Ingaxa
|
Tir opelafa kire me zo rotingar, vox volkalafa dum titpulanik ; lecen ayikya sotir ke meka mava mei zaava, larde listuca ik kuca is mempera va nazbalara is yasa guon zanudad. Nazbokafa gedeluca ik wayeda va glabuca ik taskatuzuca tid inaf antaf ardil ise va sanenazbeikya gu miltik ke bet weltapik askid. Ina dun mejer, pesteson da ta kota gedelaca iku tapega al koblir. Golde wawuca ke vreda, golde copuca ke rebaveem, golde lamenuca ke kota deba, golde evakuca ke koti tayi mejer. Kotbat plek, tel mesonken gan ara ayikya ke inafa mava, va ina naker ise par. Wira va omafa breizikya tronasa va inafa exoma va vanmanawesa batcera is lidixafa klokara gu int divmodar. Ina va koto apulvafo sarandaxo, paedanafo gu ronekaf storn, koafino gan yona iyekotafa tilerda, is dem toloy kwikap diskis va trelafa arajda is kenibes koe iribapa, liugesin gan gamiaf idul ke tuidulasiko, modovar. Va koto kapaxo dem savsafa lesoxa, is dem gedelafo guto bureso va droiskafa orilga, va koto ekoltafo kapaxo, kofigano, tadleno ta flidera ba alube bartiv do kon lokoekaf nik, do kon grupen is pabun ayik djuman is vetcoyesin gan kota ayikya, modovar. Ba debanyara, ta sielestura, kev anamkafa azega dem mila ploda mali barka, lente kurenik kosmas va aabreak num vecanon daktes : « Ax ! kiewaf pot-au-feu estuks ! va meka lokiewaca grupé… », va gedelafa sielestura, va draydes dilgavazoratceem, va storn fronas va rebaveem gu savsaf korobutik is divulafi zveri iste ribiegafo aalxo, modovar ; va kot sutkaf azekor zanivan koe ribiegafa porma, va kota durimaca prejana is terektana ton sphinx kicera, estuson va raltadukaf cot ke daljek ok wilt ke aalwil, modovar.Va meka sariga, va meka roga, va mecoba digir. Voxe va batcoba anton albá ; sopester blisa ta batcoba. Cugeke djupuver ise zo djudjumar ise djutir brostasa ise zo djupabur. Va kulafa nikya dikir, va pusik ke xidaxe me djukevlanin kire tere cugeke mejer. Ise remi jontik vielcek, nigeson ik batceson ik gripokolenon ik faxon borer.
— Batse, ~ kalir ~ koncoba mu rin. Ina va eluxa kirepton sollipar aze va kozidexa dadisa va batyon ravlem : « Eldik va Sanefa Tavera is Georges Ramponneau W-ya va Loisel W-ye isu W-ya bliked da sin va tiskira va sielcek, ba 18 ke taneaksat koe eldakodia, di porad. » Solve ina zo felber, inde kurenik pokoler, va koganexa mo azega aundeson mimar, prejason : — Va tokcoba guzekal da guon di askí ? — Vexe, abegya, trakuyú da co-til valeaf. Meviele didal, voxe batse katecta, batcoba, katectanya ! Va seotara al zegapá. Kottan vaon sogalper ; mancoba zo pabupur ise vugcoba pu unenik zo zilir. Va cug winugikeem banlize witil. Ina ton zidesa ita va in disuker, aze volkeon dakter : — Va tokcoba guzekal da banliz co-rodiskí ? In me al guzekar ; tcipar : — Baix, va tel gem gidiskin viele ko wenya lakil. In nutir kiewapaf, sedme jin… In stivawer, ciwan, lidixaf, wison da kurenikya borer. Toloya ikuzapa alavon icu iteem van artalaveem vion titnid ; in neuzer : — Tokcoba sokir ? koncoba rotur ? Vexe, sugapason, ina va puidera sekiar nume bosolason va abdaf tcoreem ton aulafa puda dulzer : — Loxe. Voxe va meka sariga dadí batdume ko bata kapa me rolakí. Va kozidexa, pu kon dokobasik dem kurenikya vagena lokiewon dam jin, zilil. In tir vanmanan. Gire kalir : — Rindet, Mathilde. Tokdroe dojeniasa sariga co-tir ? Kona artode rinon co-rofavetena, koncoba opelapafa ? Ina rindecker, itayason is dere modovason va cugafa erba roteruna droe va davafa vewara is ciwana diviera ke rabudaf papleketik me di guoter. Tere, klabuson dulzer : — Me grupecké, vexe tce kan balem-decemoy franc talolk co-jupeká. In tuzwawemer kire ta lustera va zelt az pakera va direidulugalon tcabaneretsa koe Nanterre azeka do konak nik taneavieleon viltas va wulpa, va batmana itaya al baliker. Wori kalir : — Finé. Va balem-decemoy franc talolk zilí. Vexe va listaf gem lajudigil.
