Charlotte Brontë
|
Charlotte Brontë gu tan lokotaskiweyes englavaf berpotik batvielon zo torigir. Bak 1816 koe wida poke Haworth koblir, lize Patrick Brontë gadikye tir partik. Bak 1821 gadikya awalker. Ta sopura va gaara va nazbeikyeem, Patrick Brontë kosuter koe irubarabema tori partikafa nazbeikya lize bligropa tir virnafa maneke toloya loklaafa berikya golde kotcakola awalked. Charlotte varabliron ganon zo tcalatar (koe Jane Eyre va yona bagala divrozatar) ise vanpir taneanazbalik ke balemoy moblis nazbeik. Tid Branwell is Emily is Anne. Daletoe nazbeikeem gan gadikyafa ziavikya zo gaatar. Charlotte is Branwell berikye va noafa suterotafa dokobara aname Angria gestafa patecta mopoyed ise va jontika nega isu wenhaxa isu pone isu eltayamkirafa ezla warzed. Azon Charlotte, djuvanpiyise tavesik, ko dugafa irubarabema zo stakser lize do Ellen Nussey is Mary Taylor di tunawenyar. Ebafa toza tir volfakafa. Vebena gan suterolegara, in va sopura va fli ke tavesik koe intafa savsafa irubarabema az dene yon pilkotik flecur. Undeson va redura va intafa yikyafa irubarabema, in gorar da divpatecton mallapir ta tukotrara va intafa avafa grupesuca. Bak 1842 do Emily berikya ko Bruxelles lapir, ko irubarabema gadena gan Heger weltikya. Va rictela ke grupelaf is katcalaf gaaropik Heger kurenikye toz levgar. Awalkera ke sinafa ziavikya va toloya berikya steger da dimpid ko Haworth lize Emily gorar da tenon titickawer. Charlotte den Heger tolmallapir, wetce englavaf tavesik koe sinafa tcema. Loloon dustulenon gan Heger weltikye, va swavopafa deonapa levgar acum gorar da dimpir ko Engla. Jontik aksat di tid adraf inde sol bata keluyuna skedanya kariwawer. Konviele, bak 1845, va yon krent ke Emily Charlotte xuyavon kosmar. Baalpenon gan sinafa duga, pu berikyeem drager va sanegara va donafa karba piskutuna kan Poems by Currer, Ellis and Acton Bell vergumvelt bak 1846. Baroya berikya va intaf berpot bam tozud. Tel ke Anne, Agnes Grey, is tel ke Emily, Wuthering Heights, gan piskusik zo naled, vols tel ke Charlotte, The Professor. Kevoke, toleaf berpot, Jane Eyre, piskun bak 1847 yoltoe Currer Bell bifaredur. Konolesaca va prostewa ke gothic berpot, bata taneilkomafa nega va lantan bilitar golde ruyera va inte is elvuca ke gradilikya (isti Victoria rekola) vexe inaf kulupaf martig, skeweraf is kotunon felilen, askitir da titir gulapaca. Va Shirley bareaf berpot bam mopoyer. Branwell berikye, turuyatakolaweyene is puiltfamafe, bak muvugal 1848 golde kotcakola awalker. Arti abica safta, fentaroteyeson is medjuropeyenon Emily dere mulufter. Anne ironokafa berikya bak 1849 milakolon siluon xonukar. Luxe Charlotte bam tir toza ke tozelaca. Lyumason va virnafa filtewesaca, va Shirley soe tenuker. Wori inafa zida daletoe tulomantawer larde va tarkara va yoltiskuca ixeyena pu Emily me govebar. Do intaf milebik, satcon Elizabeth Gaskell intaf enidaf tanizvusik, va yona delafa suterotafa naca bam webokar. Shirley golde suteragropa al mejer. Toloya gradilikya artazukawed ton turietavaf delt ke berikyeem ke Charlotte, ise nega tanion darunter wale seltafa geltreva is berpoteva lodoviskafa vols libuivesa dam tela ke Jane Eyre. Kevoke, Villette, sanegan bak 1853 is omavan moe yona bruxellesafa bagala gan jontiktan gu grot zo torigir. Bak 1854 va Arthur Bell Nicholls partik Charlotte kurer, nekev tsunera ke intafe gadikye. Sin va kurerafa kalucapa gruped. Sol bate sare trindig zavzad vrutas da va are berpotdetce Charlotte aneyayar. Volfikunton, genazbalason Charlotte ve akoler nume ba 31/03/1855 awalker. |
wp-de:Charlotte_Brontë wp-en:Charlotte_Brontë wp-es:Charlotte_Brontë wp-eo:Charlotte_Brontë wp-fr:Charlotte_Brontë wp-it:Charlotte_Brontë wp-sw:Charlotte_Brontë wp-ln:Charlotte_Brontë wp-nl:Charlotte_Brontë wp-pt:Charlotte_Brontë wp-ru:Бронте,_Шарлотта wp-tr:Charlotte_Brontë
