Izva ke dielkwikya
|
Rose, kwikya, iste burmotaxopo ant zavzagir lize teyzavzaks koe teyova valeve rekleda kotrafa gu idulafa lava tenanteyawer. Va abicbata lava dile lirder aze va porma vion tcater, waljoason enide va toloy afif lujor pozlan gan awalt mo abrotcafa azega rem dilk disuker, nume lizo afreem ke ralpeem awir. Baroya laopafa wilya va kelk valev rova trasir. Dakela ke ciastoaxo is kacaweyesa zakodaca ke jaftolxe rem fenkunamaf tuvel kostid ; ise koe amlit ke anteyas miafiz, wilye gildenon dankad. Moida yikya va intaf ol al tenuker ise va azega al bosoler ise va keldega al tucuar ise va razekeem mo ontinaf razekak poke arteon intafa bartivela dem mamtaf tiktak lor al emar, pune kagaelar, i spikonamana is ristamana vox megrupesa dume. Va tuebeltaweyes kuritcaf rebaveem is vikizeyen pijtrinkeem lizu vartebak is tueipayan aaltuk is emacek dem nyorku rumkad ; aze debanyar, funena gan yon savsaf divdaakeks divoksen kou tawedaf sid lize jontikcoba malisumion solpleyena al turodawed. Tipafa minta ke vrodxa fedon tuvaynawesa koe pokefa olkoba dere aotcewer. Wori toz djumasadar milinde giltir, vexe golde gracaso po mo pikay kagaelar. Bam santana gan lujafi afi, va zijnaca kostisa va intafa takra pestaler, va kiewati vantraspusi ko intaf beweem. Kabdue tuvel, cielka va elzasa gantama dun diveksoyer. Wilya moon senyajad, mo eliwa, ise ta trasira va lesko kan tanoya inia fasiamad. Vanmiaeon, wilye, ilamtafe, madagir. Va tana sina kotvulon kiblar aze ton rozasa wilierama anamlanir. Wilya grutcion ranyar aze va ine aulon kazawar, soason va inieem ise levbureson moe wilteem ; aze va bruxeem botcer lizu gopa divnir, aze ina mo cielka gire senyar edje ine dankar, patason va intaf xultureem ; ise koe koto ciastoaxo koe kote wilye dulzed, dumede, dieldielon, sine va sint renon al budad. Kwikya va sine metrakuson disuker ; aze itamadar nume gan sizunta ke yona imwenafa pruva, varon batakafa dum tugoayana taka, zo baalper. Laizon jotafe okolocye, tuoviskane gan itupuca, va ina tcepason kabduovulter. Va keloreem dem kenef aal tolon anamvulter, aze levgon vukir aze takaskarar dumede co-gevawer da ant tigir. Ina va kona djuvultera, i va godezekara is miledje djusenyara ik djudivatcera va beweem ik djutildera koe yalestaf is idulaf gael, dere pestaler. Abicboron avlar, krutafa, itabudesa, vannarina gan sulemafi kiewati ; aze, kalobrason, va cugo ato ko wilxe aneyar. San-baroyo tigid, va sino narir aze divburer. Moida al zo kotinidad, dakela ke burmotaxo gire funed nume divlanir aze mo werd abicedje debanyar. Dielkusk, kimenaf gu aal, nukeniber. Ontinaf werd, lize blafotafo tciugo dum afi sizuntad, tir dem gijarotife kuse, i dem warzackafe kuse ke imwugal. Izga ke yona pruva titeon anamkon licawer ; ise koridafa kepaita ke kolna, lize daxa dem toa milafa gu abalt ontinukon atrid, vikizad abicinde dumede abduca ke jaftolxe ik baplaxe rem bapla co-ticstir. Kwikya valev glesta artlanir lize edava is direm zo gilemad. Koe suxoma ke kelor, kusafe fepe kotrafe gu minsa dem moplewesa dakela tigir, ise, vamoo manni, va tawaday kozwit, i va azekapa lize warolaks atrid, dem konaklize yoni aalaki is dile lospa dem sumef kobasik pinaf dum bragoda, i dem batakaf okol nuxaf gu vefasiki, impadimas va rumeafa ziita platina gan fanik ontinaf dum gelt. Ina va baplastava kou olkxo narir aze ko bate fe impar aze moon debanyar ; azon, kire me tir trabiangafa, va gluyaxa dimaskir aze va deba tcastar aze gesenyar, ton meem leve taka is divatceyen nimateem. Zijnapon itabuder, liugesa koe pluktafa tulwuca. Fu komoderser viele va nubeem naris va intaf ast pestaler, nume welveson madagir. Tir Jacques, dielkwikye, pokiraf Picardia