Tarlera ke foalk
Tarlera ke foalk[modifier]Banugale, Olganumen, i Dritapik ke Europa, foliyir da va nelkot fure ronosulatas va kota ayafa kobara al kosmayar. Voxen taneafa bagalara va inafa xonukera vomi kota divbirgara di nekiyir. Olganumen unt al kaliyir : — Kota taneakafa abduxoaca tiyid redura va xeka jupasa da nuba gan merotarutena kobara mea di zo basalmayar isen vitoda mea di zo soltiolted. Toleafa abduxoaca tiyid grustara va foalk mea nubatan vox banvielu anton sinkatan gu yeld is aryon blot. Tere Olgakiren tcumpaf abdiik va de miv grunarise va sinka kosmayar. Voxen kotbana abduxoaca va cu anton al arplekud larde va foalk goniat, is dere va xeka zanudasa va iara. Azen in wan trakuyur : — Zvak jinon djumaen tir wavdaf vols merotis. Taneaf ayik vegeduyus va foalk, va blisa toka epuyur, i va logasa pima dem olegara gonamyena gan ayik. Gu bata toka banvieli tazukiskafa, tcumpaf abdiik va gluyas vileem miv ronotrasis va blot zaleyer. Re va nazbalkes mergileem banvielu zawaletes va redura godafut. In kicer ise va tazukoy beliyin kou kona loraxanteka prejar : — Azen, ba pereaf viel, Lorik tildeweyer. Olganumen ta patavara va eluxok lameyer manote va bermapa co rokolnayar. Neke tere di jupekayar. Jeanne, i lizimeltasiko ke bocafa teza, zo askiyir enide di grunazbayar, mepomanon gan betar foalk. Kiren Dritapik, ton romeyaf grupeik, va vayara gu mivnazbalkera al vodjuyur. Jeanne va oc nazbayar, i va oc yoltayan gu Jeannette gan Olganumen mu ant dil int. In va birga lickon suyur kire va intaf reduks djupotukotunayar. Kabdi nazbalara, lanmielon, Jeanne mejeson folvapon kizoyuyur eke irubasik ke widava zo divmodayad aze bemuon ranyayad aze kotliz vulteyed, aneyason va tela bula ape dilizesa. Va mecoba di wiyid. Olganumen, udutaf, al jupayar da wefoxaf foalk kan cuga ganta kal ilef tawaday vulteyer lize divulafa ribiega vanmiae megrupene sokiyir. Moi nazbara ke Jeanne ; viele bupese va Jeannette taneatomon pintiese ve gildeyer, pune toz daavadankayar. Inafa yantapuda tiyir xultusa dum semint nek zijnafa is krenugafa dum renas val. Isen drom va kelt ticstir, kalison : « Dritapik kan kuranirapa va bli pu jin al getcar ; Dritapik, ton vonapik, va jin dum intafa ewava al redur ; Dritapik, gijarotirsaf is vonarsaf num melickaf, pu jin va intafi redusi roti al dear. Va redusa kranevera al pestalé nume re va gadikyafa daava pojá. Va Dritapik kotvieli tualiá ise mu kot serolaf foalk dire dilianamrozá !» Direvielon, Olganumen va Jeanne ko emaxe djudimstar. Ine va in voser : — Dritapik, pu jin va fli ke kon tisik dum rin kotote al kozilil nume batkane va mil rinaf pestakeem al koswaval. Dritapik bokson is intotcon dulzer : — Va koncoba vol pestalé. Tí Karatrak. Ton warzaf retuj, Jeanne dulzavar : — Ey Dritapik, til Kotunik isen anton tí betaf redunik. Til driaf gu gustuca rinon plekuyuna ko jin !! Koe bat ilef tawaday wiyis va jinyona taneafa tizafa kranavera isu daavapa, va kalucapa gaasa va jinafe Jeannette co djugrivuté, vay !? — Va ugal me dadit, ~ Dritapik ruyer. ~ Va rinaf Felisik vegel !! Gadikya xaar. — Ey Dritapik, grupé da rinafa gijarotiuca sotir datafa isen dum broza ok baplolk lente rin tigí. Voxen va jinafa ziliyina takra saal ise ede va jin djumilstal, icle va sontena nazbeya doon malstal !! — Rinaf nazbeik gozavzagir voxen gomalnil. Voxen Jeanne, levgon is mingason keviese : — Voldo nazbeik me mallanití. Dritapik va kot grupen mergil ta guyundesira va foalk pusker. Va konak warzaf dace gandur, i va gijarotipaf is glabapaf mergil. Va mek daneks. Nope acagira ke intaf redunik zider nume lanmielon edje gadikya keniber, pune va Jeannette ilwaler. Ba divmodera Jeanne va sontena nazbeya jontikedje aneyar. Azon wan mezekar ise borer, son evieson van gracaf Dritapik. Tere inaf kranav vanpir zide. Ine malnir, endjukatrasison va nazbeik. Moo witoka fansileson vulter. Moo pre, va jaftol klantar, trovgar