Difference between revisions of "Toloy nik"

Darekeon. Paris zo elekar, zo aelesir, ember. Proklami koe kepaita vanpid riafi, ise grok volfrofawed. Betcoba vanpir rotestuna.

Edje bak aftaf riel ke taneaksat kene divef bedom, ton nubeem koe ucom ke tantazukotarajda is vlardaf jivot, Morissot W^-ye, ebon bartivelonyik is katecton ebavafamik gozar, pune kabdu doaskisik kagrupen gu nik vere vukir. Batse Sauvage W^-ye, rungrupenik ke kuksadom.

Kottaneavielon, abdi geja, Morissot, dem diuzrunza koe nuba is azilbabor bene ge, vanafizon mallapiyir. Va kelot van Argenteuil girundanyayar, koe Colombes buluyur aze ko Marante ewala laniyir. Koe bato klokaxo biwe tigiyir, pune toz onayar ; kali miel gilonayar.

Kottaneavielon, va omaf pwertamaf saipik, va Sauvage W^-ye asadaronyik keve Notre-Dame-de-Lorette nuda, va ar ukaf onasik, batlize kakeveyer. Sin va vielceklik pokeon fereon tiskiyid, ton runza koe nuba is nugeem sespawes vamoe salt ; sinton al tunaweyed.

Dile lanvielon, me pulviyid. Dile prilayad ; vexe mekalison gilduyud, dikis va yona milafa dulapera is yona nuxafa pestalera.

Imwugalon, rielon, moni sane bartiv, viele gire tujotan awalt va bata wibrama traspusa do lava mo aulaf bost gilezasir, ise tit ge ke bat toloy onasik va idulany ke warzaf cadim kevgimayar, Morissot pu vegungik dile kaliyir : « Eim ! mana zijnara ! » aze Sauvage W^-ye dulzeyer : « Va mecoba lokiewafa grupé. » Nume batcoba ta gildura is karolara stapeyer.

Muvugalon, levi afiztena, viele kelt, tukeran gan titawaltara, ko lava va yon tazuk va kerukaf rujod somimar, va varaf bost soturolmukar, va zida sokoteyar, tukerason ton tey va toloy nik, ise va tublakeraweyesa aala bupasa gu fentugal sotumoavukar, Sauvage W^-ye va Morissot kiceson disukeyer ise dakteyer : « Mana disukexa ! » Aze wan kaldisukeson va ezasiki skebun Morissot dulzeyer : « Batcoba loeke dam bost vodar, mex ? »

Va sint biwe kagrupeyes, sin votcukon nubalicad, kontepen gan bata kakevera mantode amidapon. Sauvage W^-ye, repaleson, prejar : « Batse man bifeem ! » Morissot, brigapaf, brer : « Is man saz ! Revielon, batse taneaf vielany ke tanda. »

Tire, kelt tir faltarsaf is afiapas.

Keveon toz avlad, klokas is gabentaf. Morissot ware kalir : « Voxe onara ? eim ! mana setikeranya ! »

Sauvage W^-ye erur : « Tokviele gire lapitit ? »

Ko zazdama kolanid aze va kremxa belcon ulid ; azon moe twern toz gozad.

Morissot vere vukir : « Va toleafa kusafa, eim ? » Sauvage W^-ye finer : « Dotrakunyú. » Nume va ar vordolesik denlanid.

Divlanison, tid spikonapayan, skalteyen dum getinesik dem jivot kotraf gu ruyat. Zijnar. Santasa upara va sinafa gexata alamar.

Sauvage W^-ye, ten tuizakan gan zakodara, vukir :

— Ede co-lanit ?

— Tokliz ?

— Ta onara, kle.

— Vexe tokliz ?

— Kle ko minafa ewala. Francaf abduplay poke Colombes tigid. Va Dumoulin vombik gruper ; zo isketet da drikon remlanitit.

Morissot jugemeson bupar : « Batcoba titir. Paké. » Aze ta kevlanira va intaf goreem va sint bulud.

Ba stekeon tanoy bartiv, moe vawapa keveon lanid. Azon va garia kerelena gan vombik artlanid. In yoke sinafa erura kicer aze finer. Gire lanid, gis va korictaxa.

Fure va konak abduplay remlanid, va jovleyen Colombes koolanid, aze kene yono centaxo titniso va Seine tigid. Moni san-tane bartiv.

Lenteon, Argenteuil wida nutir awalkafa. Orgemont bria isu Sannois va vemarsa. Azekapa kale Nanterre tir vlardafa, vlardapafa, dem kunoya lebafa raneta is lukoptafa tawa.