ontinik, dan malion konakedje va ina nesar. Koe namulolxe revielon kobar, ise, wiyis va ina izgon senyasa, idatcolboron al pir, kagison va gaeloy, ton jebes iteem, dem baplaki koe usukeem. Lakutcar, vexe ina lipofa va in kavalkur ; nume in, yotaf, grigakedar. Bam battelya is bantanye pokon debanyad aze noton prilad. Va saz tis kuvaf gu vebaltara is tanda nijusa kiewafa is intaf feliik, i sintaik, az varafa vema is miv sint is intafa vowida is intaf jotugal is namikseem is gadikeem jontikedje vox rotir parmon buluyun pulvid. Trakuson va batcoba ina tsedawer, voxe in, yoke ne, vanlanir, va int kevon pragar, bupason is tolgenison gan jugemera. Ina kalir : — Malion jontikedje va Gadya me al wí ; manedje zo solparsav, batcoba skre tir olgaca ! Nume inafa eglusa ita sumon disuker, koo darka, kal banlize jovleyena wida, banlize vane lenteka. In, levgon, va ina ben berga narir aze gire kutcar ; vexe ina, nubokason, ko vola tizapon tazerser eke inaf pez toz forteyar ; nume in ranyar aze va taka kev aalulim zober. Bam ina zo tsedar aze, vanlanison, erur : — Kas batcoba va rin rotesir ? Vexe in toz kiper. Volgue, loxe ; nemon ina iston al tazecker. In prejar : « Oyox facilik !» ise va ina mafelason disuker, narinon gan tarkara, i gan arafa vaduluca, i gan tozuwesa ageltafa renara va bata delapafa godjikya. Moi tena ke forteyafa traspura, va gozara pu ina drager, kivason, ede batinde pokeon co-zavzagid, va figafa nubagira ke vegungikya. Vexe ina va inafa ma miv narir, inde waltenik moe ikpa sielon gilaskid, aze ina kalir : — Rotafa, Jacques, da va jin batinde vligul. In pumbar. Volgue, va ina me vligur, voxe tir renas, efe. — Kle battode va jin djukurel ? ~ ina kalir. In klabur aze vaon toz levdisuker edje ina sumon kabduon mowir. Va keraf is kotraf tcoreem, is astap wexayes kake stamama ke awem, is fedaf kutcapeem dir, ise inafa larida, riwe lebafa, tir dem konak furoveolkam. In gire pester jugemes, nume, kan art ko inafa oblaka, prejar : — En, djumecké. Bam ina va meem ben inafa berga mimar aze jontikedje kutcar eke sin ilgaeled. Batvielu kotabafa renarupa wal sin bokawer. Izgon ice alava va sint dun bawesid ; lev taelara bravon ice nakgatcewa va sint gikakevetcad, ise golde intaf azilkiraf perfejulap valevo azega va sint dun wingud. Aze, abdufison, Jacques gan ina zo nuvargar ; taruter, mea riwe pulvir, va ant ina mea lakakever. Acum etrakara is gabentucapa va ina tolgenid ; voxe, arti konakedje, ina sonker da genazbalar. Taneon zo yondar, aze zidera artnir, kotvielon lopofa, lecen in kalobrason taruterser nume ina me lajutrasir. Adim, konmielon, edje kottan koe diel keniber, ina dem gratcot is ton lebaf nugeem melorason divlanir, aze va kusk remlanir, aze va tuvel ke okolxe platir lize Jacques koe baplakap vamoe bonol senyer. Gildeson va ina artlanisa nujidiptokar ; vexe ina pokon ticlanir, aze, kevon badeson va in botcer vieli in madagir. — Va tokcoba djumel ? ~ debanyayason erur. — Djumé, en djumé da va jin kurel, larde va kurera al abdiplekul ! ~ ina tiyar, talgalicason is yatkon skotcason. In toz kiper aze dulzer : — Ax, waux ! Ede kontan va kottanya do dana al rolar co-gokurer, battode vol ilagir !! Vexe ina va in ben berga narir, aze trovgar teka in gu volokafa lictara rogrifuner, nume ina telomtason va in ko vola drumeon iegar : — Genazbalá, gildel, genazbalá ! In cepiter, personer ; ise sin batlize zavzagid, mezekas is mepulvis koe ebeltaf amlit anton skalten gan lorara ke prijust ke okol impas va bapla ke mebast az vion kladas. Jacques gildason da ina tir lopofa, tcipar : — Kle, va rin kureté, larde coba tir mana. Vexe ina va rinyona abdiplekura mea folir. — Vere ! ~ kalir. ~ Va daktera volmiv sanegatal !! In dulzer : — Fure. — Pu Lorik vogal !! In abicedje klabur, aze malgorason : — Pu Lorik vogá. Bam ina geltfenkur aze mekon loplekuson mallanir. Azon, konakvielon pu in me ropulvir, ise larde batvielu okolxe kotmielon zo marnabuder, ina kivason va bilita me rovelorar. Aze, konrielon, va are kwikye kolanise ta aabre wir. Erur : — Jacques al bulur ? — Gue, ~ battan kalir, ~ ikakobá. Ina toz skotcapar eke va rekleda me rogrirumkar ; azon viele kottan tir kobas, ko intafa mawa ticlanir aze borer, ton vola koe graki enide me zo gilder. Remi afizcek, merotuculenon lagabrer ; vexe gan intafa volkalaca zo dustuleper eke gestir da kot erunik rovon kipegar. Ostik, va mecoba areldon mbi givar, vaxeda in va vema en al bulur. [modifier]
Bata taniafa dustulera askir da ine vol rodefovar nume va mek mergil ta tarutera va artfitisa bilita aneyar, i va kotvielon vanfisa is meroruuna is lanafa dum awalkera. Kotgazdon valevi kot artan dalebam ranyar ise, elodeson lingeson, va intafa fonta ko empanafi situlakimi zanudasi va loitera ladisuker, wesidapafa gu grupera ede revielon kontan me co-sonker. Ise remi afizcek, va intafa kobara kotvulon waljoar enide tictiton torigir kase jivot va nyonda me levmadarsar. Aksat remfid. Riwe mea pulvir ise viele va koncoba mbi erur, pune me gildar, ciwana is ton vonagafa ita is skotcas nubeem ; batdume feliik konakviele kalir : — Kimtya, maneke maligelkeon til fitulafa ! Koe uja, ine kadime swalot va int palser ise mea rovemovur, cubepeson va kakevera va gertik, gu dan va vamoayafi roti grubelisi ko swava kserar. Ba estura, disukera ke palikeem va ine gu polera re gikonjotesid, ise sogestir da jaftolsusik, abditcaf is yotaf fanikam dem afigasa ita mebulusa va ine, fu kosmar. Konrielon, piuteik va twa bulkar. Ine meviele vaon al kazawar nume zo ropplekupur eke gonodebanyar. Male in, rotir ? Vexe, larde me grubelir, zavzar wesidafa is skotcasa kabdue bata eluxaxa besanafa gu sida. Va ina koucomar, merovenafeson va intafa birga pu metel ; aze jontikviele re ten kobar enide va batyona milton darkakirafa conya do tenaf sugdaks jontikedje di disuker, klubon gestison da va pesta laizon fu kosmar. Adim, larde larveson is bemuon tuoviskawer, va bematavesik kevlanir. In debanyasir aze belir : « Nazbeya, bata twa pu rin kalickir da vinsí ; vegungik, Dentu weltik, va bruxa al narir nume foxier enide va jin rotison di goworal. » Ika rinafa renasa gadikya, » Césaire Dentu, ikadotagadesik. » Ine mekon kalir aze mallanir ; vexe, moida ant tigir, ton cuerses nimateem, kene kelda skalawer ; nume kali miel batlize zavzagir. Dimdenlanison, va intafa volkalaca pu dielokilik pwader ; in isker da ine di mallapir liedje co-djumer, i abdiplekuson da inafa kobara gan vielunenik zo soputur, ise da va ine dimpitise toluneter. Inafa gadikya ilblir ; ba vielack ke inafa artlapira awalker ; aze, direvielon, Rose va peraksataf nazbeik radekar, i va prazdaf yupam mazdaf eke sustesir, i va numejepes eke va kimtaf nubeem wiputaf dum tulinia kranaveson malker. In soe di blir. Ine pwader da tir kurenik, vexe va pintik me rovajuler, acum dene vegungafa yasa abdiplekuyusa va kalropera va in di isker. Dimlapir. Vexe batvielu, koe intafa takra jontikedje waniena, dum vanawalt megrupena renara va bat banlize jovleyen rabetikam madawer ; ise bata renara miv tir warzafa mejera ke kot bartiv, ke kota wexa, larde ine sumeon tigir. Coba loeke mejesirsa va ine tir godekutcara va in, godemara, gopestalera va idul ke inafo altomo kev intaf cot. Kotmielon mea keniber ; va in afizcekon dun modovar ; ise, ba siel, moi kobara, kabdu tey debanyar aze, bro beviasik va sumefo vo, gabenton disuker. Dace toz zo bulbinar, ise gu