaxo, gotur da va ino do gazik ke Espana pakar : maninde sure tiyir antaf cotcesik va Italia, va kevlik rokucilan gan kot bitonik iku volvaleik miv kostayar ; aze viele moe uskej va gazik kalaf gu culiekuseba rotiskeyer, va in vetrovgayar aze va rodefaloyas sersik rundayar.
Djumurlickera ape tir unaykaca is tuwavaca ; nume kontan torles, viele va mergileem gir, zo sisker lodame zo vorcer : vexe kalskuriskafa tueravara va vorcera is roklara askitir. Acum battode Franca va ponyo ta dilfura va Napoli gazaxo en co-giyir, co-goskuyur ; bantode me, va ino vol co-pakayar.
Pakara va Lombardia do Venezia zo roskaleyer kire va mergil ta kostara ko Italia pu Franca zilitir ; vexe pakara va Napoli gazaxo menuxon gotuyuna gan adruca zavzar meroskalena. Koton Louis XII koe Italia alubon al roklayar : va yon acik al rawayar ; ise va gijarotiuca ke zolonik al tulogijayar ; ise va divef gijarotipaf sersik al kostayar ; ise me al sokeyer ; ise va meko boniaxo al staksayar.
Wori, liedje bliyir, bata aluboya rokla me al co-rotuawalkedaweyed ede va teveafa me al raplekuyur, va djumasregera va Venezia gu inafa soka. Ae, tuacara co-tiyir kiewaca is adraca tode batinde va Uja me al tugijayar ise ko Italia va Espana me al rozayar ; vexe askiyison va taneaca is toleaca, meviele va sinafa rawara al co-gofineyer kire liedje sina co-zavzayad gijarotifa, co-tatceyed da kot volnik ke gazik va Lombardia dilfuyur. Ae, batkrilton, krede felilera va bata patecta sin anton co-fineyed ; bankrilton, metan va ina gu Franca ta zilira pu sin co-djudeswayar ; ise adim dilfura va katanasa Franca isu Venezia co-nuvelayar wupersafa.
Ede kontan pu jin co-kalir da Louis va Romagna pu Alexander papik al jovleyer ise va Napoli gazaxo do Espana al pakayar, enide va geja anton co-taruteyer, milinde al kalí co-dulzé : iskera va laptesa volvura mandume vol tir ! Kire batcoba va geja me taruter voxe volgunton anton gavesir.
Ede ware abdiplekura ke gazik pu papik va olgalicura va bata winka mu bantan ta seotara va solelara va battanafa kurera is etafi edji mu veytujradik ke Rouen (dire semekkiraf gu etik ke Amboise) zo co-abduplekur, kan radimef kaliks icde kota abdiplekura ke sersik is inafa surinda co-dulzé.
Louis XII va Lombardia kle al tazdar kire tiyir rapalaf gu meka verta gitarkana gan kontan urlickeyes va soka numu djuvides. Koeon meka galova ; anton tuwavafa opelacama.
Koe Nantes tigiyí ugale Valentinois (Cesare Borgia, nazbeikye ke Alexander VI, batinde zo yoltayar) va Romagna toz felileyer ; etik ke Amboise keyaksemb va bata bifa, pu jin kaliyison da italiik va gejarienta mekon gildayad, dulzeyé da francik va sokarienta mekon gildayad, kire, ede va koncoba co-gildayad, me co-iskeyed da Uja maneke tulogijaweyer. Ae, bagala al nedir da gijuca ke Uja is tela ke Espana koe Italia al tid skuks ke Franca az lazava ke inafa rawara koe bata coyunta. Male batcoba va jadifa verta rion ok dace meviele coesa dere rotimpat : sersik tugijas va ar ta intafa rawara sokobar ; kire bata gijarotiuca kan obliuca ok po zo warzer : okie bata ok bana toloya lazava va unesik gu balikembik tutubizad.
|
|