aze selur. Jaftol, kadimeon, yatkon evier. Mevukison, ine va batyona ewa kabur : — Pará, voxe va nazbeik kaaneyá ! Azen jaftol xonuker, kranavkizoyumuson kir trobindason. Moe witoka lizo ine fansileson vulter, va kabdueon impadimak kozwir, i va gamiafa dolekafa kametca abrotcafa is cepitesa, kuncasina num lewe blisa. Kiever : — Iskel da remlanil !! Va nazbeik kaaneyá ! Omazeeem, ton klantara ke radeyesin bonoleem, kal direfa golda toz vulter, kalion is skotceson. Van emasa joya iper. Azen lizimeltasiko, griiksantuyuson, van banak malnir, iegason : — Va nazbeik ke Jeanne aneyat !! Jeanne va jontikara kametca kevnir. Ba inafa iegara, kota, dum tela taneafa, otcer ise va joya mu pola isker. Azen koto lizimeltasiko va omazeeem dem merotaskis unenik jovler aze va Jeannette toz kaaneyar. Mali anyustka, lizimeltasiko ke Europa dun vulted, aneyason va bata falunikyama. Ayikeem, kovudan, va int preyutar. Tere foalk pu inafa vanmanana gadikya erur : — Toktan va nazbeik al ilwaler ? Ine yatkon azdason dulzer : — To Dritapik tir, i okilik ke ayikeem. Lulaweson nope intyona ewa, artowaraskon daskir : — Ayik sotir duxasik. Va min muon kobasiyir ise va sinka kalkimayar. Va kuba dikafa gu lustera va yeld ziliyir. Viele tiyit guazaf, lameyen tre zanira, va min empayar enide va minyona olukafa tadlexa gire joar ise faver, i va tadlexa memalyon yoltkirafa gu ugota !… Aze re djumer da ginazbat enide azon va minaf nazbeik di dubier ! Anameon, konako celemoyo lizimeltasiko vukid aze terektad, va wayokeem exukeson zatcason tegulad, va tumusas myestrovaxeem ermitad, va rotapsasa gantamimarapa van kelt kabud. Azen viele Jeanne zolter : — Va ayik titplekut !! Iyeptasa diviegarapa dulzer : — Va ayik titon !! Blid lizimeltasiko !! Va duxasik baliet !! Blir nuyuca !! Azon malu kot vawakelot, stezafa ervolia va berma ke Dritapik anamnir.
Berma ke Dritapik, ontinapafa, va divulaf ayikkoraf tazuk vektar. Taka va sona dem buli burer. Isen fonta va anambe dem buli. Kot gelt ke nuba is kot lubek ke nuga tid buli. Jeanne pu abrocafa iyekotafa rostaza iegar : — Ayik va jinafa nazbeya al ilwaler ! Bulipi buzegad : — Va ayik titon !! Aze va int debalteson, va intafa dratcera van divulafa ayikkorafa berma vodjud, i van berma sye inton gorojuna. Bam lugodafa disukexa dilizer. Olganumen, omaf, va rostazapa tisa lubek ke berma walolanir. Vumeltaf, va tarlesikeem kevlanir. Kotbat gulik konten va gikalvegemb klodik disuker. Ton wenyafa zatca, tisa listackafa nekev baxekam ke int, Olganumen va gedelaf ast nisar. — Tok ke win va intaf Dritapik djumaytar ? ~ calgon erur. Foalk gevanon dimenid. Jeanne voseson kalir : — Va jinafa nazbeya dimzilil !! Olganumen nafalon benplekur : — Va kuranira ke Dritapik trobindal !! Voxen gadikya perler nume iegar : — Va jinafa nazbeya dimzilil !! Battel ton santasa puda va pokolerama firvir : — Va ina koe lokiewafa tamava katrasitil. Jeanne ziadger : — Kalí da va nazbeya di dimzilil, djay !! Bam Olganumen, folis da ine cenenon gan merotsunene va int di gruider, pune dakter : — Va Jeannette me rodimzilí ; ligabeyé enide di wiyí inde foalk tuwavon kobliyis… Me tenuker. Jeanne va in al iper aze al selur. Remi gemeltam batlize tanamur, kladason va kultafa dibla tiyisa Olganumen. Aze diviegar : — Va Lorik su aytá ! Aze vinustar, intotcon is kranaveson woltendanon. Moion, foalk kovudan is skotces lente megrupene kaikfitise va cenera, i lente megrupene yoltane gan tan gu vudesipis trogarn vas arotieva, gire va int gu ayik gruideyed, krede ilgrupeyena rwaverama laviafa nek kadimion levtiolteyena. Nekev xakera ke Olganumen, konak dritik va mergil ta jupara va nazbara ke foalk al aneyad. Ae batvieli, mek va bralkara va bat zvakap al katrasir. Va kotcoba lanackon tavena gan izva icde tela lodeaftafa is lojadifa tarlera ke foalk, i icde exura namickina, sagon su pwadé. |
|
|||||||||||||||||||||||||||||||||||||||