gotis renasik zo kotcomer, erumbon kase in tir listaf ik ontinaf ik kulaf, tokviele aguntara ? tokviele ailkera ? Nume ine jontikviele otcer enide ant di borer lecen bata bibera dum nouli va inafa alma konid. Enide gu batyona slastera zo deaser, batvielu kotvielon yatkon kobar, ise, ware modovason va nazbeik, ta flavara va jontika erba mu in va bet mergil aneyar. Gorar da popon di kobar eke lodroe zo gokubatar. Batvielu, abicabicon, va ol vanon getur, va ara kwikya volmiv dimuner, i va kir vanpisa mefavlafa vielu lieke dam toloy korik kuncar. Va beg is punta is raki is olkeem gimimarsan pu ciastoa is sogrebemena werdxa ke bonol dere toz megar. Vanpir ridolafe gu erba ke feliik dumede ina co-tir inafa, nume, tre sopura va yona guntasa dolebela ik tcazafa dolera va yon warzeks ke diel is edobera va beyara ke yon tawadayik milmus va intyon warzeks, va blodaca ta lustereem is dolereem is gadera va kobara ke unenikeem is patara va ekseem fure seotar ; artion abicedje vanpir vrebafe. Va eninterapa anameon ksuber eke ganon gadenon diel zulton toz tutrigawer. Ine kale toloy lieda lum wetce « kwikya ke Vallin feliik » re zo pulvir ; ise dielokilik kotlize gitolkalir : « Bata yikya lodroe dam moava tir. » Wori, ugal dun tiskir ise inafa kuba zavzar milafa. Inafa poana kobara wetce daneks ke kot abidas kwik zo kalnaler, i wetce sugdacka va seroluca ; nume ine piramon toz modovar da ede tuke ine dielokilik va lof alub-sanoy talolk oku decemoy aksateon koyultar, soe ine va 240 talolk tandeon wan sowar, i va mecoba loon mei leon. Gorar da va laumasina kuba di malimaxur. Va feliik baron kevlanir voxe, kabdueon, va arcoba pulvir. Va werkinda erbayaneson pestaler, dumede batcoba co-tir kinokacama. Adim, konafizon edje dielokilik koe burmotaxo ant miafizestur, ine toktenon kalir da pu in pilkovon djupulvir. In, akoyen, ton nubeem moe azega, ton bat olkoy ticon gis va wed is ban gis va begki, takamadar aze va inya modisuker. Rose dizvenon skaltewer voxe va anyustka erur enide ko vowida di djulapir kire akolemer. In vere kserar ; azon, dere tokten, loplekur : — Dere, pu rin gopulvití viele al dimlapitil. [modifier]
Soe malion direvielon in va inafa volavangiltar, ise wison va ine kiper. Ine ko tawaday va in divburer, tuoviskanon is vaon gison arte nubeem vulter, izgon ic aal debanyar ; aze, ba taneafa toma ke intafa blira is beka in me gilder, ine va takra pu kontel fenkur, va intyona nigera iku kobara iku arge iku pokolera odiar, ise kan tizuca is elodera ke intyona santa va in dun cuesir. Feredjason va in koe nubeem is tcateson is vageson, va daavarsa trasir ; dace tir kalafe gu tucuara va inyona rumeafa zionaca, dumede bata koekafa ropera co-tid gruyera va intafa gadikyuca. Va in krafiar, kotviele gevanon da in tir ke ine, ise stutesison koe meem ine pu int omapudon tolkalir : « In tir jinaf pintik, jinaf pintik. » Dimlapison kal diel remi varafa kelda buwejar, aze biwe dimon, feliik ko mawa rozar. Ine gevapane is kontepene, megrupenon dume, lanir. — Batliz debanyal !! ~ in kalir. Ine debanyar aze sin poke sint abicedje zavzagid, belcon tokten, ton foyokaf is tervas meem, is va sint lenton me disukeson, bro tawadayik. Dielokilik, balemsanalubdaf pwertik, tolon nyobraf, itupaf is takelaf, va megubefa denafa funera satoler. Adim gorar nume klubon toz pulvir, pulvajimison is ilon disukeson va tawaday. — Rose, ~ kalir, ~ kas konviele va exonera me al modoval ? Ine dum awalkik tuzwawer. Wison da ine me dulzer, in dakir : — Til sintaikya, vunafa is tegirafa is rabudafa. Ayikya dum rin, va tufa ke ayikye co-daskiyir. Ine ware zavzar mezekase, ton ciwana ita, dace me lagildason larde intafa rieta cugeke frelkad dumede va