— Tokcoba sokir ? Wil, mali barka til abigapaf. Nume ina dulzer : — Zo argé da va meka roga dadí, va mecoba rodiskina. Nutí sutarsaf. Riwe lokiewon co-albá da den bat sielcek me di laní. In ware kalir : — Va tuwavafa imwa plekutul. Batcoba recadimon tir krinayap. Ika sanoy franc talolk va toloya ok baroya cuisafa raltada daditil. Ina me zo buiver. — Me… Nuvelara ke sutuca vanmiae konaka kulikya soplukerser. Vexe kurenik divier : — Man kwestik til ! Va Forestier W-ya rinaf nik kevlanil aze erul da ina va konaka roga miazilir. Til vaon tikipis eke va batcoba askir. Ina daavon kizoyur. — Arse. Me al trakú. Direvielon, den nik lakir aze va intafa faxuca pwader. Forestier W-ya van situlakirafa rastoka lanir, va mantaf kold narir, vanburer, fenkur, aze pu Loisel W-ya kalir : — Solnaril, abegya ! Ina va konak mak az mardflek az mafelon iasa Venezia gamda kum moava is konaka aka taneon wir. Kabdue situla va kota ingaxa lwir, klabur, me lajugorar da isker ise dimzilir. Wan erur : — Va arcoba me dadil ? — Volgue. Aneyal ! Me grupé va coba rinon ropuvena. Levgon, koe bor kum ebeltaf mirn, va cuisaf duzflek kosmar ; bam takra jugemerson toz gandir. Inaf nubeem narison skotcar. Ina anam berga moe ontinaf gem vaniksantur, aze kabdue int wender. Azon, klabusa is polepesa erur : — Va batcoba romiazilil, anton va batcoba ? — Gue, efe. Ben berga ke nik grabler, perleson dablur, aze do jwa otcer.