Sauvage W^-ye, geltnedison va ontinukeem, prejar : « Preussenik tideon tigid ! » Ise guyuca va toloy nik lente bata letafa vema alizir.

« Preussenik ! » Meviele vaon al kozwid, vexe mali konak aksat pestaled batlize, aname Paris, vilas va Franca, ellakes, stakes, aelesis, merowin vox gijarotif. Nume broyafa eaftaca va int gu sinafa bogara va bate megrupene vox cenese sane loplekur.

Morissot tcipar :

— Eim ! Ede vaon fu co-kakevet ?

Sauvage W^-ye dulzer, kan bata parisafa balgera sotisa nekev kotcoba :

— Pu sin va gerinseks co-firvit.

Vexe klabud da koo tawaday stuvon lanid, fidwan gan amlit ke kotafa zida.

Tere, Sauvage W^-ye gorar : « Lanit, vere ! voxe obrat ! » Ko centaxo titlanid, xowapason, terigeson, impavantason va amnaxo ta palsera, bemuon itason, oblakasotceson.

Nok dem lebafa tawa moi kuksadom wan zo remlanir. Toz vulted ; azon bene temba, vanmia rodafo edgardaxo ayated.

Morissot va tcor gu sid kevaykar aze terektar kase kontan moneon avlar. Va mecoba gilder. Ant tigid, en ant.

Zo karavaldud nume toz onad.

Lenteon, jovleyena Marante ewala va sin gu bana domega palsed. Monama ke voltaxe tir budeyena nume nutir iskedayana mali konaka tanda.

Sauvage W^-ye va taneaf brawesk narir, Morissot va toleaf ebidur, aze gemeltgemelton va intaf conyok dem dilgavukaf kabayam wogides arte fem madad : engalovafa onara.

Va kot kabay ko donucom dem gemapaf ametc, ko tideon perdoewes, gedelon koplekud. Nume pluktaca va sin kolur, bata daava konarisa viele albane vox jontikedje gracese puve zo dimtrasir.

Awaltaranya va intaf idul gu sinaf epiteem celesir ; va koncoba mea terektad ; mea trakud ; va ark ke tamava afanad ; onad.

Vexe laizon xadaf lor nulevustis va sid vaon skotcasir. Buli gire toz selekar.

Morissot takaskarar nume, banlize talteon, va bruckapa ke Mont-Valérien folk stakses van redjel va batakafa eybava, va su putcena goawibra, kozwir.

Aze vere toleaf mimaks va vikiz va ontinuk ke ralma malnir ; aze warzafa edavara vanion buur.

Azon ara radimistid, ise gemeltgemelton, meftava va awalkgaeloy wan mimar, va vrodukafa ganta vion tidnisa koe aulaf kelt is vamoeon tazukasa va rujod, wan suker.

Sauvage W^-ye epitumar aze kalir :

— Sin dure tolaskid.

Morissot, wesidon disukes va estobasa bruxa azu ezasiki, laizon ve vuder, dum diliodik kev kot riyomesik batinde lyumas, nume puskacer :

— Man akoydikeem batinde askis da zo atar !

Sauvage W^-ye gire kalir :

— Lorotaf dam bonol !

Aze Morissot, nariyis va ablette kabay, dakter :

— Ostik, efe batcoba sotitir bata liedje bowere titid.

— Sokasane va geja me co-dakteyer… ~ Sauvage W^-ye va in azavzar.

— Do gazik, batse ezeon geja ; do sokasane, banse vanmiaeon geja. ~ Morissot waljoar.

Aze sin aulon toz priled, grogason va gaderopaf zvakapeem tuke galafa is ninkena ova ke zijnik, dotrakuson gu vil ruyes da metode titid nuyaf. Batedje Mont-Valérien folk dun selekar, bulison dimvegeduson va yona francafa mona, kladason va yona blira, seluson va yon tisik, ve tenukeson va jontika klokara, va jontika kena daava, va jontika pokolena kalaca, plekuson va parmafa mejera den yona ayikyafa takra iku nazbeikyafa iku gadikyafa, banlize koe ara patecta.

— Batse bli ! ~ Sauvage W^-ye dakter.

— Lodamon kalil da batse awalk ! ~ Morissot kipeson kevkalir.

Vexe skotoctad, ciwan, pestalepeson da kontan kadimeon al avlar ; aze itaskarayason, riwe keve sinaf epiteem, va balemoy ranyes ayik, va ervokiraf is lukastkiraf ontinik, va vagekiraf dum tantazukotkiraf kwik is tiskis va azekaf atsot, kozwid. Sin arte zelt va sin kulmed.

Toloy conyok mal sinafa nuba yated aze va kuksa titnid.