wupepe co-vanfid. In tanvulon ker aze dakir : — Wil, diel a feliikya, batcoba me roguyunder, dace dem kwikya dum rin. Bam in stivawer, mea grupeson va toka rokalira ; ise Rose disuker, ton kovudana tiva ke kontan fogetigis lente adjubesik, ise ba beta inafa sokitisa zatca va otcera egadar. Adim, arti aluboya wexa, in erur : — Kle ! Kas batcoba va rin katir ? Ine ton akoydafa altoza dulzer : — Va tokcoba, feliik ? Bam in, levgon : — Voxe va jin kurel, fotce ! Ine vere madagir aze moe rova nuvempanon kaluber lize mezekason zavzagir, nuxafe gu kontan co-tazeyen gan volkalacapa. dielokilik areldon larver : — Benje, adim ! Va tokcoba djumel edeme ? Ine va in tuoviskanon nyaser ; aze laizon, toz ikuzar, nume personeson tolon tolkalir : — Me rotaskí, me rotaskí ! — Tokdume ? ~ ayikye erur. Tetce, me linulal bonaf !! Kali direviel ta undera pu rin dozilí. Aze ampuson mallanir, kiazapanon da bata toktepesa godela ten tir, ise meiltrakuson da, direvielon, kwikya va man drageks inon volpokolersen kalnaleter ; ostik bat drageks mu in titir arientanya larde in gu int va ayikya efe zilidutusa loon dam tel lokulaf bueleks ke vema batkane parmon gluyar. Ison, meka wegayera icde kureraja wal sin rotir, larde koe tawaday cugtan tid miltackaf : dielokilik dum kwik soziitar ; tayakwikye ferepon siluon konviele givanpir feliik ; monakwikya rovanpir feliik teka batcoba va betcoba ke blira ok gubeaceem betar. Batmielon Rose me senyar. Mo ilava debanyason luber, dace mea dison va po ta borera kir vanmecobanon. Va intafo alto mea pestaler, zavzar foyokafe is dem tcastafa swava, dumede kan tan gor zanudan gan gernasik ta tutigara va bayna ke cipia kontan al papter. Soe dile ine va konaki underakimi lajukabelcar, ise trakuson va rotitisa dilizera zo kovudar. Inafa vuderapa laumar, nume kotviele koe modas amlit ke mona bartivelapa ke burmotaxo va bartiveem vion dendar, poleson furover. Inafa taka eglur, setrera va sint tantanon ganed, raki tenanteyawer ; batvielu yokara tozuwer, otcesa yokara ke tawadayik fogediwedan ik gonomallanis ik gonoyates ik gonovultes kabdue volkaluca dum tota kabdue zivotcara. Murtoy ier ; ine skotcotar, madagir, va nubeem mo intafa vola is ko usukeem plekur, dum oviskik va intafo alto uzear ; aze dum modesik titlanir. Koe kusk, teriger enide gan kon mwarnes yoromik me zo rokozwir, lecen tael fu griawis va aftafa afida mo tayeem momimar. Va manni urper lodame va karniz fenkur ; azon, lente tawaday, mallanir. Rontion kabduvulter, ton terafa is ipesa sorera, ise, dile, mejilon, vucon kizoyur. Inafa izgapa, pokeon sena mo sid, va ine kenenir, ise dile mielzveri vamo inafa taka banger. Gildeson va ine pokolanise vakol koe dielkusk ied ; tan va kelor vamograbler aze labugdar ; vexe ine vanon rwoder ise evier inde kovudan sulem otcer aze ko ponyaska ayater aze stivawer. Dile jotafa libakolafa yasa koe taya relandewer ; vexe ba vanlanira ke bata vultesa riyomesikya oltavafa gu kona yokasa Diana, vudesaf sulem gwardewed : oceem is gadikya griawid, ayateson ko bourga, edje gadikye kan inieem ilvulter nume, dile, ton madawes oblakapeem, va intafa welvesa izga mo tittaelara re estobasa art tamava is koafisa va azeka kan blagutafi afi, dum gumkapa aykayana mo sid arte zida, dear. Bitej ko aludevaceem ke kelt relvawed ; konaki zveri iedad ; afiz koblir. Yikya, ciondana, cepiter ; ise viele awalt va turolmukan vanawalt semar, ine vukir. Inaf adeeyes nugeem vewad da lanid ; vexe va ujiwa kozwir, i va ujiwapa dem milesa lava vektasa va fortey yoke keraf tcazereem ke warzaf afiz, aze avlamason is eteson, ton nuba keve takra, va nimateem koon perdoer. Mo werdki debanyar, va gopakirapaf perfejulapeem deswar, va