Ina lulapanon stuter, perlenon, tuizakamana gan puve, mea trakuson va koncoba, koe aliuca ke kiewatca, iste rujodinda dem kaluca tadlena gu batyona brudira, gu batyona mafelara, gu batyona divmodana jugemera, gu bata cenera vararsafa gu ayikyafa takra isu zijnarsafa. Moni baleme gazdabartiv mallanir. Mali miamiel, ko letaf bontayam do baroye are weltikye tikise va relandewepes kurenik, Loisel W-ye keniber. Mo inaf epiteem va vage vanbureyene ta divlanira mimar, va morafe vage ke gubefa blira ke dane copuca tove glabuca ke sirtasariga edavar. Ina pestaler nume djuyater, enide gan kontanya va int anamplekusa ko kulafa myotxa me zo katcalar. Loisel va ina kagir : — Kemel ! Diveon vere fu fentel. Va direm fu rozá. Vexe ina me terektar ise va fogelom kalion titlanir. Sin koe vawila va mek direm trasid ; toz aneyad, ieson ben kot ilolakis diremstasik. Van Seine bost lanid, gripokolen, tcotas. Adim, moe etol va tan bat guazaf mielaf direm trasid, va tan anton mielon rowin koe Paris, dumede inafa sutuca afizon co-tir kinokafa. In va sin kal sinaf tuvel, keve Martyrs nuda, vanstar aze sin denon gabenton tidlanid. Tove inya, kapa al tenuwer. Ise inye, modovar da koe eldaxe ba sane bartiv gotigitir. Ina, kabdue situla, va vage anamplekuse va epiteem deswar enide koe aliuca va int ware tanon di wir. Vexe ve kizoyur. Duzflek aname berga mea tigir ! Kurenik, ixam va int likon basvageyes, erur : — Tokcoba sokir ? Ina van jin rwoder, kovudarsana : — Duz… duz… duzflek ke Forestier W-ya mea tigir. In ve madagir, lidixaf : — Tokcoba !… tokinde !… Me rotisa ! Nume sin ko kot soaks ke gem, ko kot soaks ke lioza, ko kot ucom, kotliz aneyad. Me trasid. In erur : — Lanel da wan giyil buluson va sirta ? — Gue, koe zeria ke eldaxe vaon al uzá. — Vexe ede koe nuda al drasuyul, va in lubes co-gildeyet. Flek koe direm ape tigir. — En. Ape. Va otuk al stragal ? — Me. Voxe jin, me al disukel ? — Gue. Sin va sint nyased, nolyen. Adim Loisel va int gire vager. — Va varaf laniyin zalor, ~ kalir ~ fu tolexulé enide di wí kase dimdrasutú. Aze mallanir. Ina koe sirtasariga tiskir, poiskafa ta senyara, mumbafa moe rova, teyiskon is trakiskon. Kurenik moni pere bartiv dimdenlanir. Va mecoba al trasir. Den Ardialxe az kota fela ta abdizilira va gablera, az kotu diremafu sistu, adim kotliz vugafa pokolera vanplatir, lanir. Ina afizcekon ker, ton mila ciwanuceka lente bat kultafe egale. Loisel ba siel dimdenlanir, ton suxayana is zwafa vola ; va mecoba al kosmar. — Fiste, pu nik gosutel da va budesiki ke flek al empal nume volmiv fu dimempal. Batcoba va abic ugal ta boyotera zilitir. Ina dukalinon gan in suter.
Nume, Loisel, tuguazayan gu alubda, dakter : — Va ikaplekura va bata roga goboyotet. Direvielon, sin va koegiyis bor narid aze den rogonyik ke dan yolt koeon tigir, lanid. In va vertok ruper : — Me jin, weltikya, va bat flek al dolé ; va rogak anton al dafú. Bam mal tan rogonyik kal ar lanid, aneyason va ingaxa oltavafa gu taneafa, rupeson va intafi nami, kottol akolaf gu niga is pola. Koe dolta ke Palais-Royal, va duzflek nutis koton oltavaf gu tel aneyan, trasid. In tir vas balem-decitoy franc talolk. Ika bar-san-tev-decitoy zo co-isker. Acum sin va rogonyik bliked da in abdi barka vaon me doler. Ise kredad da in ika bar-san-balem-decitoy franc talolk zo co-dimnaritir ede tel taneaf abdi tena ke toleaksat co-dimdrasutur. Loisel va san-anyust-decitoy franc talolk iskeyen gan gadikye digir. Va ark fu beitur. Beitur, eruson va decitoy franc talolk pu battel, va alub-decemoy pu bantel, va aluboy louis erbolk batlizu, va baroy louis erbolk banlizu. Va konaki lipi sugdar, rawason vilteper, va konak erbabeitajasik is kota beitasikinda zolkomer. Va kotafa tena ke intafa kruldera rotplekur, va intafa sugdara arpumar dace me grupeson kase roporatar, aze, kovudan gan polesira ke direkeugal, gan sutarsuca fu titkesa mo int, gan siak va kota ugafa zelara is kota lidafa nakera, va warzaf flek aneyar, daykason mo bexa ke dolesik va bar-san-tev-decitoy franc talolk. Viele Loisel W-ya va ingaxa pu Forestier W-ya dimburer, in lupumunon kalir : — Va in gelkeon godimzilil kire rotolegayá. Va rogak me fenkur, va coba nikya kalkivar. Ede in va ikaplekuks co-vofayar, va tokcoba co-trakur ? va tokcoba co-kalir ? Kas va ina gu dubiesik me co-krupter ?
