Toktel tir tok
|
Evakapikye kureyese va evakapikya tiyir. Sin golde evakucapa gan vegungikeem al zo kipegayad, acum tolonga ta dilifa blira ko sumefa gola ve buluyur. Batlize koe bata sumepafa coyunta, nasbeikya ve kobliyir. Kle evakikye is evakikya tiyid gadafa gu rumeikya pu dana abdigadikeem va kota altokaca isu swavakaca isu glogakaca al gayad. Meugale velikya al tiyir lilistafa is lideksafa is lidutcorafa. Nume gadikeem icde mana lumisara va sinafa evakuca va lorikeem grewayad. Velikya al vanpiyir listapafa yikya ise nekev antiuca ke xo lize sin bliyid, vartuca va listucapa ke yikya galbuweyer. Bam espusik yo derbes va gadikeem ta jukura va listikya awiyid. In pu kottan va mefa dulzera ve kevuyur. Poke gadikeem ware djubliyir. Vexe konviele, gazikoc ve dakteyer da vaon djukurer. Dulzera ve zo ickrileyer kire tokinde mefa dulzera pu man xantik zo co-rokalir ? Bizakafa tolonga va dulzera arti ironokaf taelcek ve abdiplekuyur. Batvielu are sersikye ve frubdeyed. Nume arinton gu awira ke taneafa taelbalemeaca, peroy sersaf espasik ta gildera va dulzera icde intafa erura va int egayad. Radeyera va wawaf gadikeem ve tolgeniyir. Ox ! Tokinde icde nasbeikya va peroy milgrabaf sersik rokeldaskiyid ? Pu tok goziliyid ? ise tokkane va ar tevoy vogiten sersik romebageyed ? Proyon, yikya ve pirdayar da sin va diolusik trasid, va tel blis iste aludevafo aalxo ke bata sumefa coyunta. Gadikeem ve ipeyer nume va guazaf proyik ve rupeyer. In pu sin va tcinera ve drageyer. Viele ve mielayar, koe laydomayano karnizxo yikya ve zo seyer voxe diolusik va tevoya niska dere doon al seyer. Tiyid sulemniska se : niska ke karvukol is tana ke vakol is tana ke fwestiol is ara ke bulol is dere ara ke namulol is ironokon tana ke deaxol. Nume gazdon viele lay ke karnizxo ve zo deswayar, peroya enmilafa yikya pu gadikeem is diolusik levkipeyed. Tiyid kotron nuxafa, mila ton peroy tulok. Kle peroye sersikye ropiyid, kot do listaf kurenik co-dimpitir. Batinde peroya kurera zo fiptayad ise setikera koe nami se ke peroyo gazaxo ware tir. Azon taneafa worara ve artayar. Sedme orpa, arti konaka taneafa safta, warzaf kurenikeem ta porara pok kurenikyaf gadikeem dimpir. Peroya warzafa tolonga is sinaf aboyik yo den evakaf gadikeem kle ve dimpiyid. Nume jorapa tiyir. Wori evakikye is evakapaf kurenik va toka bata peroya sersikya tisa intafa ageltafa nasbeikya co-djukagrupeyed. Acum va aboyik yo bibeyed. Sersikya ke taneafe sersikye, sin ve dulzeyed, tiyir anawenaf wipitesik is oriwaf dubiesik va sinka. Kotviele in kaliyir : « Omeo, meo, meo » (Zilic, zilic, zilic). Sin batinde ve grupeyed da vol tiyir intafa nasbeikya vols grabom ke diolusik kan niska ke karvukol. Kurenik ke toleafe sersikye tiyir vartaf gu afizafa ugalzera moe tuvelpikay fafigeson va niska ke wil ik jaftol ik wivga, lanon tiyir niska ke vakol. Bareafe sersikye, in, me roweyonayar da kurenik va toa se yestar ise varavielon veotayar. Tetce, me tiyir inafa nasbeikya vols niska ke fwestiol. Luxe balemeafa sersikya, kot aboyik yo tiyid icdeon tanboyaf : zionik guvaleawes koe dibla is dorita puskaceson va betcoba is batinde griporas va volkalaf gadikeem. Tel gan linulara ke kurenik ke blemaeafe sersikye me ve zo kantayar kire me pezteyer blodaf gu rotuca ke niska ke bulol. Alubeafe sersikye pu kurenik culimemeyer : battelya tiyir zijnafa ise va algafa disukenhera diyir ise va usukeem ton baynuk gikendayar. En, bata sersikya tiyir vumeltafa is frendafa. Kle voletrakason tolonga ve zolteyer da me tiyir nasbeikya vols niska ke namulol. Sin ve raveyed da teveafe sersikye va enzekapasa ayikya kotviele kotlize ayudasa is koo torstanca yo gozasa is ta kayestara va jotafa anga se mo aal yo tidumasa al kureyer. In loviele ve zo onseyer soltiolteson va itowim. Benje, gadikeem ve trakuyur, anton tir deaxol. Acum in ve grupeyer da ironokafa sersikya, jonte frendafa isu ebokafa koe ebava tiyir cot ke intaf cot nume ve sendayar da in va in tuporayar gusagon va intafa proyasposuca. Vanmiae min batugale se ayikye is ayikya vey bata peroya tolonga do ar ayikeem aotcewed ise kan adala se konoleyena bas intafa sumifa abdigadikya se solwikad. Anamdisukec nume drikon va battan dis va listafa yikya ton abdigadik sol bantan ke dan niskeem va teveaf sulem danenher kagrupetec. Vey toktan bat enzekapas korik al koblir ? Oke ban ke dan alguca tir bunga ok batar giguzionawes ok banar kotviele fafiges ok betar klokajas moe tuvelpikay keson va estura. Vey toktan tir wipitesik ? Rotuxasik me tir jin vols kaliyis abdigadik yo. |
| |||||||||||||||||||||||||||||||||||||