omexeem griaskir aze va tufaltan koelteem kolavar lize gaelplot dile semad. Pluktafa fedaca mal buueem kal larida ticstir ; aze, laizon, edje ine va aludevafa ujiwa modisuker, fansila kanarir, yatkafa djumestobara koton. Ticeon, ine mea co-mejer, mevieli. Va nazbeik mea trakur ; va dili, i va tilderapa, i va parmafa kenibera djumer. Bam mamadason madagir aze tolboron abdulanir. Kal jadayeem re vanludevawer, ise ixam iper, viele lujafa puilera ben mewaya va ine dimegrablesid, nume gripokolenon kizoyur, lecen male badeeem kale nuganaaveem abrotcafa ebeltafa vrandega va inafi bli ulid, adeewed, krunafa gu cot. Me rovebuzar ise tuaklanon evier. Inafa iyepta va tawadayik diremon sumolakis vanimpad. Va vrandega tantanon solimpar, va eepteem kan werdki raxivar aze va yikya koe teiz kal diel ke intaf feliik kojupar. Ine koe ilava sanalubkon zavzagir, aze rielon ba viel ke madagira, edje kabdue tuvel debanyer, dielokilik kabduon levgon kevlanir. — Kle, ~ kalir, ~ arienta tir zolteyena, mex ? Ine taneon me dulzer, aze, larde in ranyeson zavzagir, remruson kan intafa mingasa disukera, ine porton arder : — Volgue, feliik, me rotaskí. Vexe in vere ziadgar. — Me rotaskil, yaya, me rotaskil, tokdume batcoba ? Ine gire toz borer aze tolkalir : — Me rotaskí. In va ine oribar aze ko lesay iegar : — Kle tire va renasik dikil ? Ine tcipar, kinokon skotcase. — Rotir batcoba tir. Ayikye, kerafe dum tsage, zideson pulvajir : — Ax ! kle welidal, jastrik ! Ise toktan tir, bat vilbolik ? Kon vukudiskik iku taliskik iku bitejblisik iku aelcopik ? Tok mantan, kalil ? Bam, larde ine mekon dulzer : — Ax ! me djumel … Jin, fu kalí : tir Jean Baudu ? Ine diviegar : — Ox ! volgue, me battel. — Bantode tir Pierre Martin ? — Ox me ! feliik. Aze in va kote yikye ke vema lidixon yoltar edje ine meur, kaikanzane is dun bosolason va iteem kan alava ke faltafa nyonda. Vexe in kan mingara ke ficik wan aneyar, fasiason va bata takra enide va inafa birga di gruper, milinde tcabanes vakol va tawaz ta pezin sulem titeon tigis kaljoxar. Levgon ayikye eviegar : — Ex ! fotce ! tir Jacques, daretandafe kwikye ; konaktel kaliyid da in pu rin pulviyir ise pu sint al va kurera abdiplekuyuc. Rose personer, forteyora va lesay turolmukar ; inafa ikuzara ve vukid ; dum belaxa mo kerazil keve tcoreem turodawed. Ine diviegar : — Me, me in, me tir in ! — Cwade, laneckel ? ~ vepokaf tawadayik erur kire va ageltaki griter. Ine ipeson dulzer : — Vogá, vogá … Va tela coba aneyar yolton gu dana rovogar voxe va meka baerdaca rovekorozar. In waljoar : — Wori, in kal beta alava va rin radimlaniyir ise remi kota estura kaikdisukeyer. Kas va finera pu in al abdiplekul, xeim, kalil ? Batviele, ine va feliik modisuker. — Volgue, meviele, meviele, ise yolton gu Lorikany pu rin vogá da kore in ta erura re co-pir, pune vol co-djumé. Ine nutir ronjapafe eke dielokilik klabur. Dumede pu int co-pulvir, dakir : — Kle battode, tokcoba ? Meka volkalaca va rin al dendar, kottan co-gruper. Ise larde mek daneksaj al sokir, meka kwikya va intaf feliik mandume co-vewar. Soe koncoba ape tir. Ine mea dulzer, telomtanon gan polera. — Me djumel ? ~ in ware erur. — Me rotaskí, feliik, ~ ine repaler. In rwoder aze mallanir. Ine folir da zo grikter nume va arak ke vielcek aulackon tiskir, vexe lion ciondayane isu kuncayane dam ede, ika guazaf batakaf okol, mali vanawaltara va olkaliesiko co-gotaceyer. Senyar vielu rotir aze vere komoder. Mon isti miel, nubeem tsedes va ilava va ine divmodar. Ine kovudanon vagrabler, vexe va puda ke dielokilik kreme kagruper. Ina kalir : — Me vudel, Rose, jin pí enide pu rin di kalí. Ine taneon zo gevar ; azon, larde in lev inaf dualt va int lakostar, ine