Ina va kobarapeem ke exoma is vitcaf oleem ke burmotaxo gruper. Va porma sotcater, lameson va vitodeem moe sudafa tawoldaxa ik ludev ke milka. Va zionafa grita is klaim is bilunt sotirdar aze moe wazdel soturodar ; kotrielon ko nuda titlanir ise va dorita burer aze va lava tidon burer, vukison moe kot vegem ta gaeloyera. Ise, vagekirafa dum saneikya, den iltonyik ik sinkonyik ik atelonyik, dem kita bene ma, gilanir, dolebason ik lutsaganon, kevrojuson va intafa sutafa erba. Aksateon sin va konaki lipi gonododed, va aryoni warzafi gonowimpad, va ugal lakevseotad. Kurenik ta patagedira ke dolekik cugsielon kobar, ise jontikviele ika aluboy sou talolk tori bu mielon malsuter. Aze bata blira sandon tiskir. Arti sanda, sin va kotcoba al dimzilid, va kotcoba, do cugaf beitarabuok is kalbadera ke itayayan dulapokeem. Loisel W-ya nutir guazafa, re. Al vanpir pofa is olgafa is figafa ayikya ke kota wawafa exoma. Va int loitejesa, dem merontafa gratca is keraf nubeem, ontinon gipulvir, kan jontika lava va azeba gitcater. Vexe dile, viele kurenik koe bazaxo tigir, ben dilk debanyar aze va bat sielcek ke lekeugal modovar, va bata sirta lize al tir listarsafa is kaparsana. Tokcoba co-sokiyir ede ina va bata ingaxa me al drasuyur ? Toktan gruper ? toktan gruper ? Maneke blira tir manafa, betawesa ! Maninde abiccoba ta tazdara va kontan oku giwara rostaper !
Loisel W-ya pester kontena. Kas pu ina fu kalir ? En, efe. Re, larde boza al kaldoder, va kotcoba fu kalir ? Mes ? Vanlanil. — Va Jeanne, kiavá. Artel va ina me kagruper, zo gevar da gan bat glastedik batinde yastarson zo rozar. In tcipar : — Vexe… weltikya !… Me grupé… Ape roklel. — Volgue. Tí Mathilde Loisel. Nik ve kizoyur. — Ox !… kimtafe Mathilde, maninde al betawel !… — Gue, va jontik olgapaf viel al tiskí, vielu va rin mea al wí ; is va jontika sutaca… ise batcoba golde rin !… — Golde rin… Tokinde ? — Va bat duzflek rinon miaziliyin ta kapa ke elda setikeckel. — En. Kle ? — Kle, va in al drasuyú. — Maninde ! larde pu jin al dimziliyil. — Va ar koton milaf al dimziliyí. Nume mali sanda vaon dodev. Gildal da batcoba tiyir medrikafa gu cin, dan va mecoba digiyiv… Adim batcoba tir tenunafa, nume tí valeapaf. Forestier W-ya vukir. — Kalil da va duzflek ta ikaplekura va jinaf al lustel ? — Gue. Me al sonkeyel, eim ? Sin tiyid milarsaf. Ise ina ton intotcafa is ixakafa daava kicer. Forestier W-ya, kontepena, va inaf nubeem narir. — Ox ! kimtafe Mathilde ! Vexe jinaf flek tiyir rolaf. Va alub-decemoy franc talolk cugdroe vodayar !… |
| ||||||||||||||||||||||||||||||||||||||||
