Emily Brontë

Emily Brontë

1818-1848 Englaf suterotik

Emily Brontë, kobliyise bak 1818, tir nazbeikya ke Patrick Brontë partik. Bro berikyeem, va grivapa tori sutera wavepon exaksar nume, va int gesiason do Anne tela lojotafa, va Gondal gestafo gazaxo redur. Loon dam beta berikya, Emily va Haworth yasamona is anamefa vayka en skeweson suver : batlize, dum gradilikeem ke intaf tanoy berpot, koe govitafa tuwava abrotcibartivon ugalzer. Tison 17-daf, ko Roe Head School va Charlotte dositar. Vexe kire va divblira en levgajar, ko partaxo kalipon di dimpir. Ara yovara va jonvielera koe Law Hill School nover da kosmar va ageltafa izva ke Sam Stead jotaf gadikiskik, dan pu in va tela ke gradilik ke "Wuthering Heights" koswatar. Koe Law Hill, ta vulkura va aldoasa anameda, va yona ezla suter. Azon koe Haworth balemdon ugalzer abdi da ko Bruxelles va Charlotte dositar. Moi awalkera ke sinafa ziavikya, ko Haworth tenon dimpir. Bak 1845, Charlotte va inaf nubasuteks va ezleem kosmar nume va finera gu Emily ta sanegara soltiolter. Bak 1848, tandon arti sanegara va berpot, golde kotcakola Emily Brontë awalker, vewayason va kota selaropafa tcicera. Intaf tanoy berpot Wuthering Heights (dodeson sanegayan bak 1847 yoltoe Ellis Bell) va kiewatcanya war kore me tir lion dam Jane Eyre tel miltandon sanegayan gan Charlotte berikya. Katcalaf gu suterafor is remaynustuca is ilkapafa berpotevaca turestayana gan tela germanafa, yoke nouca in fereon al zo dolunyer do ellasafa ok Shakespeare folva. Vexe enkagrupesuca titir gavefa ise norluca ke Emily Brontë anton moni tena ke XIX-da afton tudenaweter.

Emily Jane Brontë  Blira 1818-1848  Ava Englava  Suterind Ezlopa, Berpot   Suterot Poems (1846) Wuthering Heights (1847)

wp-de:Emily_Brontë wp-en:Emily_Brontë wp-es:Emily_Brontë wp-eo:Emily_Brontë wp-fr:Emily_Brontë wp-it:Emily_Brontë wp-sw:Emily_Brontë wp-ln:Emily_Brontë wp-nl:Emily_Brontë wp-pt:Emily_Brontë wp-ru:Бронте,_Эмили wp-tr:Emily_Brontë