va inafa aneyara gildar nume toz skotcapar, pesteson antafe koe tapeduca, ware gamiafe gu modera, is lebackafe, is koe ilava, poke bate ayikye baltanise. Efe me finer, vexe grutcion acagir, miv lyumase va wayeda tire logijarotifa dene korik dem opelafa tuwava, is nendajane gan krutafa kuranira ke mana foyokafa is tulwafa zaava. Van rebava ok mawa dun takaskarar enide va santa is art ke dielokilik onkas va tel inaf taruter, nume inafo alto leve modivatcesiku mucuwemer, nyateno gan cuera ke lyumara. In, tufikawer, alnitcan gan jugemera. Kan levgafa lizira va ine nisar. Bam ine pestalecker da mea rotacagir. Vegeson va waikoykorafa werkuca, va vola ko nubeem palser aze va int ten rojur. Dielokilik poke ine mielcekon zavzagir. Diresielon tolpir, aze kotsielon. Sin belcon di blid. Konrielon, in kalir : — Va daktera volmiv al sanegá, direaksaton kuretet. Ine va mecoba dulzer. Va tokcoba rokalir ? Me acagir. Va tokcoba co-rotaskir ? [modifier]
Va in tolon vieleon kevlanir aze loon gabentafe kotviele dimlanir. Wori, remi giltira, inafa cubera tuvumeltawed, takra vandiliwer, ise loon odiakafe dem klubafa kivara ware ezasa koe swava blir. Konaka tanda tiskid ; nazbeik va tevda zomer. Ine re tir riwe kalafe viele aflicera ke dielokilik levgon tuorikawer. Mali ixam tolda ok barda in va guyaca nugestur, va arge nudiskir, i va kona swavarotera abicabicon tugijawesa. Bene azega kaiki sielestura jontikedje gizavzagir, ton taka koe nubeem, is gabentaf, gabentapaf, viban gan nigera. Inafa pulvira tir loblifa, dile fikafa ; ise va mutcera kev kurenik dace nudadir kire olgon is riwe zideson dile dulzer. Konviele vegungaf pelfudik ta ato al pir, edje ine keyunon gan ol va in poaster, kurenik ve awir aze trukon kalir : — Ede in co-tiyir rinaf, pune batinde me co-askipel. Ine zo nyebar, merodulzeson, aze dimdenlanir, do inaf divmodesiyin polereem. Remi sielestura, dielokilik pu ine me pulvir, me disuker, ise nuvilkader, nuvligur, va koncoba sopron nugruper. Warjeson, moi estura ine ant do in me rovezavzagir ; otcer aze kal uja vulter. Toz mielar ; vwepafo tamaxo tir orikapafo, vexe lanira koe amlit poke tama banlize mwarner, lecen ujazanisik tori miel va gum ke truduak egar. Batu skotcadasu u ke tey, wizuwesu koe mielak ke galza, wetce ironokafa pokolera sedme Rose nutir, nume, vaon modisukese badeson akeoyer. Tigaf gumam ton lorara ke roda ve zo ticplekur. Moe lume belafa grablera ke intocka az kactara ke impadimawes wazdel tauled, aze biotama va sielafa angelus blikera rem tugijasa bra mimar. Viele ayik fu mallanir, ine kazokever. — Kas gertik weltik dene int tigir ? ~ kalir. In dulzer : — Ape, ba angelus blikera gilestur. Numon ine va karniz ke gertaxe skotcason platir. Gertik benazegar. In kreme askir da ine debanyar. — En, en, grupé, kurenik va coba stasa va rin ixam al pulvir. Kimtikya konjoter. Ujik dakir : — Va tokcoba djumel, yaya ? Ise va yon foriacek dem aabre kalion fixar ise mo trendig nedis va saljaf ralk moe jivot aabreolk lubed. Rose me rovepulvir meie rovedilder meie rovevoser ; ranyar ; gertik kalir : — Va takreluca … Aze ine divlanir. Va diel dimdenlanir, megrupeson va coba askir. Vielkobasik al mallanid edje ine gracar nume feliik ker. Bam ine tit nugeem rusiagon luber ise gimason va ikuzora brer. — Gu tokcoba va jin satel ? In toz iegar, vogadason : — Saté da va mek nazbeik dikí, Lorik ! Viele kontan va ayikya kurer, me enide kotvieli ant zavzagitit. Batse zvak. Viele jaftolya va mek jaftoloc dikir, vodansar. Viele ayikya va mek ayoc, dere vol vodar. Ine borer, tcipason, tolkalison : — Me al rolá ! me al rolá ! Bam in tuzijnawemer aze loplekur : — Me kalí, vexe batcoba wori kevitsar. [modifier]