Abicveraston, sin zo konarid aze vaniksantud aze malbured aze ko tiv zo mimad aze koe ewala zo stad.

Ise kadime mona fotiyisa jovleyena, va mon tol-sanoy germanaf sayakik kozwid.

Imkiraf gulindik, moe trovgon rova vikizasis va plopo kum rigela, pu sin francavunyuson erur :

— Kle, weltikye, kas al onanyac ?

Bam sayakik tit fayik va divbureckeyena dona kotrafa gu kabay daykar. Preussenik kicer :

— Ex ! ex ! Rabaté da sure kiewafa. Vexe ale arcoba. Kalterektac voxe me skaltewec !

» Sedme jin, tic toloy toidesik stakseyen ta pitcara. Va sin onsé nume fu zeltá. Nuveleyec da onac, enide va intafa xialara lokiewon palsec. Wal jinaf nubeem su lubec, rotaxe tove win ; batse geja.

» Vexe larde remo konak abduplay al divlanic, va korictaxa ape dagic enide di rodimlanic. Va ina zilic nume va win di grigaké.

Toloy nik, gebiaf, keve sint, ton nubeem tegulan gan noglotafa skotcarama, stivawed.

Fayik tolaskir :

— Metan sogrupeter, diliodon dimdenlanitic. Birga do win griawitir. Ede vewac, batse awalk, ostik vere. Kiblac !

Zavzad mezekas, me artfenkuson.

Preussenik, wan tis vumeltaf, nubasotceson van kuksa, ware kalir :

— Undec da arti aluboya wexa tite bata lava tigitic. Alubwexon ! Va konak vuwik ape tikic ?

Mont-Valérien folk wan selekar.

Toloy onasik zavzad ranyes is amlitaf. Germanik kan intafa ava kobenplekur. Aze va rova rundabetar enide poke gralomenik mea di tigir ; aze san-toloy sayakik va int rundad, dem zelt keve nuga.

Fayik ware kalir :

— Va tanoya wexa pu win zilí, me tolveraston loon.

Aze, laizon ranyar, va toloy francik illanir, va Morissot lev ma narir, ilamon doimpar, omon kalir :

— Kalion, va bata korictaxa ? Rinaf palik me grupeter, nuvelatá tukrenugawes.

Morissot va mecoba dulzer.

Preussenik va Sauvage W^-ye bam doimpar aze milinde biber.

Sauvage W^-ye me dulzer.

Sin gire keveon tigid.

Aze fayik toz dirgar. Sayakik va ervo madad.

Bam disukera ke Morissot mo dona kotrafa gu brawesk is zavzayasa koe werd, arte konaka bora, xuye luber.

Awaltolya va ezba dem kabay wan tegulawes jebesir. Ise konjotera va in tolgenir. Nekev sugara, iteem gu ikuzara tukotrawer.

— Va Sauvage weltikye, doné. ~ In tcipar.

— Va Morissot weltikye doné. ~ Sauvage W^-ye dulzer.

Sin va nuba pu sint licad, nugatakon botcenon gan merocenena skotcara.

— Viltac ! ~ fayik ier.

San-toloya viltara va tanoya askid.

Sauvage W^-ye mo pez vere luber. Morissot, lodontinaf, stibuskadar, debaltewer aze dad palik baliewer, ton gexata vane kelt, edje forteylembieda div kruja semayana ko ast divvawad.

Germanik gire kobenplekur.

Sayakik tcastawed aze dem wazdel is rapor dimlanid. Va nugeem ke toloy awalkik guon vaniksantud ; azon va sin mo temba bured.

Mont-Valérien folk dun buur, dure divatcetakan gan vikizafa meftava.

Toloy sayakik va Morissot bene taka is nimateem narid ; toloy ar va Sauvage W^-ye milinde konubad. Alto, poon tolveraston sespano, zo ilkabud, va livaca pimtad, aze, ranyeso yoke rapor taneon doimpas va nugeem, ko bost estobad.

Lava bimiler, lembiegar, suster aze tuaulawer, edje runtama kal domega nid.

Abic fortey ezar.

Fayik, ware wiyaf, mialukon kalir :

— Batse siluk ke kabay, dure.

Azon, van mona dimlanir.

Va dona dem brawesk koe werd levgon kozwir. Tredur aze rinder aze kicer aze ier : « Wilhelm ! »

Sayakik vanvulter, dem batakafa nyonda. Aze preussenik, pu in mimason va onaks ke toloy zeltanik, dirgar :

— Va batyon kabayam vere gerinsel edje wan tid blis. Batcoba titir sutkafa.

Azon in va plo gire toz vikizasir.