Vegungikya va mergil bazer : zilira va ulida pu kurenik, kotsielon, i va galema dem lava is abic guboy. Dielokilik finer, voxe mergil me di sopur. Sin pu sint kalid : « Rotir birga tid. » Nume ta cenkara kevlanid. Namulolsusik sokes arte sanoy lieue lum zo bazer ; nume Vallin feliik vansorkayason va direm ta rupera konviele mallapir. Namulolsusik va begxa bulkar liz in konakviele tcalar, i va beg feredjayan gu mogiba. Sin kottol va ki kotmielon gonestud, abdi sintyona santa isu radimi. Varafa begxa zo raweyar meseotason va daneksany. Tavesik va yona bula pu sin basitalar, i va yona diotetca ke renara megrupena koe tawaday, is nuve merotinesa. Sina di rodjed. Gertik va befoltaca kal tciamafo Sang de Fécamp xo pirdar. Rose do tari koe eceyxe piriler, ise belcekason va intafa fuxara gu yoromaf jugemereem ke kotbata tawadayikafa takra, va Tel dilden gan kottan voser enide gire zo di tunazbukar. Giopaca. Bam gu intafa tanefa rola zo fogesester nume kranavap tolgenir. Ine nigeson vanxomer ; kurenik dere tuguazawer, « va intaf fortey estur », sedme jontiktan ; mefavlon pokoleson trokewer. Batvieli geja wal sint roidar. In lutsagar, alier. Kotafizcekon kornar, aze sielon, koe ilava, cepites is bogaf, va situnda is yoromaca ko vola gimimar. Adim konmielon, mea grupeson va coba goreduna enide loeke mejesir, kobenplekur da ine ranyar aze va afiz leve muvara kabdue tuvel ker. Larde me malveger, pune in va ine ben berga narir aze va inafa vola nubokason toz alier. Ine va mecoba kalir, me kalizir. Tabodjanon, in mo intaf jivot badeson grabler ; aze talgalicason is oviskaf gu riyomera, va ine sagonder. Bam va vula dem gripokolena keviera daskir, nume, kan yatkafa zatcara divmimasa va in kev rebava, mo penay madagir, aze kan betaweyesa is azdasa puda : — Va nazbeik dikí, jin, en dikí ! Do Jacques al dikí ; grupeckel, va Jacques. In va jin gokureyer, voxe al mallanir. In, akoyen, batlize zavzagir, lidixaf lion dam ine ; pulvajir : — Va tok… tokcoba kalil ? va tok… tokcoba kalil ? Bam ine toz buwejar, aze reme traspusa ikuzara tcipar : — Batdume va rin me djukureyé, batdume. Me rokaliyí ; battode va jin is nazbeik gu beg co-zelal. Va nazbeik me dikil, rin ; me grupel, me grupel. In balkon tolkalir, loloon akoyenon : — Va nazbeik dikil ? va nazbeik dikil ? Ine isti krumkara tiyar : — Va jin al stegeval ; rotir grupel ? jin, me djukureyé. Bam in ranyar, va raki vanteyar, aze koe mawa toz avlar, gison va meem kake ge. Ine dun borer, atitsuyune mo ilava. Levgon in kabduon vukir : « Kas al rolá larde pu rin me al daskí ? ~kalir. » Ine me dulzer. In gire toz avlar ; aze, gire vukison, erur : « Toka klaa ke rinaf oc ?» Ine prejar : — In riwe tevdaf. In dakison erur : — Tokdume me al kalil ? Ine brer : — Kas co-rokaliyí ?! In mezekason wan ranyer. — Tetce, ranyal !! ~ kalir. Ine porton madagir ; aze moida ranyer, va int zobeson keve rebava, in levgon toz kipeper, milinde remi vielany gikiper ; ise larde ine wan zo ropplekur, in loplekur : — Kle, va bat nazbeik, aneyatat, larde belcon me dikit. Ine zo ciwapar maneke, ede va po me co-gracir, pune arse co-yater. Vexe dielokilik nubapragar ise prejar : — Va kon djuvanikatcú, batse va tan trasin, batse va tel trasin. Va gadiskik pu gertik al erú. Azon, wan kipeson, va bores is bonaf kurenik tcorkutcar, ise kipegar, dumede ine me co-gildar : — Tetce, gadya, wit kase abice aabre ware zavzagir ; jin va ekedacek co-estuckú. Ine va gratca plekur ; sin titlanid ; aze edje va tey leve rekleda badeson dimtegir, in, ayewas, koe burmotaxo borapon wan avlar, tolkalison : — Anye, en, batcoba puveganyar ; mekalison voxe tí valeackaf, valeanyaf. |
| ||||||||||||||||||||||||||||||||||||||||
